ޣައްޒާގެ ކޮންމެ 10 މީހެއްގެ ތެރެއިން 9 މީހުން ތިބެނީ ނުކައިކަމަށް އދ އިން ބުނެފިއެވެ.

އދ ގެ ކާބޯތަކެއްޗާ ބެހޭ ޕްރޮގްރާމްގެ ޑެޕިއުޓީ ޑިރެކްޓަރ ކާލް ސްކައު ވިދާޅުވީ، ޣައްޒާގެ ރައްޔިތުންނަށް ބޭނުންވާ ކާބޯތަކެތީގެ ހަތަރުބައިކުޅަ އެއްބައިވެސް ފޯރުކޮށް ނުދެވޭ ކަމަށެވެ.

މުޅި ޣައްޒާގެ ކޮންމެ 10 މީހެއްގެ ތެރެއިން 9 މީހުންނަކީ މިއަދު ކާބޯތަކެތިން މަޙުރޫމުވެފައި ތިބި މީހުންކަން އޭނާ ފާހަގަ ކުރެއްވިއެވެ.

އެހެންނަމަވެސް އިސްރާއީލުން އަދިވެސް ދަނީ ހަނގުރާމަ ފުޅާކޮށް، އަސްކަރީ އޮޕަރޭޝަން ހިންގުމުގެ ނަމުގައި ޣައްޒާއާއި ހުޅަނގު އައްސޭރީގައި އެތައް އުދުވާންތަކެއް ހިންގަމުންނެވެ.

އިސްރާއީލުގެ ދިފާއީ ވުޒާރާގެ ތަރުޖަމާނާ ޙަވާލާދީ ބީބީސީގައި ރިޕޯޓު ކޮށްފައިވާ ގޮތުގައި އާންމުންގެ ތެރެއިން މީހުން ދުނިޔެ ދޫކުރުމަކީ އިސްރާއީލުން އެކަމާ ދެރަވާ ކަމެއްނަމަވެސް އެކަމުގައި އެމީހުންނަށް އިތުރު އެހެން ގޮތެއް ނެތެވެ. ނަމަވެސް މިއީ ދުނިޔޭގެ ގިނަ ޤައުމުތަކަކުން ފާޑުކިޔަމުންދާ ވާހަކައެކެވެ.

މި ހަނގުރާމައިގައި ޝަހީދުވި މީހުންގެ އަދަދުތައް މިހާރު ވަނީ 17،700ން މައްޗަށް ގޮސްފައެވެ.