ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލްގެ ޕާސްޕޯޓު ހިފެހެއްޓި މައްސަލައިގައި، ސަރުކާރުގެ ހިމާޔަތް ހޯދުމަށް ބައްސާމް މަސައްކަތް ކުރައްވާ ކަމުގެ ތުހުމަތުކޮށްފިއެވެ.
ދިވެހި ފުލުހުންގެ އިދާރާ އިން ކުރިއަށް ގެންދާ ތަހުގީގަކާ ގުޅިގެން ކޯޓު ޙުކުމެއްގެ ދަށުން ބައްސާމްގެ ޕާސްޕޯޓު ހިފަހައްޓާފައި ވަނީ އަންގާރަ ދުވަހުއެވެ. އެ މައްސަލައިގައި ބައްސާމް ވަނީ މިނިސްޓަރ އެޓް ދަ ޕްރެޒިޑެންޓްސް އޮފީސް އާދަމް ރަމީޒާ ބައްދަލުކޮށްފައިކަން ރާއްޖެއެމްވީއަށް ވަނީ ކަށަވަރުވެފަ އެވެ. ރަމީޒަކީ ރައީސުލްޖުމްޙޫރިއްޔާ ޑރ މުޙައްމަދު މުޢިއްޒުގެ ވަރަށް އަރިސް ބޭފުޅެކެވެ. މީގެ ކުރިން މާލޭ ސިޓީ ކައުންސިލްގެ މޭޔަރުކަމުގައި ރައީސް މުޢިއްޒު ހުންނެވިއިރު ވެސް އެންމެ އަރިސްކޮށް ފެނުނީ ރަމީޒް އެވެ. އެނގިފައިވާ ގޮތުގައި ބައްސާމް މަސައްކަތް ކުރައްވަނީ ސަރުކާރު މެދުވެރިކޮށް އޭނާގެ ޕާސްޕޯޓު ހިފަހައްޓާފައި އޮތުން ބާތިލު ކުރާށެވެ.
ރާއްޖެއެމްވީ އަށް މައުލޫމާތު ލިބިފައިވާ ގޮތުގައި ދުނިޔޭގެ ފުޓުބޯޅައިގެ މައި އިދާރާ (ފީފާ) އިން އެފްއޭމަށް ދިން ދެ މިލިއަން ޑޮލަރަށް ބައްސާމް ވަނީ ޚިޔާނާތްތެރިވެވަޑައިގެންފައެވެ. އޭގެ ތެރެެއިން އެއް މިލިއަން ޑޮލަރަށް ބައްސާމް ވަނީ ޕެންޓް ހައުސްއެއް ބައްލަވައިގެންފަ އެވެ. ބައްސާމާ ދެކޮޅަށް ކުރަމުން އަންނަ ތުހުމަތުގައި ސަރުކާރު މެދުވެރިކޮށް ހިފަހައްޓާފައިވާ ޕާސްޕޯޓު ދޫކޮށްލައިފި ނަމަ، ރަމީޒަށް ވެސް ފައިސާ ދިނުމަށް ބައްސާމް ހުށަހަޅުއްވާފައިވާކަމަށް ވެސް ވަނީ މައުލޫމާތު ލިބިފައެވެ.
މީގެ ކުރިން ރިޔާސީ އިންތިޚާބުގެ ތެރޭގައި ވެސް ބައްސާމް ރައީސް މުޢިއްޒާއެކު "ޑީލެއް" ހެއްދެވި ކަމުގެ މައުލޫމާތު ވަނީ ލިބިފަ އެވެ. އެއީ ރައީސް މުޢިއްޒުގެ ކެމްޕެއިނަށް ބައްސާމް މެދުވެރިކޮށް ފައިސާ ހޯދުމަށެވެ. އެއާއެކު ވެރިކަމަށް ވަޑައިގެންނެވުމަށް ފަހު ސަރުކާރުން ބައްސާމް ބެކަޕް ކުރާ ގޮތުގެ މަތިން ކަމަށް ވެސް މައުލޫމާތު ލިބުނެވެ. އެކަމާ ގުޅިގެން އޭރު ރައީސް މުޢިއްޒުގެ ކެމްޕެއިން ޓީމާ ސުވާލު ކުރުމުން ސީދާ ވަކި ޖަވާބެއް ދެއްވާފައެއް ނުވެއެވެ. އޭގެ ބަދަލުގައި ވިދާޅުވީ ކެމްޕެއިންގެ ތެރޭގައި އެކިއެކި ފަރާތްތަކާ ބައްްދަލު ކުރައްވަމުން ގެންދަވާނެ ކަމަށެވެ.
ބައިނަލްއަޤްވާމީ އިދާރާތަކުން އެފްއޭއެމް އަށް ފޮނުވާ ފައިސާ އެ އިދާރާގެ ވެރިންނާއި އެ އިދާރާގެ ވެރިންނާ ގުޅުން އޮންނަ ފަރާތްތަކުގެ އެކައުންޓަށް ޖަމާކުރާ ކަމަށް ވެސް ތުހުމަތު ކުރެއެވެ. މައްސަލަ ތަހުގީގު ކުރަނީ އެ ފައިސާ ނަހަމަ ގޮތުގައި ބޭނުން ކުރާކަމުގެ ތުހުމަތަށެވެ. ނަމަވެސް ތުހުމަތުތަކަށް އެފްއޭއެމްއިން އިންކާރު ކުރެއެވެ.
ދާދިފަހުން ބޭއްވި ނޫސްވެރިންގެ ބައްދަލުވުމެއްގައި ޕްރޮސެކިއުޓަރ ޖެނެރަލް ހުސެއިން ޝަމީމް ވިދާޅުވީ އެފްއޭއެމްގެ ރައީސް ހިމެނޭ ގޮތަށް އެ އިދާރާގެ ވެރިންގެ މައްޗަށް ދައުވާކުރެވޭނެ ހެކި ލިބިފައިވާ ކަމަށެވެ. އެ ތަހުގީގުގައި އެންމެ އިސް ތުހުމަތު ކުރެވެނީ އެ އިދާރާގެ ރައީސް ބައްސާމް އަދީލް ޖަލީލްގެ މައްޗަށް ކަމަށް ވެސް ޕީޖީ ވިދާޅުވިއެވެ.
