ސާޖިދާ އާއެކު ކޮންޓްރެކްޓް ހަދައިފި، ގަޑިއިރަކަށް 75 ރުފިޔާ
މަހަކު 40 ގަޑިއަރަށް މަސައްކަތް ކުރެވޭނެ
ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު
މި މަހުގެ 7 ވަނަ ދުވަހު، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދާއެކު، މޯލްޑިވްސް ފުޑްއެންޑް ޑްރަގް އޮތޯރިޓީ (އެމްއެފްޑީއޭ) އިން ކޮންޓްރެކްޓް ހަދާ އެއްބަސްވުމުގައި ސޮއިކޮށްފައިވާ ކަމަށް ސިވިލް ސަރވިސް ކޮމިޝަންގެ ރައީސް މުހައްމަދު ނާސިހު ވިދާޅުވެއްޖެއެވެ.
މޯލްޑިވްސް ފުޑް އެންޑް ޑްރަގް އޮތޯރިޓީގައި، ސީނިއާ ސައިންޓިފިކް އޮފިސަރުގެ ވަޒީފާގައި ހުންނެވުމަށްފަހު ރައީސް ޑރ. މުއިއްޒު މަގާމުގެ ހުވާކުރެއްވުމާއެކު، އެ ވަޒީފާގައި ހިދުމަތްކުރައްވަން ހުންނަވަން ބޭނުންފުޅުވާތީ، އެ ފުރުސަތު ދިނުމުގެ ގޮތުން ސިވިލް ސާވިސް ކޮމިޝަން (ސީއެސްސީ) އިން ހާއްސަ އުސޫލެއް ހަމަޖައްސައިދޭން ނިންމި މައްސަލައިގައި ސިވިލް ސަރވިސް ކޮމިޝަންގެ މެންބަރުން ވަނީ މަޖިލީހުގެ މިނިވަން މުއައްސަސާތަކުގެ ކޮމިޓީއަށް ހާޒިރުކޮށްފައެވެ.
ކޮމިޓީގައި ވާހަކަފުޅު ދައްކަވަމުން ނާސިހު ވިދާޅުވީ މި މަހުގެ 7 ވަނަ ދުވަހު ފަސްޓްލޭޑީ ސާޖިދާ ކޮންޓްރެކްޓުގައި ސޮއިކުރައްވާފައިވާ ކަމަށެވެ. އަދި މިހާރު ހުންނެވި ވަޒީފާ 4 އަހަރު ދުވަހުގެ މުއްދަތަށް މުސާރަ ނުލިބޭގޮތަށް ވީއްލުމަށްފަހުގައި ކޮންޓްރެކްޓް ކުރިއަށް ގެންދިއުމަށް ނިންމާފައިވާ ކަމަށް ވެސް ނާސިހު ވިދާޅުވިއެވެ. ނާސިހު ވިދާޅުވީ އެ ކޮންޓްރެކްޓުގައި ފަންނީ ލަފާ ހޯއްދަވަން ބޭނުންވާ ގޮތްތައް އޮންނާނެ ކަމަށާއި މުވައްޒަފުން ތަމްރީނުކުރުމާއި ގަވާއިދުތައް ހެދުމުގައި އެހީތެރިވުމަށް ޓާމްސް އޮފް ރިފަރެންސް (ޓީއޯއާރު) ގައި ވާ ކަމަށެވެ. އަދި މަސައްކަތުގެ ގަޑީގެ ގޮތުގައި މަހަކު 40 ގަޑި އިރު މަސައްކަތް ކުރައްވާ ގޮތަށް އުޖޫރައިގެ ގޮތުގައި 75 ރުފިޔާ ކަނޑައަޅާފައިވާ ކަމަށެވެ.
