ކޮލަމްބޯ ސެކިއުރީޓީ ކޮންކްލޭވްގެ އެންއެސްއޭގައި ބައިވެރިނުވެވުނީ އިދާރީގޮތުން ކުރިން ހަމަޖައްސަންޖެހޭ ކަންކަން ހަމަނުޖެހި ހުރުމުން - ޚަލީލް

ކޮލަމްބޯ ސެކިއުރިޓީ ކޮންކްލޭވްގެ މެމްބަރު ގައުމުތަކުގެ ނޭޝަނަލް ސެކިއުރިޓީ އެޑްވައިޒަރުންގެ 6 ވަނަ ބައްދަލުވުމުގައި ރާއްޖެއިން ބައިވެރިވެފައި ނުވަނީ، އިދާރީގޮތުން ކުރިން ހަމަޖައްސަންޖެހޭ ކަންކަން ހަމަޖައްސާފައި ނެތުމުން ކަމަށް ރައީސް އޮފީހުން ބުނެފިއެވެ.

ކޮލަމްބޯ ސެކިއުރިޓީ ކޮންކްލޭވްގެ ނޭޝަނަލް ސެކިއުރިޓީ އެޑްވައިޒަރުންގެ 6 ވަނަ ބައްދަލުވުމުގައި މި އަހަރު ރާއްޖެއިން ބައިވެރިއެއްނުވެއެވެ. މިކަމާ ގުޅިގެން ސަރުކާރަށް ވަނީ ފާޑުކިއުން އަމާޒުވެފައެވެ. މި އަހަރުގެ ބައްދަލުވުން ބޭއްވީ މިމަހުގެ 7 ވަނަ ދުވަހުން ފެށިގެން 8 ވަނަ ދުވަހުގެ ނިޔަލަށް، މޮރިޝަސްގައެވެ.

Advertisement

މޮރިޝަސްގައި ހުންނަ އިންޑިއާގެ ހައިކޮމިޝަނުން ކުރި އެކްސް ޕޯސްޓެއްގައި، ބައްދަލުވުމުގައި ބައިވެރިވި ގައުމުތަކުގެ ގޮތުގައި ލިސްޓްކޮށްފައިވަނީ؛ ލަންކާ، އިންޑިއާ އަދި މޮރިޝަސްގެ ނޭޝަނަލް ސެކިއުރިޓީ އެޑްވައިޒަރުގެ އިތުރުން, އޮބްޒަރވަރުންގެ ގޮތުގައި ސީޝެލްސާއި ބަންގްލަދޭޝްގެ ވަފުދެކެވެ.

މިކަމާ ގުޅިގެން ރާއްޖެއެމްވީއަށް މައުލޫމާތު ދެއްވަމުން މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ސްޓްރެޓީޖިކް ކޮމިއުނިކޭޝަން، އިބްރާހީމް ޚަލީލް ވިދާޅުވީ، ކޮލޮމްބޯ ސެކިއުރިޓީ ކޮންކްލޭވްގައި ބައިވެރިވުމަށް އިދާރީގޮތުން ފުރިހަމަކުރަންޖެހޭ ބައެއް ކަންކަން ކުރިން ފުރިހަމަކުރެވިފައި ނެތުމުންނާއި، އަދި ސަރުކާރު ބަދަލުވިފަހުން އައި ކަމަކަށްވުމާއެކު އެ ކޮންކްލޭވްގައި ބައިވެރިނުވެވުނު ކަމަށެވެ. ނަމަވެސް ރާއްޖެ އެ ކޮންކްލޭވްގައި އަދާކުރާ ދައުރަށާއި، ހިނގަމުންދާ ކަންތައްތަކަށް އެއްވެސްކަހަލަ ހީނަރުކަމެއް، އަދި ބަދަލެއް ނާންނާނެކަމަށް ޚަލީލް ވިދާޅުވިއެވެ.

ޚަލީލް ވިދާޅުވީ، ޖަލްސާގައި ބައިވެރިވުމަށް އިދާރީގޮތުން ކުރަންޖެހޭ ކަންކަން ފުރިހަމަވެފައި ނެތުމާއި، އަދި ލިބުނު ވަގުތު ކުޑަވުމާއެކު މި ފަހަރުގެ ކޮންކްލޭވްގައި ބައިވެރި ނުވެވުނު ކަމަށެވެ. ޓްރާންސިޝަން މަރުހަލާގައި އެކަމާގުޅޭ މަޝްވަރާއެއް ކުރިކަމެއް ނުވަތަ ނޫންކަމެއް ނޭނގޭކަމަށް ޚަލީލް ވިދާޅުވިއެވެ. އަދި އޭނާ ޓްރާންސިޝަނަލް މަރުހަލާގައި ބައިވެރިނުވާކަމަށާއި، އެހެންކަމުން އެ މައުލޫމާތު ސާފުނޫން ކަމަށް ވިދާޅުވިއެވެ.

ޚަލީލް ވިދާޅުވީ، ވަގުތު ލިބުނުގޮތުންނާއި ކަންކަން ދިމާވިގޮތުން ކޮލޮމްބޯ ސެކިއުރިޓީ ކޮންކްލޭވްގައި ބައިވެރިނުވެވުނުނަމަވެސް، ސަރުކާރު ބަދަލުވި މަރުހަލާގައިވެސް ބައެއް ކަންކަމުގައި ކުޑަ ވަގުތުކޮޅުގައި ބައިވެރިވެ، އަދި ބައިވެރިނުވެވެސް ހުންނާނެ ކަމަށެވެ. އަދި ކޮލޮމްބޯ ސެކިއުރިޓީ ކޮންކްލޭވްގައި ބައިވެރިނުވުމަށް ނިންމައި އެއަށް ނުދިޔައީ ނޫންކަމަށާއި، އިދާރީގޮތުން ހަމަޖައްސަންޖެހޭ ކަންކަން ހަމަނުޖެހި ހުރުމުން ބައިވެރިނުވެވުނީ ކަމަށް ޚަލީލް ވިދާޅުވިއެވެ.

އަދި ބައިވެރިވުމަށް ކުރަންޖެހޭ މަސައްކަތްތައް ރައީސް އޮފީހުން ކުރިކަމަށާއި، ނަމަވެސް ބައެއް ކަންކަން ފުރިހަމަނުވެ ހުރުމުގެ ސަބަބުން މިފަހަރު ބައިވެރިނުވެވުނު ކަމަށް ޚަލީލް ވިދާޅުވިއެވެ.