ތުރުކީ ސުޕަ ލީގުގައި ރިޒެސްޕޯ އަދި އަންކާރަގުޗޫ ބައްދަލު ކުރި މެޗުގެ ރެފްރީއަކަށް ހުރި، ހަލީލް އުމެޓް މެލާ އަށް ލިބުނު އަނިޔާއާ ގުޅިގެން، އެ ޤައުމުގެ ރައީސް ތައްޔިބް އުރުދުޣާން އޭނާގެ ޙާލު ބައްލަވައިފިއެވެ.
އެ ދެ ޓީމު ބައްދަލު ކުރި މެޗު އެއްވަރުވެގެން ނިމުނުއިރު، މެޗު ނިމުމާއެކު އަންކާރަގުޗޫގެ ރައީސް ފާރުކް ކޯޗާ ވަނީ ދަނޑަށް އަރައި ހަލީލަށް ހަމަލާ ދީފައެވެ. އޭނާ ވަނީ ހަލީލްގެ މޫނު މަތީގައި ޖަހައިފައެވެ. އެކަމުގެ ސަބަބުން ހަލީލަށް އަންނަނީ އަންކާރާ ހޮސްޕިޓަލުގައި ފަރުވާ ދެމުންނެވެ. ހަލީލްގެ ގާތަށް ތުރުކީގެ އިންޓީރިއާ މިނިސްޓަރު ވަޑައިގެންވަނީ، ރައީސް އުރުދުޣާންއާ ފޯނުން ގުޅުއްވައިފައެވެ.
ހަލީލާ ވާހަކަފުޅު ދައްކަވަމުން އުރުދުޣާން ވިދާޅުވީ، ހިނގައިދިޔަ ކަންތައްތަކަކީ ވަރަށް ދެރަ އަދި ހިތާމަވެރި ކަމެއް ކަމަށެވެ. އަދި ހަލީލަށް އަވަސް ޝިފާއަކަށް ވެސް އުރުދުޣާން ވަނީ އެދިވަޑައިގަންނަވާފަ އެވެ. އިތުރަށް ރައީސް އުރުދުޣާން ވިދާޅުވީ، މިވަގުތުގައި ތުރުކީގެ ސަރުކާރާއި އުރުދުޣާން ވެސް ހުންނެވީ ހަލީލާއި، އޭނާގެ އާއިލާ އަދި ރަޙުމަތްތެރިންނާ އެކު ކަމަށެވެ. އަދި ކުޅިވަރެއްގެ ތެރޭގައި އެކަހަލަ ކަންކަން ހިނގުމަކީ އެއްވެސް ވަރަކަށް ބަލައިގަންނާނެ ކަންކަމެއް ނޫން ކަމަށާއި، އެއީ ކުރެވިގެން ނުވާނެ ކަމެއް ކަމަށް ވެސް ވިދާޅުވިއެވެ.
މީގެ އިތުރުން ހޮސްޕިޓަލުގެ މެޑިކަލް ޓީމުން ވަނީ ހަލީލްގެ ޙާލަތު ރައީސް އުރުދުޣާން އަށް ދަންނަވާފައެވެ. އެގޮތުން މިވަގުތު ހަލީލްގެ ހާލު ރަނގަޅު ކަމަށާއި އޭނާ އަށް ދެން ބޭނުންވަނީ އަރާމު ކުރުން ކަމަށް ވެސް ވަނީ ބުނެފައެވެ. ނަމަވެސް، ހިނގައިދިޔަ ކަންތަކާމެދު ހަލީލް މާބޮޑަށް ވިސްނަން ފެށުމުން، އޭނާގެ ލޭ މައްޗަށް ދިޔަކަން ފާހަގަކޮށް މެޑިކަލް ޓީމުން ބުނީ، ހެނދުނުގެ ވަގުތެއްގައި އެކަމަށް ހައްލެއް ގެނެސްފައިވާނެ ކަމަށެވެ.
ހަލީލަށް ދިން ހަމަލާއާ ގުޅިގެން ތުރުކީގެ ފުޓުބޯޅަ ފެޑެރޭޝަނުން ވަނީ، ވަކި މުއްދަތެއް ނެތް ގޮތަށް އެ ޤައުމުގެ ފުޓުބޯޅަ ލީގު މެދުކަނޑާލަން ނިންމައިފައެވެ. އެ ޤައުމުގެ ފުޓުބޯޅަ ފެޑެރޭޝަނުން ޤަބޫލު ކުރާ ގޮތުގައި އެއީ ހަމައެކަނި ހަލީލަށް ދިން ހަމަލާއެއް ނޫނެވެ. އެ ފެޑެރޭޝަނުން ޤަބޫލު ކުރާ ގޮތުގައި އެއީ މުޅި ތުރުކީގެ ފުޓުބޯޅަ އަށް ދެވުނު ހަމަލާއެކެވެ.
