މީހަކު ރަހީނުކޮށް އޭނާލައްވާ މަސްތުވާތަކެތި ވިއްކާ އިނގިލި ބުރިކޮށްލި މައްސަލައިގައި ހައްޔަރުކުރި އެމްއެންޑީއެފްގެ ދެ އޮފިސަރުންނާއި 3 ކުޑަކުދިން ހިމެނޭ މައްސަލައިގެ ޝަރީއަތް ފަށައިފިއެވެ.

2024 މެއި 25 ވަނަ ދުވަހުން ފެށިގެން 2024 ޖޫން 25 ވަނަ ދުވަހާއި ހަމައަށް މަލޭގެ ގެއެއްގެ ތެރޭގައި ހުއްދަ ނޫން ގޮތުގައި މީހަކު ހިފަހައްޓައި، އޭނާއަށް ބިރުދައްކައި އޭނާއަށް މަޖުބޫރުކުރުވައިގެން އޭނާލައްވާ މަސްތުވާތަކެތީގެ ވިޔަފާރި ކުރުވައި، އޭނާއާއި މެދު މާރާމާރީ ހިންގައި، އޭނާއަށް ޖިސްމާނީގޮތުން ބޮޑެތި އަނިޔާތައްދީ އޭނާގެ ވާތު ކުޑަވައި ބުރިކޮށްލާފައިވެއެވެ. މި މައްސަލައިގައި އަނިޔާ ލިބިފައިވަނީ 30 އަހަރުގެ ދިވެހި ފިރިހެނަކަށެވެ.

ޝިފާއު ވިދާޅުވީ މި މައްސަލައިގެ ތުހުމަތުގައި 5 މީހަކު ހައްޔަރުކޮށްފައިވާ ކަމަށެވެ.

މި 5 މީހުންގެ ތެރެއިން 4 މީހަކު ޝަރީއަތް ނިމެންދެން ބަންދުގައި ބޭތިއްބުމަށް ކްރިމިނަލް ކޯޓުން އަމުރުކޮށްފައިވާއިރު ނަފާހު ތަހުގީގު ނިމެންދެން ބަންދުކުރުމަށް އަމުރުކޮށްފައިވެއެވެ. މި މައްސަލައިގައި އުމުރުން 18 އަހަރު ނުފުރޭ ކުޑަ 3 ކުދިން ބައިވެރިވެފައިވެއެވެ. މި މައްސަލައިގައި ހިމެނޭ މުހައްމަދު ނަފާހުއާއި ޒަޔާން އަކީ އެމްއެންޑީއެފްގެ ވަޒީފާ އަދާކުރަމުންދާ ދެމީހުންނެވެ.

މައްސަލައިގައި ތުހުމަތުގައި ހިމެނޭ ސާމީ، ސައިފް އަދި ނައުޝާން އަކީ މަސްތުވާތަކެތި ގެންގުޅެ ބޭނުންކުރާ މީހުން ކަމަށާއި، އަނެއް ދެމީހުންނަކީ ކުށުގެ ވެށީގައި އުޅޭ މީހުންނެވެ.

މި މައްސަލައިގެ ޝަރީއަތް ފެށީ ބުރާސްފަތި ދުވަހުއެވެ. ޝަރީއަތުގެ އަޑުއެހުމުގައި ދައުލަތުގެ ފަރާތުން ވަނީ މި މީހުން ކުރި އަނިޔާތަކުގެ ތަފްސީލު ހިއްސާކޮށްފައެވެ. އެގޮތުން އެހީއަށް ބޭނުންވާ މީހަކަށް އެކަށީގެންވާ ސަބަބެއް ނެތި އެހީތެރިކަން ފޯރުކޮށްނުދީ ހިފެހެއްޓުމާއި، ޕަވަރ ޓޫލްއެއް ބޭނުންކޮށްގެން އިނގިލި ބުރިކޮށްލުން ހިމެނެއެވެ. އެީ ތޫނު ހަތިޔާރެއް ބޭނުންކޮށްގެން އޭނާގެ ވައަތު ކުޑަވާ އިނގިލީގެ 2 ވަނަ ބަނދައިން ފެށިގެން ބުރިކޮށްލާފައިވުމެވެ. އަދި އެމީހާގެ ވައަތު ލޯމަތީގައި ޖަހާ މާރާމާރީ ހިންގުމާއި، ހަށިގަނޑުގެ އެކިތަންތަނުގައި އަލިފާން ޖެއްސުމާއި، ތަޅާ އަނިޔާކުރުމުގެ ނިޝާންތައް ފެންނަން ހުއްޓެވެ.

ބުރާސްފަތި ދުވަހުގެ އަޑުއެހުމުގައި ދައުވާ އުފުލާފައިވާ މީހުން ވަނީ ދައުވާތަކަށް އިންކާރުކޮށްފައެވެ. އަދި އަނިޔާ ލިބުނު މީހާ ފުރަތަމަ ހެއްކެއްގެ ގޮތުގައި ހާޒިރުކުރުމަށް އެދިފައިވާ އިރު މި މީހުންގެ ތެރެއިން އެކަކު ވަނީ އޭނާގެ ލޯބިވެރިޔާ ދިފާއި ހެއްކެއްގެ ގޮތުގައި ހުށަހަޅާފައެވެ. ދެން އޮންނަ އަޑު އެހުމެއްގައި ދައުލަތުގެ ހެކިން ހާޒިރުކުރާނެއެވެ.

ފުލުހުން ބުނެފައިވަނީ މިހާތަނަށް ބެލިބެލުމުން ފާހަގަކުރެވިފައިވަނީ މި މައްސަލައަކީ މަސްތުވާތަކެތީގެ މުއާމަލާތްތަކާއި ގުޅިގެން ހިންގާފައިވާ ކަމެއް ކަމާއި، އަދި އަނިޔާ ލިބުނު ފަރާތް މެދުވެރިކޮށް މަސްތުވާތަކެތީގެ ވިޔަފާރިކުރުވާ ކަމަށް ފާހަގަކުރެވިފައިވާ ކަމަށެވެ. އަދި އެޕާޓްމަންޓުން މަސްތުވާތަކެތީގެ ވިޔަފާރިކުރުމަށް ބޭނުންކުރާ ސާމާނު ފެނިފައިވާ ކަމަށް ވެސް ފުލުހުން ބުނެފައިވެއެވެ.