ސައުދީ ޕްރޯ ލީގުގައި އަލް ނަސްރާ ދެކޮޅަށް ކުޅުނު މެޗުން ލިބުނީ މުހިންމު މޮޅެއް ކަމަށާއި، ނަމަވެސް ކުރަން ޖެހޭ މަސައްކަތް ބޮޑު ކަމަށް އަލް ހިލާލްގެ ކޯޗު ޖޯޖު ޖީސަސް ބުނެފި އެވެ.
އަލް ނަސްރު އަތުން މޮޅުވެ، އެއް ވަނައިގަައި ހަތް ޕޮއިންޓުގެ ލީޑު ނެގި މެޗަށްފަހު ވާހަކަ ދައްކަމުން ޖީސަސް ބުނީ، އަލް ހިލާލްގެ ކުޅުންތެރިން އަދި ސަޕޯޓަރުންނަށް މަރުޙަބާ ކިޔަން ބޭނުންވާ ކަމަށެވެ. އޭނާ ބުނީ އަލް ނަސްރާ ދެކޮޅަށް ކުޅުނު މެޗުން އަލް ހިލާލަށް ލިބުނީ ލީގުގައި ކުރިއަށް ދާން ވަރަށް މުހިންމު މޮޅެއް ކަމަށެވެ. ނަމަވެސް، އެ މޮޅާއެކު އިތުރު އެހެންކަމެއް ހާސިލުނުވާކަން ފާހަގަކޮށް އޭނާ ބުނީ، ކުރިއަށް އޮތް ތަނުގައި ކުރަން ޖެހޭ މަސައްކަތް މާބޮޑު ކަމަށެވެ. އެގޮތުން ސައުދީ ލީގުގައި ކުރިއަށް ހުރި ކޮންމެ މެޗަކީ ވެސް އެ ޓީމަށް މުހިންމު މެޗެއްގެ ގޮތުގައި ޖީސަސް ވަނީ ފާހަގަކޮށްފަ އެވެ.
އިތުރަށް އޭނާ ބުނީ އެ މެޗަކީ ފެންވަރު ރަނގަޅު، މޮޅު ދެ ޓީމުގެ މެދުގައި ކުޅެވުނު މެޗެއް ކަމަށެވެ. އެގޮތުން ދެ ޓީމުގައި ވެސް ތިބީ ވަރަށް ހުނަރުވެރި މޮޅު ކުޅުންތެރިން ކަމަށް ވެސް އޭނާ ބުންޏެވެ. އަނެއްކޮޅުން މެޗުގެ ފަހު ކަށިގަނޑާ ހަމައަށް ވެސް ދެ ޓީމުގެ ފަރާތުން ފެނުނީ ވާދަވެރި ކުޅުމެއްކަން ފާހަގަކޮށް އޭނާ ބުނީ، ސައުދީ ލީގުގެ ޓީމުތައް ދުވަހަކުން ދުވަހަށް އަންނަނީ ވަރުގަދަވަމުން ކަމަށެވެ. އޭނާ ބުނީ މެޗުގައި ރެފްރީގެ ނިންމުތައް އައި ގޮތާ ގުޅޭ ގޮތުން އެއްޗެއް ބުނަން ބޭނުން ނުވާ ކަމަށާއި، އަބަދު ވެސް ރެފްރީގެ ނިންމުމަށް އިހުތިރާމް ކުރަން ވާނެ ކަމަށެވެ.
މީގެ އިތުރުން އޭނާ ބުނީ ދެން މަސައްކަތް ކުރަން އޮތީ ކުރިއަށް އޮތް އޭއެފްސީ ޗެމްޕިއަންސް ލީގުގެ ގުރޫޕް ސްޓޭޖުގެ މެޗަށް ކަމަށެވެ. އެއަށްފަހު ލީގު މެޗުތަކަށް ސަމާލުކަން ދޭނެ ކަމަށް ވެސް އޭނާ ވަނީ ބުނެފަ އެވެ.
