ވިހެއުމަށްފަހު، ކޮތަޅަކަށް ލައި ކުނިގޮނޑަށް އެއްލާލާފައި އޮތް ތުއްތު ކުއްޖަކު ފެނިއްޖެ

އދ. ދިގުރަށުގައި ވިހެއުމަށްފަހު ތުއްތު ކުއްޖަކު ކޮތަޅަކަށް ލާފައި އެރަށު ކުނިގޮނޑަށް އެއްލާލާފައި އޮއްވައި ފެނިއްޖެއެވެ.

ފުލުހުން ބުނީ، އދ. ދިގުރަށުގައި ވިހެއުމަށްފަހު ކޮތަޅަކަށް ލައި އެއްލާލާފައި އޮތް ތުއްތު ކުއްޖަކު އެރަށު ކުނިގޮނޑުން ފެނިފައިވާކަމުގެ މަޢުލޫމާތު އާދީއްތަ ދުވަހުގެ ހެނދު 09:20 އެހާކަންހާއިރު ފުލުހުންނަށް ލިބިފައިވާކަމަށެވެ.

އަދި މި މައްސަލައާ ގުޅިގެން ފުލުހުންގެ ޓީމެއް އެ ރަށުގައި މިހާރު ދަނީ ހަރަކާތްތެރިވަމުންނެވެ.

މީގެ އިތުރުން، ކުއްޖާ މަރުވެފައިވާކަމަށް ކުއްޖާ ބެލި ޑޮކްޓަރު ވަނީ ފުލުހުންނަށް މައުލޫމާތު ދީފައެވެ.

މި މައްސަލައާ ގުޅޭ އިތުރު މަޢުލޫމާތު ލިބޭ މިންވަރަކުން ހިއްސާ ކުރަމުންދާނެކަމަށް ފުލުހުން މައުލޫމާތުދެއެވެ.

ރަށުން މައުލޫމާތު ދިން މީހަކު ކިޔާދިން ގޮތުގައި އެކުއްޖާ ފެނިފައިވަނީ ގޮނޑަށް ގޮސް، ކުނި ވަކިކުުރުމުގެ ތެރޭގައި އުޅުނު ބަޔަކަށެވެ. ކުއްޖާ އޮތީ 3 ކަޅު ކޮތަޅަށް ލާފައިކަމަށް އެ ރަށުން މީހަކު ރާއްޖެއެމްވީއަށް ކިޔާދިނެވެ.

މިހާރު ފުލުހުން ވަނީ އެ ސަރަޙައްދު ބަންދުކޮށްފައެވެ.