މޮޅު ކުޅުންތެރިޔާގެ މަގާމަށް ވާދަކުރާނީ ސަލާހް، ހަކީމީ އަދި އޮސިމްހެން

އެފްރިކާގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމަށް ވާދަކުރާ ގަދަ ތިނެއް އިއުލާނުކޮށްފިއެވެ.

މި ފަހަރުގެ އެވޯޑަށް ވާޑަކުރަނީ ލިވަޕޫލްގެ މުހައްމަދު ސަލާހް އާއި ޕީއެސްޖީގެ އަޝްރަފް ހަކީމީ އާއި ނަޕޯލީގެ ނައިޖީރިއާ ފޯވަޑް ވިކްޓަރ އޮސިމްހެންއެވެ.

މީގެ ތެރެއިން ސަލާހް ވަނީ މި އެވޯޑް 2017 އަދި 2018 ވަނަ އަހަރި ހޯދައިފައެވެ. މިދިޔަ އަހަރުގެ އެވޯޑްގައި އޭނާ ދިޔައީ ދެ ވަނަ އަށެވެ. އެއީ ލިވަޕޫލަށް ކުޅުނު ސެނަގޯލްގެ ސާދިއޯ މާނޭގެ ފަހަތުންނެވެ.

އަޝްރަފް ހަކީމީ އަކީ މިދިޔަ އަހަރުގެ ވޯލްޑްކަޕުގެ ސެމީ ފައިނަލަށް މޮރޮކޯ ދަތުރުކުރިއިރު އެންމެ ރަނގަޅަށް ކުޅުނު އެއް ކުޅުންތެރިޔާއެވެ. އަދި އޮސިމްހެން ވަނީ ނަޕޯލީ އަށް 33 އަހަރު ތެރޭގައި ފުރަތަމަ ފަހަރަށް އިޓާލިއަން ލީގު ހޯދައިދިނުމަށް 26 ގޯލު ޖަހައިދީފައެވެ.

އަންހެން މޮޅު ކުޅުންތެރިޔާގެ މަގާމަށް ވާދަކުރަނީ ނައިޖީރިއާގެ އަސިސަޓް އޮޝައޯލާ އާއި ދެކުނު އެފްރިކާގެ ތެމްބީ އާއި ޒެމްބިއާގެ ކެޕްޓަން ބާބަރާ ބަންޑާއެވެ.