މަޖިލީހުގެ މި ދައުރު 18 ވަނަ ދުވަހާ ހަމައަށް އިތުރުކުރަން ހުށަހަޅައިފި
މިއީ މި ދައުރު ދިގު ދައްމާލަން ހުށަހެޅި ދެވަނަ ފަހަރު
ރައްޔިތުންގެ މަޖިލީހުގެ ޖަލްސާގެ ތެރެއިން
ރައްޔިތުންގެ މަޖިލީހުގެ މި ދައުރު 18 ވަނަ ދުވަހާ ހަމައަށް އިތުރުކުރަން ބުދަ ދުވަހު ހުށަހަޅައިފިއެވެ.
މަޖިލީހުގެ މިއަހަރުގެ 3 ވަނަ ދައުރުގެ މުއްދަތު އިތުރުކުރުމަށް ހުށަހެޅުއްވީ ރިޔާސަތުން، މަޖިލީހުގެ ރައީސް މުހައްމަދު އަސްލަމެވެ. މީގެ ކުރިން މަޖިލީހުގެ މަސައްކަތްތައް ނިންމާ ޗުއްޓީއަށް ދިއުމަށް ނިންމާފައިވަނީ ބުރާސްފަތި ދުވަހުއެވެ.
ނަމަވެސް މަޖިލީހުގެ މަސައްކަތް ނުނިމޭތީ މަޖިލީހުގެ މި ދައުރުގެ މަސައްކަތް 18 ވަނަ ދުވަހާ ހަމައަށް ކުރިއަށް ގެންދިއުމަށް ވޯޓަށް އަހާ ގަޑީގައި އައްސަވާނެކަމަށް އަސްލަމް ވިދާޅުވިއެވެ.
27 ނޮވެމްބަރުގައި ބޭއްވި މަޖިލީހުގެ ޖަލްސާގައި މަޖިލީހުގެ މި ދައުރު ދިގުދަންމާލަން ނިންމާފައި ވަނީ 2024ގެ ބަޖެޓު ފާސްކުރުމާއި އަދި އެ ނޫންވެސް މުހިންމު މަސައްކަތްތައް ނުނިމި ހުރުމުން މަޖިލީހުގެ މަސައްކަތްތަކަށް ފުރުސަތު ދިނުމުގެ ގޮތުންނެވެ. އެދުވަހު ނެގި ވޯޓުގައި މަޖިލީހުގެ ދައުރު ދިގުދަންމާލަން ނިންމާފައި ވަނީ ވޯޓުގައި ބައިވެރިވެވަޑައިގަތް 51 މެންބަރުންގެ ވޯޓާއި އެކުގައެވެ. ދައުރު ދިގުދަންމާލުމާއި މެދު ވަކި ގޮތަކަށް ވޯޓު ނުދެއްވާ 6 މެންބަރަކު ތިއްބެވިއެވެ. އަދި ނުފެންނަ ކަމަށް އެއް މެންބަރަކު ވޯޓު ދެއްވިއެވެ.
