ސިވިލް ސަރވިސް ކޮމިޝަންގެ މެންބަރު ކަމަށް ކުރިމަތިލާން ހުޅުވާލައިފި
މި ފުރުސަތު ހުޅުވާލީ ސީއެސްސީގެ މެންބަރަކަށް ހުންނެވި ފާތިމަތު އާމިރާގެ ދައުރު ހަމަވުމާ ގުޅިގެން
ސިވިލް ސަރވިސް ކޮމިޝަން
ސިވިލް ސަރވިސް ކޮމިޝަން (ސީއެސްސީ)ގެ މެންބަރު ކަމަށް ކުރިމަތިލުމުގެ ފުރުސަތު ހުޅުވާލައިފިއެވެ.
ރައީސުލްޖުމްހޫރިއްޔާގެ އޮފީހުން ސީއެސްސީގެ މެންބަރު ކަމަށް ކުރިމަތިލާން އަންގާރަ ދުވަހު އިއުލާން ކުރީ އެ ކޮމިޝަނުގެ މެންބަރަކަށް ހުންނެވި ފާތިމަތު އާމިރާގެ ދައުރު ހަމަވުމާ ގުޅިގެންނެވެ.
ރައީސް އޮފީހުން ކުރި އިއުލާނުގައި ބުނީ، ސީއެސްސީގެ މެންބަރުކަމަށް ކުރިމަތިލާން އެދޭ ފޯމު، މި މަހުގެ 18 އަދި 19 ވަނަ ދުވަހުގެ ހެނދުނު 9:30 އިން މެންދުރު 12:30 އަށް އެ އޮފީހުން ބަލައިގަންނާނެ ކަމަށެވެ. އެ ފޯމު ރައީސުލްޖުމްހޫރިއްޔާގެ އޮފީހުގެ ވެބްސައިޓުން ޑައުންލޯޑް ކުރެވޭނެއެވެ.
ސީއެސްސީއަކީ ފަސް މެންބަރުންގެ ތިއްބަވާ އިދާރާއެކެވެ. އާމީރާގެ ދައުރު ހަމަވުމުން އެ ކޮމިޝަނުގައި މި ވަގުތު ތިއްބެވީ ހަތަރު މެންބަރުންނެވެ. އެއީ ކޮމިޝަންގެ ރައީސް މުޙައްމަދު ނާސިހާއި ނައިބު ރައީސް އިބްރާހީމް ރަޝީދުގެ އިތުރުން ކޮމިޝަންގެ މެންބަރު މުޙައްމަދު ފަރުސަތާއި ފާތިމަތު ޝަރީފެވެ.
