ކޮންޓްރެކްޓް ހެދޭނެ އެންމެ ދިގު މުއްދަތަކަށް ފަސް އަހަރު
މިހާރު ހަދާފައިވާ ދިގު މުއްދަތުގެ ކޮންޓްރެކްޓްތަކަށް ބަދަލެއް ނުގެންނާނެ
މެޗުގައި ދެ ލަނޑު ޖެހި ސަލާހު: ފޮޓޯ-ރޮއިޓަރސް
އިނގިރޭސި ޕްރެމިއާ ލީގުގެ ކުޅުންތެރިންގެ ކޮންޓްރެކްޓް އެންމެ ގިނަވެގެން ހެދޭނީ ފަސް އަހަރަށް ކަމަށް ނިންމަން އެ ލީގުން ނިންމައިފި އެވެ.
ޕްރެމިއާ ލީގުގެ އެންމެ އިސްވެރިން މި ގޮތަށް ނިންމީ ކުޅުންތެރިންގެ ހައްގުތައް ހިމާޔަތް ކުރުމަށާއި ޔޫއޭފާގެ ފައިނޭންޝަލް ފެއާޕްލޭއާ ހިލާފުވިޔަ ނުދިނުމަށް ބާރު އެޅުމުގެ ގޮތުންނެވެ.
މި ގޮތުން މި ގަވާއިދަށް އަމަލުކުރަން ފަށާނީ ކުރިއަށް އޮތްތަނުގައި ހަދާ ކޮންޓްރެކްޓްތަކާ އެކުގަ އެވެ. ލީގުން ބުނީ މިހާރު ހަދާފައިވާ ކޮންޓްރެކްޓްތަކަށް ބަދަލު ނުގެންނާނެ ކަމަށާއި ނަމަވެސް ކުރިއަށް އޮތްތަނުގައި ހަދާ ކޮންޓްރެކްޓްތައް އެންމެ ގިނަވެގެން ހެދޭނީ ފަސް އަހަރަށް ކަމަށެވެ. އަދި ކޮންޓްރެކްޓް އާކުރަން ޖެހުނަސް ފަސް އަހަރަށްވުރެ ދިގު ނުކުރެވޭނެ ކަމަށެވެ.
ޕްރެމިއާ ލީގުގައި ކޮންޓްރެކްޓްގެ މައްސަލަތައް އެންމެ ބޮޑުވި އެއް ކަމަކީ ޗެލްސީގެ މިހާރުގެ ވެރިޔާ ޓޮޑް ބޮއެލީ ބައެއް ކުޅުންތެރިންނާއެކު އަށް އަހަރުގެ އެއްބަސްވުން ހެދުމުންނެވެ. އޭނާ މިކަން ކުރީ ފައިނޭންޝަލް ފެއާޕްލޭއިން ސަލާމަތްވުމަށް، ގަވާއިދުތަކުގެ ނާޖާއިޒު ފައިދާ ނަގައިގެން ކަމަށް ތަޖުރިބާކާރުން ވަނީ ބުނަން ފަށައިފަ އެވެ. ޔޫއޭފާއިންނާއި ޕްރެމިއާ ލީގުން ޗެލްސީގެ މި އަމަލު ދިރާސާކުރަން ފެށީ މި ހިސާބުންނެވެ.
