މި ސަރުކާރުން އެ އުޅެނީ އާއިލާތަކުގެ އާމްދަނީ ލިބޭ ދޮރު ބަންދުކުރަން - އަލީ ރިޒާ
5 ޑިސެމްބަރު 2023 | އަންގާރަ 04:57ފެނިގެންދަނީ އިއްޒަތާއި ޖާހަތަށްޓަކައި މިލިއަނުން ހަރަދުކުރަމުންދާ މަންޒަރު
މިލަންދޫ ދާއިރާގެ މެންބަރު އަލީ ރިޒާ
ވެރިކަމަށް ވަޑައިގަތުމަށް ރައިސް ޑރ. މުހައްމަދު މުއިއްޒު ވެވަޑައިގެންނެވި ހުރިހާ ވައުދަކާއި ހިލާފަށް ކަންކަން ތަރުތީބުކުރައްވަމުން ގެންދަވާކަމަށް ރައްޔިތުންގެ މަޖިލީހުގެ މިލަންދޫ ދާއިރާގެ މެންބަރު އަލީ ރިޒާ ވިދާޅުވެއްޖެއެވެ.
ރައީސް ޑރ. މުހައްމަދު މުއިއްޒުގެ އެންގެވުމަށް ފެނަކަ ކޯޕަރޭޝަންގެ ގިނަ އަދަދެއްގެ މުވައްޒަފުން ވަކިކުރަމުންދާތީ އަންގާރަ ދުވަހު މަޖިލީހަށް ހުށަހަޅާފައިވާ ކުއްލި މައްސަލައަށް ބަހުސްކުރައްވަމުން މެންބަރު ރިޒާ ވިދާޅުވީ ހަތްހާސް, އަށްހާސް ރުފިޔާ ލިބޭ މުވައްޒަފުން މުޅި އާއިލާގެ ބަނޑު ފުރާނެ މުއްތިކުރަން އާމްދަނި ހޯދުމަށް އޮތް ދޮރު ބަންދުކުރަމުންދާ ކަމަށެވެ.
މި ފެނިގެންދަނީ އިއްޒަތާއި ޖާހަތަށްޓަކައި މިލިއަނުން ހަރަދުކުރަމުންދާ މަންޒަރު ކަމަށް ވެސް މެންބަރު ރިޒާ ވިދާޅުވިއެވެ.
މެންބަރު ރިޒާ ވިދާޅުވީ ރައީސް މުއިއްޒު ވައުދުވެވަޑައިގެންނެވީ ކުރީ ސަރުކާރުން ކުރި މަސައްކަތްތަކަށް އިހްތިރާމްކޮށް، މުވައްޒަފުންނަށް އަނިޔާވެރި ނުވުމަށް ކަމަށެވެ. އަދި ވައުދުވެވަޑައިގެންނެވީ އާމްދަނި ލިބޭ ވަޒީފާއެއްގައި ހުރި އެއްވެސް މުވައްޒަފަކު އެއްވެސް ރައްޔިތަކު ބާކީ ނުކުރުމަށް ކަމަށެވެ.
ނަމަވެސް 21 ދުވަސް ފުރިހަމަ ނުވަނީސް މިފެންނަނީ އޭރު ދެއްކި ވާހަކަ، އެ ވާހަކަ ދެއްކި އަނގަޔަށް އަލުން އަނބުރާ ވަންނަތަން ކަމަށެވެ. މެންބަރު ރިޒާ ވިދާޅުވީ މުވައްޒަފުންނަށް އިންޒާރުދީ ބިރު ދައްކަމުންދާ ކަމަށެވެ. އެ މުވައްޒަފުންނަކީ ރަށުގައި ތިބެގެން އާމްދަނީ ހޯދާ އާއިލާއެކު ދިރިއުޅޭވޭނެ ގޮތް ހޯދައިގެން ތިބި މުވައްޒަފުން ކަމަށާއި، ނަމަވެސް މި ސަރުކާރުން ދެއްކި ހުރިހާ ވާހަކައެއް ހަނދާން ނައްތާލާ ވި ވައުދުތައް ހަނދާން ނައްތާލައިފި ކަމަށެވެ.
