މަސްތުވާތަކެތި ޓްރެފިކް ކުރި މީހަކު ޝަރުތުތަކާއެކު ބަންްދުން ދޫކޮށްލައިފިއެވެ.
ބަންދުން ދޫކޮށްލާފައިވަނީ މަސްތުވާތަކެތި ޓްރެފިކް ކުރިކަމުގެ ތުހުމަތުގައި ހައްޔަރުކޮށްފައިވާ އުމުރުން 28 އަހަރުގެ ދިވެހި އަންހެނެކެވެ. އޭނާ ބަންދުން ދޫކޮށްލުމަށް އަމުރުކޮށްފައިވަނީ ފުލުހުން ބަންދުން ދޫކޮށްލުމުގެ އަމުރަކަށް އެދުމުންނެވެ.
އޭނާ ބަންދުން ދޫކޮށްލަން އަމުރުކޮށްފައިވަނީ ޝަރުތުތަކާއެކުއެވެ. ބަންދުން ދޫކޮށްލުމަށް އަމުރުކުރި ސަބަބުގެ ގޮތުގައި ބުނެފައިވަނީ ތުހުމަތުކުރެވޭ މިންވަރަށް ހެކި ހުށަހެޅިފައިވީނަމަވެސް، ދެފަރާތުން ދެއްކި ވާހަކަތަށް ބަލާއިރު އަދި ހުށަހެޅިފައިވާ ހެކި ގަރީނާއިން ނިއުޅިފައިވާ ކަންކަމަށް ބަލާއިރު، ޝަރީއަތްކުރުމާއި ބެހޭ ޖިނާއީ އިޖްރާއަތު ގަވާއިދުގެ 13 ވަނަ މާއްދާގެ (ނ) އަށް ރިއާޔަތްކޮށް ބަންދުން ދޫކޮށްލިޔަސް މުޖްތަމައުގެ ސަލާމަތަށް ނުރައްކަލެއް ކުރިމަތިވެދާނެ ސަބަބެއް އޮތްކަމަށް ނުފެންނާތީ ޝަރުތު ކުރުމަށްފަހުއެވެ.
ބަންދުން ދޫކޮށްލާފައިވާއިރު، މި މައްސަލައިގައި އޭނާ ވަނީ 5 ފަހަރަށް ކޯޓަށް ހާޒިރުކުރެވިފައެވެ. އަދި އޭނާ ބަންދުން ދޫކޮށްލިނަމަވެސް މި މައްސަލައިގައި އޭނާގެ މައްޗަށް ދައުވާކުރުމަށް ހުރަހެއް އޮތްކަމަށް ނުފެންނަ ކަމަށް ބުނެފައިވެއެވެ.
މީގެ އިތުރުން އޭނާ ހައްޔަރު ބަންދު ރިކޯޑް އޮތްކަމަށް ބަޔާންކުރި ނަމަވެސް، އޭނާގެ ހައްޔަރު ބަންދު ލޮގަށް ބަލާއިރު އެންމެ ފަހުން އޮތީ 2015 ވަނަ އަހަރުގެ އެއް ރެކޯޑް ކަމަށާއި، އެއީ މަސްތުވާތަކެތި ބޭނުންކުރުމުގެ ރެކޯޑެއް ކަމަށް ބުނެފައިވެއެވެ. އަދި މި މައްސަލައަށް ބަލާއިރު މި މައްސަލައިގެ ޕްރައިމަރީ ޓާގެޓަކީ އޭނާ ނޫން ކަމަށް ވެސް އަމުރުގައި ބުނެފައިވެއެވެ.
އަދި ފުލުހުން ހުށަހަޅާފައިވާ ހެކި ބަޔާންތަކަށް ބަލާއިރު، ބަލާފާސްކުރެވުނު ތަނުން ފެނުނު ތަކެއްޗަކީ އޭނާގެ އެއްޗެއް ނޫންކަމަށް ދެން މި މައްސަލައިގައި ހައްޔަރުކުރެވިފައިވާ މީހާގެ ތަކެތިކަމަށް ބުނެފައިވެއެވެ. އަދި އޭނާ އަކީ މަސްތުވާތަކެތި ބޭނުންކުރާ މީހެއްކަމަށް އިންކާރުކޮށްފައި ނުވުމާއި، މަސްތުވާތަކެތި އަތުލައިގަނެވުނު ގެއަށް އޭނާ ދިޔައީ ދައުވަތަކަށް ކަމަށް ބުނެފައިވެއެވެ.
