އިހަވަންދިއްޕޮޅުގައި ބަންކަރިންގެ ހިދުމަތް އިންވެސްޓްމަންޓެއްގެ ގޮތުގައި ކުރިއަށްގެންދާނެ - ސައީދު
12 ޑިސެމްބަރު 2023 | އަންގާރަ 05:17އެ މަޝްރޫއު ކުރިއަށްގެންދާނެ ގޮތަކާ މެދު ސަރުކާރުން ގޮތެއް ނުނިންމާ
އިކޮނޮމިކް މިނިސްޓަރު މުހައްމަދު ސައީދު (ކ) އަދި ހޯރަފުށީ ދާއިރާގެ މެންބަރު އަހުމަދު ސަލީމް (ވ)
މި ސަރުކާރުގެ އިންޓެންޝަނަކީ ބަންކަރިންގެ ހިދުމަތާއި، ދެންވެސް އިހަވަންދިއްޕޮޅު ސަރަހަދުން ދަތުރުކުރާ ބޯޓު ފަހަރަށް ދޭންޖެހޭ ހިދުމަތް އިންވެސްޓްމަންޓެއްގެ ގޮތުގައި ކުރިއަށް ގެންދިއުން ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
މިނިސްޓަރު ސައީދު މިފަދައިން ވިދާޅުވީ އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި ހޯރަފުށީ ދާއިރާގެ މެންބަރު އަހުމަދު ސަލީމް ކުރެއްވި ސުވާލަށް ޖަވާބު ދެއްވަމުންނެވެ.
މެންބަރު ސަލީމުގެ ސުވާލުގައި ވިދާޅުވެފައިވަނީ ރާއްޖޭގެ އެންމެ އުތުރަކީ އެތައް ކާގޯބޯޓުފަހަރެއް ކޮންމެ ދުވަހަކު ވެސް ރާއްޖެ ހުރަސްކޮށް ދަތުރުކުރާ ސަރަޙައްދަކަށްވުމުން، އިހަވަންދިއްޕޮޅުގައި ޓްރާންސްޝިޕްމަންޓް ބަނދަރެއް ތަރައްޤީ ކުރެވެންދެން، އެ ސަރަޙައްދުން ދަތުރުކުރާ އާގުބޯޓުފަހަރަށް ބޭނުންވާ ޚިދުމަތްތައް ޤާއިމުކުރުމަށް ނިމިދިޔަ ސަރުކާރުން އެ ސަރަޙައްދުގައި ތެޔޮ ސްޓޯރޭޖެއް ޤާއިމުކޮށް ބަންކަރިންގެ ޚިދުމަތް ފެށުމަށް ޤަތަރުގެ އާބަކޮން ޓްރޭޑިންގ އެންޑް ކޮންޓްރެކްޓިންގ ކުންފުންޏާ އެކު ސޮއިކޮށްފައިވާއިރު، އެ މަސައްކަތް އިހަވަންދިއްޕޮޅުގައި ތަރައްޤީކުރުމަށް ކުރީ ސަރުކާރުން ނިންމި ބަނދަރުގެ މަސައްކަތް ކުރިއަށް ގެންދިއުން ހުއްޓަވާލެއްވީތޯއެވެ. އަދި އެ މަޝްރޫޢު ކުރިއަށް ގެންދިއުމަށް މިހާރު ނިންމަވާފައިވާގޮތަކީ ކޮބައިތޯއެވެ.
މެންބަރުގެ ސުވާލުގެ ޖަވާބުގައި މިނިސްޓަރު ސައީދު ވިދާޅުވީ އެ ސުވާލު އަމާޒުވަނީ ބަންކަރިންގެ ހިދުމަތެއް ދިނުމަށްޓަކައި އުތުރުގެ އިހަވަންދިއްޕޮޅު ސަރަހައްދުގައި ކުރިއަށް ގެންދާ އެމްއޯޔޫއަށް ކަމަށާއި، އެ އެމްއޯޔޫގައި ސޮއިކޮށްފައި އޮތްކަމަށް މައުލޫމާތު ލިބިވަޑައިގަންނަވަނީ އެސްޓީއޯއާއެކު ގަތަރުގެ ކުންފުންޏަކުން ކަމަށެވެ. އަދި އެއްވެސް މަސައްކަތެއް ހުއްޓާލައްވާފައި ނުވާނެ ކަމަށާއި އަދި އެ މަޝްރޫއު ކުރިއަށްގެންދާނެ ގޮތަކާ މެދު ސަރުކާރުން ގޮތެއް ނުނިންމާ ކަމަށް މިނިސްޓަރު ވިދާޅުވިއެވެ. އަދި އެމްއޯޔޫ އެކްޓިވްކޮށް އޮތްކަމަށް މައުލޫމާތު ލިބިވަޑައިގަންނަވާ ކަމަށް ވެސް މިނިސްޓަރު ވިދާޅުވިއެވެ.
