ރެފްރީ އަށް ދިން ހަމަލާއާ ގުޅިގެން މެދު ކަނޑާލި ތުރުކީގެ ލީގު އަންނަ ހަފުތާގައި ފަށަނީ

ތުރުކީ ސުޕަ ލީގުގައި ރިޒެސްޕޯ އަދި އަންކާރަގުޗޫ ބައްދަލު ކުރި މެޗުގެ ރެފްރީއަކަށް ހުރި، ހަލީލް އުމެޓް މެލާ އަށް ހަމަލާ ދިނުމުން މެދު ކަނޑާލަން ނިންމި ލީގު، އަންނަ ހަފުތާގައި ފަށަން ނިންމައިފި އެވެ.

ހަލީލް އުމެޓް މެލާ އަށް ހަމަލާ ދީ، ޒަޚަމުކޮށްލުމުން ތުރުކީގެ ފުޓުބޯޅަ ފެޑެރޭޝަނުން ނިންމީ މުއްދަތެއް ނެތް ގޮތަށް އެ ޤައުމުގެ ލީގު މެދު ކަނޑާލުމަށެވެ. ނަމަވެސް، ހަމަލާ އަށް ފަހު ރެފްރީ އަށް ހޮސްޕިޓަލުގައި ފަރުވާ ދިނުމަށް ފަހު ބުދަ ދުވަހު ވަނީ ދޫކޮށްލައިފަ އެވެ. އެއާއެކު އެ ޤައުމުގެ ފުޓުބޯޅަ ފެޑެރޭޝަންގެ ބޯޑުން ބުދަ ދުވަހު ނިންމީ، އަންނަ ހަފުތާގައި ލީގު އަލުން ފެށުމަށެވެ.

ތުރުކީ ފުޓުބޯޅަ ފެޑެރޭޝަންގެ ރައީސް މެހްމަތު ބުޔުކެކްސީ ވިދާޅުވީ، ހަމަލާއާ ގުޅިގެން ތުރުކީގެ ހުރިހާ ލީގެއް މެދު ކަނޑާލަށް ނިންމީ ބޯޑުން ނިންމައިގެން ކަމަށެވެ. އޭގެ ފަހުން މިހާރު ބޯޑުން ނިންމާފައި ވަނީ ޑިސެމްބަރު މަހުގެ 19 ވަނަ ދުވަހު ހުރިހާ ލީގެއްގެ ކުޅުން އަލުން ފެށުމަށް ކަމަށް ވެސް އޭނާ ވަނީ ވިދާޅުވެފަ އެވެ.

މީގެ އިތުރުން އޭނާ ވިދާޅުވީ ލީގުގެ ކުޅުން އަލުން ފަށާއިރު، ސަލާމަތީ ކަންކަން އިތުރަށް ވަރުގަދަ ކޮށްފައި ބެހެއްޓުމަށް ވެސް މަޝްވަރާ ކޮށްފައިވާނެ ކަމަށެވެ. އެގޮތުން އެ މަސައްކަތް ކުރުމަށް ޤާނޫނީ ގޮތުން ކުރަން ޖެހޭ ކަންތައްތަކަކީ ކޮބައިތޯ ބެލުމަށް އެ ޤައުމުގެ ޖަސްޓިސް މިނިސްޓަރާއެކު ވެސް ބައްދަލު ކޮށްފައިވާނެ ކަމަށް އޭނާ ވިދާޅުވި އެވެ. އަދި އެކަން ކޮށްގެން ވެސް، ސަލާމަތީ ކަންކަން ވަރުގަދަ ކުރަން ބޭނުންވާކަން ބުޔުކެކްސީ ފާހާގަ ކުރެއްވި އެވެ.

ބުޔުކެކްސީ ވިދާޅުވީ ފުޓުބޯޅަ އަދި އެހެނިހެން ކުޅިވަރުތަކުގައި ވެސް އެފަދަ ކަންކަން ހިނގައިގެން ނުވާނެ ކަމަށެވެ. އަދި ޚާއްސަކޮށް އެފަދަ ކަންކަމަށް ތަރުހީބު ލިބޭނެ ކަހަލަ އެއްވެސް ކަމެއް، އެއްވެސް ފަރާތަކުން ނުކުރުމަށް ވެސް އޭނާ ވަނީ އިލްތިމާސްކޮށްފަ އެވެ.