ކުޅުން ދަށްވެ، ޒަވީ އަށް ޕްރެޝަރު ބޮޑު ވަނީ

ސްޕެއިންގެ ބާސެލޯނާގެ ކޯޗު ޒަވީ ހެނާންޑޭޒް އަށް، ކުލަބުގެ ވެރިންގެ ޕްރެޝަރު ބޮޑުވާން ފަށާފައިވާ ކަމަށް މީޑިއާ ރިޕޯޓުތައް ބުނެފި އެވެ.

ސްޕެއިންގެ މީޑިއާ ތަކުގައި ބުނެފައިވާ ގޮތުން ޒަވީ އަށް ޕްރެޝަރު ބޮޑު ވަނީ ބާސެލޯނާގެ ކުޅުން ދަށްވުމުގެ ސަބަބުންނެވެ. ކުޅުން ދަށްވުމުގެ ސަބަބުން، ބާސެލޯނާ އަށް ނަތީޖާ ނެރުމަށް ވެސް ވަނީ އުނދަގޫވެފަ އެވެ. އެންމެ ފަހުން ސްޕެނިޝް ލީގުގައި ޖިރޯނާއާ ދެކޮޅަށް ކުޅުނު މެޗުން ވެސް ބާސެލޯނާ އަށް ވަނީ ހައިރާންވާ ނަތީޖާއެއް ލިބިފަ އެވެ. އެއާއެކު މިދިޔަ ސީޒަންގެ ސްޕެނިޝް ލީގު ވެސް ބާސެލޯނާ އަށް ކާމިޔާބު ކޮށްދިން ކޯޗު، ޒަވީ އަށް ޕްރެޝަރު ބޮޑުވެފައިވާ ކަމަށް މީޑިއާ ތަކުން ވަނީ ބުނެފަ އެވެ. ޚާއްސަކޮށް ޒަވީ ބޭނުންވާ ކަހަލަ ކުޅުންތެރިންނާއެކު ވެސް ބާސެލޯނާ އަށް ސްޕެނިޝް ލީގުގެ ތަށި ދިފާއު ނުކުރެވިދާނެ ކަމުގެ ބިރު އޮތުމުން، ޒަވީ އަށް ޕްރެޝަރު ބޮޑު ކަމަށް މީޑިއާ ތަކުން ބުނެ އެވެ.

މީގެ ކުރިން ވެސް ޒަވީ އަށް ޕްރެޝަރު ބޮޑުވެފައިވާ ކަމަށް ސްޕެއިންގެ މީޑިއާ ތަކުން ވަނީ ބުނެފަ އެވެ. ޔުއެފާ ޗެމްޕިއަންސް ލީގުގައި އެންމެ ފަހުން ބާސެލޯނާ އިން ޕޯޓޯއާ ދެކޮޅަށް ކުޅުނު މެޗުގެ ކުރިން ވެސް މީޑިއާ ތަކުގައި އެވާހަކަތައް ފެތުރުނެވެ. ނަމަވެސް، ބާސެލޯނާގެ ރައީސް ޖޯން ލަޕޯޓާ އަދި ސްޕޯޓިން ޑިރެކްޓަރު ޑެކޯ ވަނީ އެ ވާހަކަތައް ދޮގު ކުރައްވައިފަ އެވެ. އެގޮތުން ބާސެލޯނާގެ އިސްވެރިންގެ ފުރިހަމަ ތާއީދު ޒަވީ އަށް އޮންނާނެ ކަމަށާއި، އޭނާ ކުރަމުން އަންނަ މަސައްކަތަށް ކުލަބުން އެއްބާރުލުން ދޭނެ ކަމަށް ވެސް ވަނީ ބުނެފަ އެވެ. ހަމަ އެހެންމެ، ބާސެލޯނާގައި ޒަވީ ކުރަމުން އަންނަ މަސައްކަތާމެދު، ކުލަބުގެ ވެރިން ހިތްހަމަ ޖެހޭ ކަމަށް ވެސް ބުނެފައިވެ އެވެ.

އުމުރުން 43 އަހަރުގެ ޒަވީ ބާސެލޯނާގެ ކޯޗުކަމާ ހަވާލުވީ 2021 ވަނަ އަހަރު އެވެ. އެއީ ކުރިން އެ މަގާމުގައި ހުރި ނެދަލެންޑްސްގެ ރޮނާާލްޑް ކޫމަން މަގާމުން ވަކި ކުރަން ނިންމުމާއެކު އެވެ. ބާސެލޯނާ އާއެކު ޒަވީ ހަދާފައިވާ އެއްބަސްވުމުގެ މުއްދަތު ހަމަވާން އޮތީ 2024 ވަނަ އަހަރު އެވެ. ނަމަވެސް، މިއަހަރު ބާސެލޯނާ އިން ވަނީ އޭނާގެ އެއްބަސްވުން އިތުރު އެއް އަހަރަށް އައު ކޮށްފަ އެވެ. އެހެންކަމުން، ބާސެލޯނާ އާއެކު މިހާރު އޭނާ ހަދާފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ.