ސަމީރު ފުލުހަށް ހާޒިރުވުމަށް އަންގައިފި
ފުލުސް އޮފީހަށް ހާޒިރުވުމަށް އަންގާފައިވަނީ ޖުލައި 28 ވަނަ ދުވަހު
ސަމީރު ރާއްޖެޓީވީ ޕްރޮގްރާމެއްގައި ވާހަކަދައްކަނީ
ޖުމްހޫރީ ޕާޓީގެ ސެކްރެޓަރީ ޖެނެރަލް އަހުމަދު ސަމީރު ފުލުސް އޮފީހަށް ހާޒިރުވުމަށް އަންގައިފިއެވެ.
ސަމީރު ފުލުސް އޮފީހަށް ހާޒިރުވުމަށް އަންގާފައިވަނީ ޖުލައި 28 ވަނަ ދުވަހުގެރޭ 20:00 ގައެވެ.
ސަމީރު ފުލުސް އޮފީހަށް ހާޒިރުވުމަށް އަންގާފައި ވަނީ ޖުމްހޫރީ ޕާޓީގެ ޖަގަހަ އާއި އޮފީސް ބަލައި ފާސްކުރަމުންދިޔައިރު، ފުލުހުންގެ މަސައްކަތަށް ހުރަސްއަޅައި ކޯޓުން ފުލުހުންނަށް ދިން އަމުރު ތަންފީޒުކުރުމަށް ހުރަސް އެޅިކަމަށް ބުނެއެވެ.
ކޯޓު އަމުރު ނެރެފައި ވަނީ ޖުމްހޫރީ ޕާޓީ އާއި އެމްޑީޕީ އާއި އަދާލަތު ޕާޓީ އާއި އަދި މިނޫން ވެސް ބައެއް ފަރާތްތަކުން އިސްކޮށް ތިބެ ދިވެހިރާއްޖޭގައި ޤާނޫނީ ގޮތުން އުފެދިފައިވާ ސަރުކާރު ހިންގުމަށް ދަތިކުރުމާއި، ސަރުކާރު ވައްޓާލުމަށް ސައްލާކޮށް، ރާވާއި، އަދި ރައްޔިތުން މަޖިލީހުން ކުރާ ރަސްމީ މަސައްކަތްތަކަށް ހުރަސް އެޅުމަށް މަސައްކަތްކުރަމުންދާ ކަމަށް ތުހުމަތުކުރެވޭތީ ކުނޫޒް ބަލައި ފާސްކުރުމަށެވެ.
މި އަމުރުގައިވާ ގޮތުން ކުނޫޒުން ބަލައި ފާސްކުރަން ހަމަޖެހިފައި ވަނީ ސަރުކާރު ބަދުނާމުވާ ގޮތަށް ލިޔެފައިވާ ލިޔެކިޔުންތަކާއި ބެނާތަކާއި ފޮތިތަކާއި އަދި ސީސީޓީވީ ފޫޓޭޖްއެވެ. އަދި ކޯޓް އަމުރުގައި ބުނެފައިވަނީ ކުނޫޒް ބަލައި ފާސްކުރުމަށް ހަމަޖެއްސީ ފުލުހުންގެ އިންޓެލިޖަންސްއަށް ލިބުނު ސިއްރު މައުލޫމާތަކާއި ގުޅިގެން ކަމަށެވެ.
ކުނޫޒް ބަލައި ފާސްކުރަން ކްރިމިންލް ކޯޓުން ނެރެފައި ވަނީ 72 ގަޑިއިރުގެ ކޯޓް އަމުރެކެވެ. އަންގާރަ ދުވަހުގެ ރޭ 5 ގަޑިއިރު ވަންދެން ބަލާ ފާސްކުރުމަށް ފަހު ފުލުހުން ދިން ލިޔުމުގައި ބުނެފައި ވަނީ މައްސަލައާ ގުޅޭ އެއްވެސް އެއްޗެއް އެތަނުން ފެނިފައި ނުވާ ކަމަށެވެ. ނަމަވެސް އޭގެ ފަހުން ވެސް އެތަން ހުރީ ފުލުހުންގެ ބެލުމުގެ ދަށުގައެވެ.
