ރައީސް ނަޝީދުގެ ސެކިއުރީޓީއާ ގުޅޭ އެއްވެސް މައުލޫމާތެއް ހިއްސާކޮށްފައެއް ނުވާނެ: މިނިސްޓަރު މާރިޔާ

ރައްޔިތުންގެ މަޖިލީހުގެ ރައީސް, ރައީސް މުހައްމަދު ނަޝީދުގެ ސަލާމަތާއި ސެކިއުރީޓީއާ ގުޅޭ ސިއްރު މައުލޫމާތުތައް ހާމަކޮށްފައިވަނީ ޑިފެންސް މިނިސްޓަރު މާރިޔާ އަހުމަދު ދީދީ ކަމަށް ދެކެވޭ ވާހަކަތައް އެކަމަނާ ދޮގު ކުރައްވައިފިއެވެ.

މިނިސްޓަރު މާރިޔާއަށް ކުރެވޭ ތުހުމަތުތަކާއި ގުޅޭ ގޮތުން ރާއްޖެއެމްވީއަށް މިނިސްޓަރު ވިދާޅުވީ އެފަދަ މައުލޫމާތެއް އެއްވެސް ނޫހަކަށް ދީފައިނުވާނެ ކަމަށެވެ. އަދި އެކަމަނާއަށް ކުރެވޭ ތުހުމަތުތަކަކީ ކަނޑައެޅިގެން ދޮގެއް ކަމަށް ވިދާޅުވިއެވެ.

''ކެނެރީގޭގައި ސެކިއުރިޓީ ނުދެވޭނެ ކަމާއި ނުރައްކާ އޮތް ކަން ނަޝީދަށް އެމްއެންޑީއެފުން އެންގި'' ސުރުހީގެ ދަށުން މިހާރު އޮންލައިންގައި ޝާއިއުކޮށްފައިވާ ރިޕޯޓުގައި ރައީސް ނަޝީދުގެ ސެކިއުރިޓީއާއި އެމަނިކުފާނުގެ ގެކޮޅު ގ. ކެނެރީގެ ސަލާމަތާ ގުޅުން ހުރި ގިނަ މައުލޫމާތުތަކެއް ހިމެނެއެވެ. މިމައުލޫމާތުތައް ދީފައިވަނީ ސަލާމަތީ ޚިދުމަތުގެ އިސްބޭފުޅެއް ކަމަށްވާއިރު، މައުލޫމާތު ދިން މަސްދަރު ވަނީ ސިއްރު ކޮށްފައެވެ.

ނަމަވެސް މިމައުލޫމާތު ހިއްސާކޮށްފައިވަނީ މިނިސްޓަރު މާރިޔާ ކަމަށް ބައެއް ފަރާތްތަކުން ތުހުމަތުކޮށްފައިވެއެވެ. އަދި ރާއްޖޭގެ ބައެއް މީޑިއާތަކުގައި ވެސް ރިޕޯޓުކޮށްފައިވެއެވެ. މި މަހުގެ 6 ވަނަ ދުވަހު، ކުރީގެ ރައީސް އަދި ރައްޔިތުން މަޖިލީހުގެ ރައީސް ނަޝީދަށް އަމާޒުކޮށްދިން ޓެރަރިސްޓް ހަމަލާއާ ގުޅިގެން އެމްއެންޑީއެފްގެ އިތުރުން މިނިސްޓަރު މާރިޔާއަށް ގިނަ ބައެއްގެ ފާޑުކިޔުން ވަނީ އަމާޒުވެފައެވެ. މި ހަމަލާއާ ގުޅިގެން އިންޓެލިޖެންސްގެ އެއްވެސް މައުލޫމާތެއް ލިބިފައިނުވާ ކަމަށް ފުލުހުން ބުނެފައިވާތީ އެކަމާ ވެސް ގިނަ ބަޔަކު ކަންބޮޑުވުންފާޅު ކޮށްފައިވެއެވެ. މީގެ އިތުރުން ރައީސް ނަޝީދުގެ ދަރިކަނބަލުންނާއި އެމަނިކުފާނުގެ އާއިލީ ބައެއް މެމްބަރުން ޑިފެންސް މިނިސްޓަރ މާރިޔާ އަހުމަދު ދީދީގެ އިސްތިއުފާއަށް ވެސް ގޮވާލާފައިވެއެވެ.

އެރިޕޯޓުގެ މައްސަލަ 241 ކޮމިޓީން ބަލަމުންދާއިރު އެ މައުލޫމާތު އެގޮތަށް އާންމުވުމަކީ، ރައީސް ނަޝީދުގެ ހިމާޔަތާއި ރައްކާތެރިކަމާއި، ގ.ކެނެރީގޭގައި ދިރިއުޅުއްވާ އެމަނިކުފާނުގެ މުޅި އާއިލާގެ ރައްކާތެރިކަން ގެއްލިގެންދާނެ ކަމެއް ކަމަށް އެ ކޮމިޓީން ބުނެފައިވެއެވެ. ސިފައިންގެ މަސްއޫލިއްޔަތާއި ވާޖިބު އަދާކުރުމުގައި ލިބޭ އެއްވެސް މައުލޫމާތެއް، ސިފައިންގެ ގާނޫނުގެ 24 ވަނަ މާއްދާ (ނ) ގައި ބަޔާންކޮށްފައިވާ ފަރާތްތައް ފިޔަވައި އެ ނޫން އެއްވެސް ފަރާތަކާ ހިއްސާކުރުމަކީ މަނާކަމެއް ކަމާއި، ދިވެހިރާއްޖޭގެ ގާނޫނުލްއުގޫބާތުގެ ދަށުން ކުށެއް ކަމަށް އެކޮމިޓީން ބުނެފައިވެއެވެ. އަދި މިމައްސަލައަކީ ގައުމީ ސަލާމަތާ ގުޅުންހުރި މައްސަލައަކަށްވެފައި، ސަލާމަތީ ޚިދުމަތްތައް ހިނގާނުހިނގާ ގޮތް ބަލަމުން ގެންދިއުމަކީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 241 ވަނަ މާއްދާގެ ދަށުން އެކޮމިޓީގެ ދުސްތޫރީ ޒިންމާއަކަށް ވީހިނދު، އެ ކޮމިޓީން މިމައްސަލަ ބެލުމަށް ނިންމާފައިވާކަމަށް ކޮމިޓީގެ ނޫސްބަޔާނުގައި ވަނީ ބުނެފައެވެ.

ރައީސް ނަޝީދު އަވަހާރަކޮށްލަން ދިން މިހަމަލާގައި ސީރިއަސް ގިނަ ޒަހަމްތަކެއް ލިބިވަޑައިގެންނެވިއެވެ. އޭޑީކޭގައި ފަރުވާ ހޯއްދެވުމަށްފަހު މިހާރު ހުންނެވީ ލިބިވަޑައިގެންނެވި ޒަޚަމްތަކަށް އިތުރު ފަރުވާ ހޯއްދެވުމަށް ޖަރުމަންވިލާތުގައެވެ.