އިތުރު ސުވާލު ކުރުމުގެ ބައިގައި، އިކޮނޮމިކް މިނިސްޓަރުގެ ޖަވާބާއި ގުޅިގެން ހޯރަފުށީ ދާއިރާގެ މެންބަރު އަހުމަދު ސަލީމް ވިދާޅުވީ ސޮއިކުރެވުނު އެއްބަސްވުމުގައި ބުނެފައިވާ ބަންކަރިންނާއި އާގުބޯޓުފަހަރަށް ހިދުމަތް ދިނުމުގެ ކަންކަން ކުރިއަށް ގެންދަވާނެ ގޮތެއް ނުނިންމަވާ ކަމަށް މިނިސްޓަރު ވިދާޅުވެފައިވާ ކަމަށެވެ. އަދި މި ސިޔާސަތުތައް ކަނޑައަޅާނީ މިނިސްޓްރީން ކަމަށާއި އެހެންކަމުން ސަރުކާރުން އެ ކަންކަން ކުރިއަށް ގެންދިއުމުގެ ސިޔާސަތެއް ނެތްކަމަށް މެންބަރު ވިދާޅުވިއެވެ.
މީގެއިތުރުން މިބާވަތުގެ ކަމެއް ފަށަން ނަގާނީ ކުޑަ މުއްދަތެއް ކަމަށާއި ސަރުކާރުގެ ސިޔާސަތުގެތެރޭގައި އެކަން ފެށުމަށް ވަޒީރަކު ނެތީތޯ ވަނީ މެންބަރު ސަލީމް ވަނީ ސުވާލުކުރައްވާފައެވެ.
މެންބަރުގެ މި ސުވާލުގެ ޖަވާބުގައި މިނިސްޓަރު ސައީދު ވިދާޅުވީ ސަރުކާރުގެ އިންޓެންޝަނަކީ ބަންކަރިންގެ ހިދުމަތާއި، ދެންވެސް އެ ސަރަހަދުން ދަތުރުކުރާ ބޯޓު ފަހަރަށް ދޭންޖެހޭ ހިދުމަތް އިންވެސްޓްމަންޓެއްގެ ގޮތުގައި ކުރިއަށް ގެންދިއުން ކަމަށެވެ. އަދި އެމްއޯޔޫއަކީ އެސްޓީއޯއާއި ގަތަރުގެ ކުންފުންޏަކާއެކު ވެފައިވާ އެމްއޯޔޫއެއް ކަމަށާއި އެމްއޯޔޫއާއި ގުޅިގެން އެސްޓީއޯގެ މެނޭޖިންގ ޑިރެކްޓަރުގެ އަރިހުން ސާފުކުރެއްވުމުން ވިދާޅުވެފައިވަނީ ބަންކަރިންގެ ހިދުމަތް ދިނުމަށްޓަކައި ގަތަރުން ސޮއިކުރި ކުންފުނިން ޕާޓްނާޝިޕް ދެވިދާނެތޯ ބެލުމަށް ސޮއިކޮށްފައިވާ ކަމަށެވެ.
އިހަވަންދިއްޕޮޅުގައި ތެޔޮ ސްޓޯރޭޖެއް ގާއިމްކޮށް، ބައިނަލްއަގުވާމީ ބަންކަރިންގެ ޚިދުމަތް ފެށުމަށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)އިން ކުންފުންޏަކާ ހަވާލުކުރީ އޮގަސްޓް 11 ވަނަ ދުވަހުއެވެ. މި މަޝްރޫއުގެ ދަށުން އެންމެ ފުރަތަަމަ ކުރިއަށްދާނީ ފީޒިބިލިޓީ ސްޓަޑީއެއް ހެދުމެވެ. އަދި އިހަވަންދިއްޕޮޅުގައި ތަރައްގީ ކުރާ ޕޯޓް ސިޓީގައި ތެލުގެ ގައުމީ ސްޓްރެޓެޖިކް ރިޒާވެއް ހަދާނެއެވެ. މި މަސައްކަތުގެ ތެރެއިން އިހަވަންދިއްޕޮޅުގައި ފްލޯޓިންގ ސްޓޯރޭޖެއް ގާއިމްކުރުމަށް ވަނީ ރާވާފައެވެ.
ބަންކަރިން ހިދުމަތާ އެކު ޝިޕިން އެޖެންސީ، ކްރޫ ޗޭންޖް، ޝިޕް ހޭންޑްލިން ނުވަތަ ބޯޓު ފަހަރު ސާވިސް ކުރުމާއި މަރާމާތު ކުރުމާއި ސްޕެއާ ޕާޓްސް ފޯރުކޮށްދޭނެއެވެ.
އިހަވަންދިއްޕޮޅުގައި އާގުބޯޓުފަހަރަށް ޚިދުމަތް ދެވޭނެ މަގު ތަނަވަސްކުރުމަކީ އެތައް އަހަރެއްގެ އިގުތިސާދީ ހިފެހެއްޓުމަކުން މިންޖުވާނެ ކަމެއް ކަމަށް އެސްޓީއޯއިން ބުނެއެވެ.
