ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، ޗައިނާގެ ފަސްޓް ވައިސް ޕްރެމިއާ ޑިންގް، ޝުއެޝިއެންގް އާއި ބައްދަލުކުރައްވައިފި އެވެ.
އެކުވެރި ޢަރަބި އިމާރާތުގެ ދުބާއީގައި ކުރިއަށްދާ ކޮޕް 28 ކޮންފަރެންސްގެ ހަވާސާގައި ރައިސް އާއި ޑިންގް ކުރެއްވި މި ބައްދަލުކުރެއްވުމުގައި ދެ ބޭފުޅުން ވަނީ ރާއްޖެ އާއި ޗައިނާ ދެމެދު އޮތް ދުވަސްވީ ގުޅުން އިތުރަށް ބަދަހިކުރެވޭނެ ގޮތްތަކާބެހޭގޮތުން މަޝްވަރާކުރައްވާފަ އެވެ.
އެގޮތުން ޗައިނާ އަކީ ރާއްޖޭގެ ތަރައްގީގެ އެންމެ މުހިންމު އެއް ބައިވެރިޔާކަން ފާހަގަ ކުރައްވަމުން ރައީސް މުއިއްޒު ވިދާޅުވީ ރާއްޖޭގެ ތަރައްޤީއާއި ކުރިއެރުމަށް ޗައިނާއިން ވެދެއްވަމުން ގެންދަވާ އެހީތެރިކަން ކުރިމަގުގައި އިތުރު ވެގެންދާނެކަމަށް އުންމީދުކުރައްވާ ކަމަށެވެ.
މި ބައްދަލު ކުރެއްވުމުގައި ވާހަކަ ދައްކަވަމުން ޑިންގް ޝުއެޝިއެންގް ވަނީ އެންމެ ފުރަތަމަ ކަމަކަށް ވެސް ރައީސް މުއިއްޒުގެ ދައުރަށް މަރްޙަބާ ދަންނަވާފަ އެވެ. އަދި ޗައިނާ އިން އަބަދުވެސް ރާއްޖެއާ އެކު ބަދަހި ގުޅުން ބާއްވަވާނެކަމުގެ ޔަގީންކަން ޑިންގް އެރުވި އެވެ.
ދެ ބޭފުޅުން ވެސް ވަނީ ރާއްޖެ-ޗައިނާގެ ގުޅުން މިހާރަށް ވުރެ އިތުރަށް ވަރުގަދަވާނެ ކަމަށް އުންމީދުކުރައްވާ ކަމަށް ވިދާޅުވެފަ އެވެ.
