އިތުރު ދެ ބޭންކަކުން ފަވަރަގެ ޚިދުމަތް ދޭން ފަށައިފި
11 ޑިސެމްބަރު 2023 | ހޯމަ 07:03ސިސްޓަމްގައި އަލަށް ބައިވެރިވީ ބީއޯސީ އަދި އެމްސީބީ
އެއްބަސްވުމުގައި ސޮއިކުރެއްވި ރަސްމިއްޔާތުގެ ތެރެއިން
އިތުރު ދެ ބޭންކަކުން ''ފަވަރަ''ގެ ޚިދުމަތް ދޭން ފަށާފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ބުނެފިއެވެ.
ހޯމަ ދުވަހު އެމްއެމްއޭއިން ބުނީ ރާއްޖޭގައި ފަސޭހަ، އަވަސް، އަދި ރައްކާތެރި ޕޭމަންޓް ޚިދުމަތެއް ފޯރުކޮށްދިނުމަށް މަގުފަހިކުރުމުގެ ގޮތުން އެ އޮތޯރިޓީން ކުރިޔަށް ގެންދާ މޯލްޑިވްސް ޕޭމަންޓް ސިސްޓަމް ޑިވެލޮޕްމަންޓް ޕްރޮޖެކްޓްގެ ދަށުން ގާއިމްކޮށްފައިވާ އިންސްޓަންޓް ޕޭމަންޓް ސިސްޓަމް (އައިޕީއެސް) – ފަވަރަގައި އިތުރު ދެ ބޭންކަކުން ބައިވެރިވެފައިވާ ކަމަށެވެ.
ސިސްޓަމްގައި އަލަށް ބައިވެރިވީ ބޭންކް އޮފް ސިލޯން (ބީއޯސީ) އަދި މޮރިޝަސް ކޮމާޝަލް ބޭންކް (މޯލްޑިވްސް) ޕްރައިވެޓް ލިމިޓެޑް (އެމްސީބީ) އެވެ. އެ ބޭންކުތަކުން ވަނީ ފަވަރަ އާއި ގުޅުމަށް ވާންޖެހޭ އެންމެފަހުގެ ތައްޔާރީތައް ފުރިހަމަކޮށް ޕައިލަޓް ޓެސްޓިންގ ނިންމާފައެވެ.
އެމްއެމްއޭއިން ބުނީ ހޯމަ ދުވަހުން ފެށިގެން، މި ދެ ބޭންކުގެ ކަސްޓަމަރުންނަށް ފަވަރަ ޓްރާންސްފަރ، ފަވަރަ ރިކުއެސްޓް، ފަވަރަ އައިޑީ އަދި ފަވަރަ ރީކޯލް ހިމެނޭހެން، ފަވަރަގެ އެންމެހާ ޚިދުމަތްތައް ލިބޭނެ ކަމަށެވެ.
ބޭންކް އޮފް ސިލޯންއާއި މޮރިޝަސް ކޮމާޝަލް ބޭންކް (މޯލްޑިވްސް) ޕްރައިވެޓް ލިމިޓެޑާއެކު، ބޭންކް އޮފް މޯލްޑިވްސް، މޯލްޑިވްސް އިސްލާމިކް ބޭންކް އަދި ސްޓޭޓް ބޭންކް އޮފް އިންޑިއާ ހިމެނޭހެން ޖުމްލަ 5 ބޭންކެއް މެދުވެރިކޮށް ފަވަރަގެ ޚިދުމަތްތައް މިހާރު ލިބޭނެއެވެ.
