ރައްޔިތުންގެ މަޖިލީހުގެ މެންބަރުން އިންތިހާބުވެފައިވާ ޕާޓީތަކަށް ނިސްބަތްވާގޮތަށް މެންބަރުން އިށީނދެވަޑައިގެން ތިއްބަވާގޮތަށް ފާހެއް ނުވިއެވެ.

މި މައްސަލައަކީ ރައްޔިތުންގެ މަޖިލީހުގެ ޖަލްސާކުރާ މާލަމުގައި މެންބަރުން އިށީނދެވަޑައިގަންނަވާ ތަރުތީބު ބަދަލުކުރެއްވުމާއި ގުޅޭގޮތުން ރައްޔިތުންގެ މަޖިލީހުގެ ޖަލްސާގައި އެކި ފަހަރުމަތިން މެންބަރުން ފާޅުކުރައްވާފައިވާ ހިޔާލު ފުޅުތަކާއި ގުޅިގެން، މަޖިލީހުގެ ޖަލްސާކުރާ މާލަމުގައި މެންބަރުން އިށީނދެވަޑައިގަންނަވާނެ ތަރުތީބު ބަަދަލުކުރެއްވުމަށް އާންމު ކޮމިޓީއަށް ފޮނުވާފައިވާ މައްސަލައެކެވެ.

އެގޮތުން މި މައްސަލަ އާންމު ކޮމިޓީން ދިރާސާކޮށް މަޖިލީހަށް ހުށަހެޅި ރިޕޯޓުގައި ބުނެފައިވަނީ ރައްޔިތުންގެ މަޖިލީހުގެ މެންބަރުން މަޖިލީހުގެ ޖަލްސާކުރާ މާލަމުގައި އިށީނދެވަޑައިގަންނަވާ ތަރުތީބަކީ، މެންބަރުން އިންތިހާބުވެފައިވާ ޕާޓީތައް ނިސްބަތްވާ ގޮތަށް އިށީނދެވަޑައިގެން ތިއްބަވާ ތަރުތީބުން އިށީނދެވަޑައިގެން ތިއްބެވުމަށް ކަމަށް ފެންނަ ކަމަށް، އާންމު ކޮމިޓީގެ މިއަހަރުގެ 17 ވަނަ ބައްދަލުވުމަށް ހާޒިރުވެ ވޯޓުގައި ބައިވެރިވި މެންބަރުންގެ އަގުލަބިއްޔަތުން ފާސްކޮށްފައިވާ ކަމަށެވެ. އެހެންކަމުން މި ހުށަހެޅުމަށް މަޖިލީހުން ފެނިވަޑައިގަންނަވާ ގޮތަކަށް ނިންމަވައިދެއްވުމަށް އެދި މަޖިލީހުގެ ތަޅުމަށް ހުށަހަޅާ ކަމަށެވެ.

އާންމު ކޮމިޓިން މަޖިލީހުގެ ތަޅުމަށް ހުށަހެޅި މި ރިޕޯޓް ފާސްކުރުމާއި ގުޅޭގޮތުން މެންބަރުންނަށް ފެނިވަޑައިގަންނަވާ ގޮތަކަށް ވޯޓު ދެއްވުމަށް ހުޅުވާލުމުން، މި ރިޕޯޓް ފާސްކުރުމަށް ވޯޓުދެއްވާފައިވަނީ 2 މެންބަރުންނެވެ. ރިޕޯޓް ފާސްކުރުމަށް ނުފެންނަ ކަމަށް 42 މެންބަރުން ވަނީ ވޯޓު ދީފައެވެ.