ފުށިދިއްގަރުފަޅަކީ މިވަގުތަށް ބޭނުންވާ ތަނެއް ނޫން، އެއީ ސީދާ ރައްޔިތުންގެ ފައިސާ ބޭކާރު ކުރުން: އާޒިމް
1 ޑިސެމްބަރު 2023 | ހުކުރު 06:23ރައްޔިތުންގެ ފައިސާ އިން ކުރަންޖެހޭނީ ރައްޔިތުންނަށް އަވަހަށް ފަސޭހަވާ ކަންތައްތައް
އެމްޓީސީސީގެ ކުރީގެ ސީއީއޯ އާދަމް އާޒިމް
ފުށިދިއްގަރުފަޅަކީ މިވަގުތަށް ބޭނުންވާ ތަނެއް ނޫން ކަމަށާއި އެއީ ސީދާ ރައްޔިތުންގެ ފައިސާ ބޭކާރު ކުރުން ކަމަށް އެމްޓީސީސީގެ ކުރީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް މިފަދައިން ވިދާޅުވީ މާލެސިޓީގެ މޭޔަރު ކަމަށް ކުރިމަތިލެއްވުމަށް އެމްޑީޕީ ޕްރައިމަރީއަށް ބުރާސްފަތި ދުވަހު ފޯމް ހުށަހަޅުއްވަމުންނެވެ.
އާޒިމް ވިދާޅުވީ މިވަގުތު މުހިންމީ ރައްޔިތުންނަށް އުޅެވޭނެ ގޮތް ހަދައިދިނުން ކަމަށާއި ރައްޔިތުން މާލޭގައި އުޅޭ ދަތިހާލުން ސަލާމަތްކޮށްދޭން ކުރެވޭނެ ކަމަކީ، ގުޅީފަޅާއި ގިރާވަރު ފަޅާއި އުތުރުތިލަފަޅު ތަރައްޤީ ކުރުން ކަމަށެވެ.
އަދި، އެ ތިން ރަށް ގުޅާލަން ބުރިޖު ވެސް އެޅޭނެ ކަމަށާއި އެހެންނަމަވެސް ފުށިދިއްގަރުފަޅަށް ބުރިޖު އެޅުމަކީ ކުރެވޭނެ ކަމެއް ނޫންކަމަށް އާޒިމް ވިދާޅުވިއެވެ.
ރައްޔިތުންގެ ފައިސާ އިން ކުރަންޖެހޭނީ ރައްޔިތުންނަށް އަވަހަށް ފަސޭހަވާ ކަންތައްތައް ކަމަށް އާޒިމް ވިދާޅުވިއެވެ. އަދި އެ ނޫން ގޮތަކަށް ފައިސާ ޚަރަދުކޮށްގެން ނުވާނެ ކަމަށް ވެސް ވިދާޅުވިއެވެ.
އާޒިމް މިފަދައިން ވިދާޅުވެފައިވާއިރު ކުރިއަށް އޮތް 30 ދުވަސް ހަމަވުމުގެ ކުރިން، ފުށިދިއްގަރުފަޅު ހިއްކުމުގެ ޢަމަލީ މަސައްކަތް ފެށޭނެ ކަމަށް ރައީސް ޑރ.މުހައްމަދު މުއިއްޒު ވަނީ ވިދާޅުވެފައެވެ.
ފުށިދިއްގަރުފަޅު ހިއްކުމުގެ ޢަމަލީ މަސައްކަތް ފަށާގޮތަށް، ގާތްގަނޑަކަށް 8 މަސް ދުވަހުގެ ތެރޭގައި މަސައްކަތް ނިމޭނެ ކަަމަށް ލަފާކުރެވޭ ކަމަށް ރައީސް ވަނީ ވިދާޅުވެފައެވެ.
