އަމާންކަން ގެއްލި، ކުށްކުރުމާއި މާރާމާރީތައް އިތުރުވަމުންދާތީ އެމްޑީޕީން ކަންބޮޑުވުން ފާޅުކޮށްފި

ދިވެހިރާއްޖޭގެ އަމާންކަން ގެއްލި، ރާއްޖޭގެ އެކި ކަންކޮޅުތަކުގައި ކުށްކުރުމާއި މާރާމާރީތައް އިތުރުވަމުންދާތީ ދިވެހިރައްޔިތުންގެ ޑިމޮކްރެޓިކް ޕާޓީން ކަންބޮޑުވުން ފާޅުކޮށްފިއެވެ.

ކުށްކުރުމާއި މާރާމާރީ އިތުރުވާތީ އެމްޑީޕީގެ ފަރާތުން ނެރުނު ނޫސްބަޔާނުގައި ބުނެފައިވަނީ ދިރިއުޅޭ ހިޔާވަހީގެ ރައްކާތެރިކަމާއި، މަގުތަކުގެ އަމާންކަން ގައުމުގައި ގާއިމުނުކުރެވުމަކީ އެ ޕާޓީއަށް ބަލައިގަނެވޭނެ ކަމެއް ނޫންކަމަށެވެ. އަދި އެމްޑީޕީން ވަކާލާތުކުރާ، އަބުރުވެރި ދިރިއުޅުމަކަށް ގެދޮރުގެ ހުރުމަތް ކޮންމެ ރައްޔިތަކަށް ކަށަވަރުކޮށްދޭން ޖެހޭނެ ކަމަށެވެ. އަމާން ރާއްޖެއެއްގެ ހިޔާދަށުގައި، ފިކުރުބޮޑުނުވާ ދިރިއުޅުމެއްގެ އުފާ ލިބެންވާނެ ކަމަށެވެ.

މާޒީގައިވެސް، ޕީޕީއެމް-ޕީއެންސީގެ ވެރިކަން ބައްޓަންކުރީ އެމްޑީޕީގެ އަސާސްތަކާ ނުކިއްސަރުކޮށް ކަމަށާއި، ޕީޕީއެމްގެ ފުރަތަމަ ސަރުކާރުގައިވެސް މަގުތައް ނާމާންވެ، ގެދޮރުގެ ހަތަރު އިންފާރަކީ އަމިއްލަ ނަފްސުގެ ރައްކާތެރިކަން ކަށަވަރުނުކުރެވޭ ތަންތަނަށް ވެގެންދިޔަ ކަމަށެވެ. އަދި އެ ޕާޓީއަށް ފެންނަ ފެނުމުގައި، މި ސަރުކާރުގެ އަމަލުތައްވެސް ހުރީ އެމަގުން ކަމަށް ބުނެފައިވެއެވެ.

އެމްޑީޕީގެ ބަޔާނުގައި ބުނެފައިވަނީ، މިއަދާ ހަމައަށްވެސް ގައުމުގެ އަމަން ބެލެހެއްޓުމުގެ ޒިންމާ މަތިކޮށްފައިވާ ފުލުހުންގެ ޚިދުމަތަށް އިސްވެރިޔަކު އައްޔަންކޮށްފައި ނުވާކަމަށެވެ. މިއީ ފުލުހުންގެ ޒިންމާތައް އެންމެ ފުރިހަމައަށް އަދާކުރުމަށް އޮތް ހުރަހެއް ކަމަށެވެ. އަދި ކޮމިޝަނަރަކު އައްޔަނު ކުރުން (ޕޮލިސް ބޯޑު މެދުވެރިކޮށް) ވީ އެންމެ އަވަހަށް ފެށުމަށް ސަރުކާރަށް ވަނީ ގޮވާލާފައެވެ.

އެމްޑީޕީގެ ނިމިގެންދިޔަ ދައުރަކީ، ފާއިތުވި 15 އަހަރު ތެރޭގައިވެސް ދިވެހިރާއްޖޭގައި އެންމެ ކުށް މަދުކުރެވުނު ފަސް އަހަރުކަމަށް ބުނެފައިވެއެވެ. އެއީ އަމާންކަން ނެގެހެއްޓުމަކީ ދައުލަތުގެ އެންމެ އިސް ޒިންމާކަމުގައި ދެކި، ގިނަ މުއައްސަސާތަކެއް ގުޅިގެން ރޭވުންތެރިކަމާއެކު ކުރެވުނު މަސައްކަތުގެ ނަތީޖާ ކަމަށްވެސް ބަޔާނުގައި ބުނެފައިވެއެވެ. އަދި ޑރ. މުހައްމަދު މުއިއްޒުގެ ސަރުކާރަށް، ރައްޔިތުންގެ ރައްކާތެރިކަން ކަށަވަރުކޮށްދީ، ބިރުވެރިކަމެއް ނެތި އުޅެވޭނެ މުޖުތަމައެއް ގާއިމުކޮށްދިނުމަށް ވަނީ ގޮވާލާފައެވެ.