ގޯތި ލިބުނު މީހުން އެތަނުގައި މަސައްކަތް ކުރުން ހުއްޓުވާފައިވާނީ އާބަންކޯއިން: އާބަންކޯ
13 ޑިސެމްބަރު 2023 | ބުދަ 06:33ނިންމުމެއް ނިންމުމުން މި މަސައްކަތް ކުރިއަށް ގެންދެވޭނެކަމަށް ވިދާޅުވި
އާބަންކޯގެ މެނޭޖިންގ ޑިރެކްޓަރު ފަޒުލް
ގެދޮރުވެރިޔާ ސްކީމްގެ ދަށުން ގޯތި ލިބުނު މީހުން އެތަނުގައި މަސައްކަތް ކުރުން ހުއްޓުވާފައިވާނީ އާބަންކޯއިންކަމަށް އެ ކުންފުނިން ބުނެފިއެވެ.
ބިންވެރިޔާ ސްކީމުގެ ދަށުން ދޫކުރި ފްލެޓުތައް ކުރިއަށް ގެންދިއުން ހުއްޓާލާފައިވަނީ އޭސީސީގެ އެންގުމަކަށެވެ. އެހެންނަމަވެސް ގޯތި ދޫކުރުމުގެ މަސައްކަތް ހުއްޓާލުމަށް އަންގާފައިނުވާނެކަމަށް އޭސީސީން ބުނެއެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމެޓީއަށް އޭސީސީ ހާޒިރުކުރުމުން ދެއްކި ވާހަކައިގައި އެ ކޮމިޝަނުން ވަނީ ބިންވެރިޔާ ސްކީމާ ގުޅޭ އެފަދަ މައްސަލަތަކުގެ އޮޕަރޭޝަންގެ މަސައްކަތްތައް ހުއްޓާލަން ހައުސިންގ މިނިސްޓްރީއަށް އަންގާފަ ނުވާނެކަން ސާފުކޮށްދީފައެވެ.
ވީއިރު ގޯތިތަކުގައި މަސައްކަތް ކުރުން ހުއްޓުވާފައިވާތީ ރާއްޖެޓީވީން ސުވާލުކުރުމުން އާބަންކޯގެ މުވައްޒަފަކު ބުނީ، އެ މަސައްކަތް އޮތީ "ހޯލްޑް" ކޮށްފައި ކަމަށާއި، އެކަމާ ގުޅޭ ޑިޕާޓްމަންޓުން އަދި ވަކި ނިންމުމެއް ނިންމާފައިނުވާކަމަށެވެ.
އަދި ނިންމުމެއް ނިންމުމުން މި މަސައްކަތް ކުރިއަށް ގެންދެވޭނެކަމަށް އޭނާ ބުންޏެވެ.
ގޯތި ލިބުނު ފަރާތްތަކަށް މިވަގުތު އެތަނުގައި މަސައްކަތް ކުރެވޭނެތޯ ސުވާލު ކުރުމުން އޭނާ ބުނީ، މިވަގުތު އެ މަސައްކަތް އާބަންކޯއިން ވާނީ ހުއްޓުވާފައިކަމަށެވެ.
އާބަންކޯއިން އެހެން ބުނި ނަަމަވެސް، އިން ވަކިކޮށް، ވެރިފަރާތްތަކާ ރަޖިސްޓްރީވެސް ޙަވާލުކޮށްފައިވާ ގޯތިތަކުގައި މަސައްކަތް ނުކުރެވޭގޮތަށް ހުއްޓުވާފައިވަނީ ކޮން އުސޫލަކުންތޯ ގިނަ ބަޔަކު ދަނީ ސުވާލު ކުރަމުންނެވެ.
އޭގެ އިތުރުން، ބިން ނަންބަރު 21،066 އިން ފެށިގެން އެ ބްލޮކާ އޭގެ ފަހަތަށް އޮތް ބްލޮކުގެ ބައެއް ގޯތިތަކުގެ ބިމުގެ ވެރިންނަށް ވެސް އެ މަސައްކަތުގައި ގިނަހުރަސްތަކެއްކުރިމަތިވެފައިވެއެވެ.
އެކަމާ ގުޅޭގޮތުން އިތުރު ތަފްސީލު ހޯދުމަށް ރާއްޖެޓީވީން ހައުސިންގ މިނިސްޓްރީއަށް ގުޅުމުން މިނިސްޓްރީން ފޯނަށް ޖަވާބު ދިނުމަށްފަހު، އެކަމާ ގުޅޭގޮތުން ގުޅޭނެ ނަންބަރެއް ދިން ނަމަވެސް އެ ނަންބަރުން ފޯނެއް ނުނަގައެވެ. އަދި ފަހުން ތަކުރާރުކޮށް ގުޅުމުން މިނިސްޓްރީގެ ލޭންޑްލައިންއިން ވެސް ފޯނަށް ޖަވާބުދީފައެއް ނުވެއެވެ.
