ލަންކާގައި ދިރިއުޅެމުން އަންނަ ގުޅިފައިވާ ޕާޓީތަކުގެ ސަޕޯޓަރުން އިސްނަގައިގެން ހުޅުވާ "މިނިވަން ޖައްވު ޖަގަހަ" އާއި އަބުރުފުޅު ފަންޑު ހުޅުވީ އާދިއްތަ ދުވަހުގެ ހަވީރު 04:30 ނޮގޭގޮޑާގެ ކަންދަވައްތަ ރޯޑްގެ 44 ވަނަ ނަންބަރު ގޭގައެވެ. މި ހަރަކާތުގައި ސްރީ ލަންކާގައި ދިރިއުޅޭ ގިނަ އަދަދެއްގެ ފަރާތްތަކުން ވަނީ ބައިވެރިވެފައެވެ. މި ޖަގަހަ ހުޅުއްވައި ދެއްވީ، ރައީސް މުހައްމަދު ނަޝީދުގެ ސަރުކާރުގެ ފޮރިން މިނިސްޓަރު އަހުމަދު ނަސީމެވެ.
ޖަަގަހަ ހުޅުވައިދެއްވަމުން އަހުމަދު ނަސީމް ވިދާޅުވީ، މިހާރު މިރާއްޖޭގައި އޮތީ އަނިޔާވެރި ޑިކްޓޭޓަރޝިޕެއް ކަމަށާއި، މ ވެރިކަން ކޮންމެހެެން ވެސް ބަދަލުކުރަން ޖެހޭ ކަމަށެވެ. އަދި އެކަން ކުރުމަށް ހުރިހާ ބޭފުޅުން ވެސް ވޯޓަށް ވަރަށް ބޮޑަށް ވިސްނަން ޖެހޭ ކަމަށް ވިދާޅުވިއެެވެ. އަދި ސަރުކާރުން މިފަހަރުގެ ވޯޓް އޮޅުވާލުމަށް ކުރާ މަސައްކަތަށް ވަރަށް ބޮޑަށް ފާރަވެެރިވެ ތިބުމަށް ނަސީމް ގޮވާލެއްވިއެވެ.
މީގެ އިތުރުން އަބުރުގެ ގާނޫނުގެ ދަށުން ޖޫރިމަނާ ކުރެވޭ އެންމެ ބޮޑު އަދަދު ކަމުގައިވާ ދެ މިލިއަން ރުފިޔާއިން ބްރޯޑްކާސްޓިންގ ކޮމިޝަނުން ރާއްޖެޓީވީ ޖޫރިމަނާކުރުމާ ގުޅިގެން ރާއްޖެޓީވީއަށް އެހީވުމަށްޓަކައި "އަބުރުފުޅު" ފަންޑު ފޮއްޓެއް ވެސް ލަންކާގައި އާދިއްތަ ދުވަހު ވަނީ ހުޅުވިގެން ގޮސްފައެވެ. މި ފޮއްޓަށް މިއަދު ވެސް ލަންކާގައި ދިރިއުޅޭ ގިނަ އަދަދެއްގެ އާއްމުން ވަނީ އެހީތެރިވެފައެވެ.
ރާއްޖެޓީީވީ ޖޫރިމަނާ ކުރީ، މިއަހަރުގެ މާޗް 16 ވަނަ ދުވަހުގެ ރޭ މާލޭގައި ކުރަމުން ދިޔަ މުޒާހަރާ ރާއްޖެ ޓީވީން ގެނެސްދެމުން ދިޔައިރު މީހަކު ދެއްކި ވާހަކައަކާ ގުޅިގެންނެވެ.
ގުޅިފައިވާ ޕާޓީތަކުގެ ޖަގަހައެއް ލަންކާގައި ހުޅުވިއިރު، މެލޭޝިޔާގައިވެސް ގުޅިފައިވާ ޕާޓީތަކުގެ ޖަގަހައެއް ވަނީ ހުޅުވައިފަ އެވެ. "ދާތޯ ޖަގަހަ"ގެ ނަމުގައި ގުޅިފައިވާ ޕާޓީތަކުގެ މެލޭޝިޔާގެ ޖަހަގަ ހުޅުއްވައިިދެއްވީ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ އެވެ. އޭގެއިތުރުން އަދާލަތު ޕާޓީގެ ޚާރިޖީ ކަންތައްތަކާ ބެހޭ ކޮމެޓީގެ ޗެއާޕާސަން ޝިދާތާ ޝަރީފްވެސް އެ ރަސްމިއްޔާތުގައި ބައިވެރިވެވަޑައިގެންނެވި އެވެ.
ޖަގަހަ ހުޅުވުމަށް ބޭއްވި ރަސްމިއްޔާތުގައި، މެލޭޝިއާގައި ދިރިއުޅޭ ގިނަ އަދަދެއްގެ ދިވެހިން ވަނީ ބައިވެރިވެފަ އެވެ.
އިންތިހާބު ކާމިޔާބުކުރުމަށްޓަކައި ގުޅިފައިވާ ޕާޓީތަކުން އަންނަނީ ހުރިހާ ސަރަހައްދެއްގައިވެސް ތަފާތު އެކި ހަރަކަތްތައް ހިންގަމުންނެވެ.