ނާސިހު ވިދާޅުވީ އެ އުސޫލު މި މަހުގެ 7 ވަނަ ދުވަހުން ފެށިގެން އިފެކްޓިވް ކަމަށާއި، މިއީ ފަސްޓްލޭޑީއަށްވުމުން ހާއްސަ އުސޫލަކުން ނިންމެވި ނިންމެވުމެއް ނޫން ކަމަށެވެ. އަދި ސިވިލް ސަރވިސްގައި މަސައްކަތް ކުރާ މުވައްޒަފުންތަކެއް މިގޮތަށް ދޫކޮށްފައިވާ ތިބޭނެ ކަމަށާއި އެއީ މިނިސްޓްރީތަކުގެ ޕްރޮޖެކްޓްތަކަށް، ޕްރޮޖެކްޓުގެ މުއްދަތަށް މުސާރަ ނުލިބޭގޮތަށް ވީއްލުމަށްފަހުގައި ޕްރޮޖެކްޓުގެ ކޮންޓެރެކްޓުގެ ދަށުން މަސައްކަތް ކުރެވޭ ގޮތަށް ކަމަށް ނާސިހު ވިދާޅުވިއެވެ.
ނާސިހު ވިދާޅުވީ ގާނޫނީ ގޮތުން ބެލި އިރުގައި މިހާރު ރާއްޖޭގެ ހުރި އެއްވެސް ގާނޫނަކުން، ރައީސުލްޖުމްހުރިއްޔާގެ އަނބިކަނބަލުންނަށް މަސައްކަތް ނުކުރެއްވޭނެކަމަށް ބުނެފައި ނުވާކަމަށެވެ. އަދި ހެލްތު މިނިސްޓްރީގެ ފަރާތުން ރިކުއެސްޓް އައިސްފައި އޮތީ އެ އިދާރާއަށް ހިދުމަތްކުރުމަށް ބޭނުންފުޅުވާކަމަށް ފަސްޓް ލޭޑީ ސާޖިދާ މުހައްމަދު އެދިވަޑައިގެންފައިވާ ކަމަށެވެ.
ނާސިހު ވިދާޅުވީ މިނިސްޓްރީއިން ވެސް، ފަސްޓްލޭޑީގެ ތަޖުރިބާ މުހިންމުކަމަށްދެކޭތީ އެގޮތަށް ހުށަހަޅާފައިވާ ކަމަށާއި އެހެންކަމުން އެގޮތަށް ކުރިއަށްގެންދަން ބޭނުންވާ ކަމަށް މިނިސްޓްރީން އެދިފައިވާ ކަމަށެވެ.
ފުރަތަމަ އެދިވަޑައިގަތީ ކުރިން އަދާކުރައްވަމުން ގެންދެވި ވަޒީފާގައި ހުންނަވާ ލުއިތަކެއް ދިނުމަށް ކަމަށާއި ނަމަވެސް ވަކި މުވައްޒަފަކަށް އެގޮތަށް ލުއިތަކެއް ދެވޭގޮތަށް ގަވާއިދު ތަން ނުދޭތީ، ކޮމިޝަނުން ނިންމީ ފަސްޓްލޭޑީ ހުންނެވި ވަޒީފާ މުސާރު ނުލިބޭގޮތަށް ވީއްލުމަށްފަހުގައި ކޮންޓްރެކްޓް އުސޫލުން މަސައްކަތް ކުރެވޭނެކަމަށް ލަފާދީފައިވާ ކަމަށެވެ.
މަހަކު 40 ގަޑި އިރު މަސައްކަތް ކުރާ ގޮތަށް ގަޑި އިރަކަށް 75 ރުފިޔާގެ ރޭޓުން 30 ދުވަހަށް ބަލާނަމަ 3000 ރުފިޔާ ޖެހޭނެއެވެ. ފަސްޓްލޭޑީއަށް އިނާޔަތުގެ ގޮތުގައި ރައީސްގެ މުސާރައިގެ ތިން ބައިކުޅަ އެއް ބައި ލިބޭނެއެވެ. އެހެންކަމުން ސާޖިދާއަށް 33،330 ރުފިޔާގެ އެލަވަންސެއް ލިބޭނެއެވެ.
