ތިނަދޫގެ މިހާރުގެ ކައުންސިލް ވަގުތުން ސިޓީ ކައުންސިލަށް ބަދަލުވެ ބާރުތައް ދޭން ޖެހޭ ކަމަށް ކޮމެޓީން ނިންމައިފި
11 ޑިސެމްބަރު 2023 | ހޯމަ 10:12ތިނަދުއަށް ސިޓީއެއްގެ ދަރަޖަ ދީފައިވަނީ 30 އޮގަސްޓް 2023ގައި
ގދ. ތިނަދޫ
ގދ. ތިނަދޫގެ މިހާރުގެ ކައުންސިލް ވަގުތުން ސިޓީ ކައުންސިލަށް ބަދަލުވެ އެފަދަ ކައުންސިލަކަށް ލިބިދޭ ބާރުތައް ދޭން ޖެހޭ ކަމަށް ރައްޔިތުންގެ މަޖިލީހުގެ ލާމަރުކަޒީ ކޮމިޓީން ނިންމައިފި އެވެ.
ހޯމަ ދުވަހު ކުރިއަށް ގެންދިޔަ ކޮމެޓީގައި ތިނަދޫ ސިޓީއަކަށް ވުމުން ދާއިރާތަކެއް ކަނޑައެޅި، ސިޓީ ކައުންސިލް އިދާރާއެއް ގާއިމްކުރުމާއި ގުޅޭގޮތުން ހުށަހެޅިފައިވާ މައްސަލައިގައި ގޮތެއް ވަނީ ނިންމާފައެވެ.
ރައްޔިތުންގެ މަޖިލީހުގެ ލާމަރުކަޒީ ކޮމިޓީން އެކުލަވާލި ރިޕޯޓުގައި ވަނީ، ތިނަދޫގެ މިހާރުގެ ކައުންސިލް ވަގުތުން ސިޓީ ކައުންސިލަކަށް ބަދަލުވެފައިވާ ކަމަށް ނިންމާފައެވެ. އެ ރިޕޯޓު މަޖިލީހުގެ ތަޅުމަށް ފޮނުވައި، ބަހުސްކޮށްގެން ގޮތެއް ނިންމުމަށް ކޮމިޓީގައި ބައިވެރިވެވަޑައިގެންނެވި މެންބަރުންގެ އިއްތިފާގުން ފާސްކުރި އެވެ.
އިދާރީ ދާއިރާތައް ލާމަރުކަޒީ ގޮތުން ހިންގުމުގެ ޤާނޫނުގެ 51 ވަނަ މާއްދާގެ (ނ) ގައި އޮންނަނީ އިދާރީ ދާއިރާއެއްގައި ހިމެނޭ ރަށެއް ސިޓީއެއްގެ ގޮތުގައި ކަނޑައެޅުމަށް ހުށަހަޅަނީ، އެ ރަށް ހިންގުމަށް އިންތިޚާބުކުރެވިފައިވާ ރަށު ކައުންސިލް އިންތިޚާބުވުމަށްފަހު އެހެންނަމަވެސް އެ ކައުންސިލްގެ ދައުރު ހަމަވުމުގެ ކުރިން ކަމުގައިވާނަމަ، މި މާއްދާގައިވާ ގޮތުގެމަތިން އެ ރަށަކީ ސިޓީއެއް ކަމުގައި ކަނޑައަޅައި، އެ ރަށް ސިޓީއަކަށް ބަދަލުވި ކަމުގައިވީނަމަވެސް، އެ ސިޓީ ހިންގަމުންދާނީ އެ ރަށް ސިޓީއަކަށް ބަދަލުވުމުގެ ކުރިން އެ ރަށް ހިންގުމަށްޓަކައި އިންތިޚާބުވެފައި އޮތް ރަށު ކައުންސިލުންކަމަށެވެ.
ތިނަދޫ، ސިޓީއެއްގެ ގޮތުގައި ބަލައިނުގަތް މައްސަލަ މަޖިލީހުން ބަލަމުންދާއިރު، ލޯކަލް ގަވަރމަންޓް މިނިސްޓަރު އާދަމް ޝަރީފް ވިދާޅުވީ ރިޔާސީ އިންތިޚާބުގެ ކެމްޕެއިން ދުވަަސްވަރު ތިނަދުއަށް ސިޓީގެ ދަރަޖަ ދެއްވަން އެންމެ ފުރަތަމަ ވައުދުވެވަޑައިގަތީ މިހާރުގެ ރައީސް ޑރ. މުހައްމަދު މުއިއްޒު ކަމަށެވެ. ނަމަވެސް ކުރީގެ ސަރުކާރުން އެކަން ކޮށްފައިވަނީ ބަލަންޖެހޭ ކަންކަން ނުބަލައި، ގާނޫނީ އިމުން ބޭރުން ކަމަށް މިނިސްޓަރު ވިދާޅުވިއެވެ.
ގދ. ތިނަދުއަކީ 30 އޮގަސްޓް 2023 ވީ ބުދަ ދުވަހުން ފެށިގެން ސިޓީއެއްގެގޮތުގައި ކަނޑައަޅުއްވާފައި ވަނީ، ގާނޫނު ނަންބަރު 2010/7 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު)ގެ 51 ވަނަ މާއްދާގެ (ހ)ގައި ވާ ގޮތުގެ މަތީން، ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު އެކަށައެޅުއްވި، ރައީސުލްޖުމްހޫރިއްޔާގެ ގަރާރަކުންނެވެ.
