ރާއްޖެ އިން ފުރުންމަނާކޮށް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް ބައްސާމް އަދީލް ޖަލީލްގެ ޕާސްޕޯޓު ހިފެހެއްޓި މައްސަލައިގައި އެއްޗެއް ވިދާޅުވާން ބައްސާމް ދެކޮޅު ހައްދަވައިފަ އެވެ.
ފުލުހުން އެދިގެން ބައްސާމް ފުރުން މަނާ ކުރުމުގެ އަމުރެއް ކޯޓުން ނެރެދީފައިވާ ކަމަށް ފުލުހުން ބުނީ އަންގާރަ ދުވަހު އެވެ. އެކަމާ ގުޅިގެން ބައްސާމްގެ ބަހެއް ހޯދުމަށް ރާއްޖެ ޓީވީން ކުރި މަސައްކަތް ކާމިޔާބުވާ ގޮތެއް ނުވި އެވެ. ބައްސާމްގެ ފޯނަށް ގުޅުމުން ބިޒީކޮށްލުމަށްފަހު، މެސެޖު ކުރުމަށް ވަނީ އެދިފަ އެވެ. ޕާސްޕޯޓު ހިފަހައްޓާފައިވާ ކަމަށާއި، އެކަމާ ގުޅިގެން ވިދާޅުވާން ބޭނުންފުޅުވަނީ ކީކޭތޯ މެސެޖަކުން ދެންނެވި ނަމަވެސް، ބައްސާމް ރިޕްލައި ކުރައްވައިފައެއް ނުވެ އެވެ.
އެފްއޭއެމާ ދެކޮޅަށް ކުރާ ތުހުމަތަކީ ބައިނަލްއަޤްވާމީ އިދާރާތަކުން އެފްއޭއެމް އަށް ފޮނުވާ ފައިސާ އެ އިދާރާގެ ވެރިންނާއި، އެ އިދާރާގެ ވެރިންނާ ގުޅުން އޮންނަ ފަރާތްތަކުގެ އެކައުންޓަށް ޖަމާކުރާ މައްސަލަ އެވެ. އެ މައްސަލަ ތަހުގީގު ކުރަނީ އެ ފައިސާ ނަހަމަ ގޮތުގައި ބޭނުން ކުރާކަމުގެ ތުހުމަތަށެވެ. ނަމަވެސް ތުހުމަތުތަކަށް އެފްއޭއެމްއިން އިންކާރު ކުރެ އެވެ. އެހެން ނަމަވެސް، އެ މައްސަލަ މިހާރު އޮތީ ދަޢުވާ ކުރާ ހިސާބުގަ އެވެ.
ޕްރޮސެކިއުޓާ ޖެނެރަލް (ޕީޖީ) ޙުސެއިން ޝަމީމް ދާދި ފަހުން ވިދާޅުވެފައި ވަނީ ދެ ހަފުތާއެއްގެ ތެރޭގައި އެ މައްސަލައިގައި ދައުވާ ކުރަން ފޮނުވޭ ވަރަށް ހެކި ލިބޭނެ ކަމަށެވެ. އަދި އެ މައްސަލައިގެ މައިގަނޑު ސަސްޕެކްޓަކީ ބައްސާމް ކަމަށް ވެސް ޕީޖީ ވިދާޅުވި އެވެ. އެ ދުވަހު ޕީޖީ ވިދާޅުވީ އެފްއޭއެމުން ލިޔެ ކިޔުންތައް ބަލަހައްޓާފައި ވަނީ ވެސް އިންސާނުން އެކަން ކުރާ ގޮތަށް ނޫން ކަމަށެވެ.
އެފްއޭއްގެ މާލީ މައްސަލަ މިފަހުން ބޮޑުވެފައިވާއިރު، އެ އިދާރާގެ މުވައްޒަފުންނަށް މުސާރަ ނުދޭތާ ވެސް އެތައް މަހެއް ވެއްޖެ އެވެ. އެކަމުގެ ސަބަބުން ބައެއް މުވައްޒަފުން ވަނީ މަސައްކަތަށް ނިކުންނަން ދެކޮޅު ހަދައިފަ އެވެ. މީގެ އިތުރުން އެކި އެކި ތަންތަނުން ޚިދުމަތް ހޯދުމަށްފަހު ދައްކަން ޖެހޭ ފައިސާ އޮތީ ނުދައްކަ އެވެ. އެކަމުގެ ސަބަބުން ޝަރުއީ މަރުހަލާގެ ތެރެއިން އެފްއޭއެމާ ދެކޮޅަށް ވަނީ ޙުކުމް ވެސް ކޮށްފަ އެވެ. ނަމަވެސް، އެ ޙުކުމްތަކާ އެއްގޮތަށް އެފްއޭއެމުން ފައިސާ ދައްކާފައިވާކަން ސާފެއް ނުވެ އެވެ.
