ރައްޔިތުންގެ އިތުބާރު ހޯދުމަށް ދެ ފުށްފެންނަ ގޮތަށް މަސައްކަތްތައް ކުރަންޖެހޭ: މޭޔަރ ޢާޒިމް
26 ޖޫން 2025 | ބުރާސްފަތި 04:28މާލެ ސިޓީ ކައުންސިލްގެ އަމާޒަކީ، ދެ ފުށްފެންނަ، ރައްޔިތުން އެންމެ އިތުބާރުކުރާ ރާއްޖޭގެ އެންމެ ނަމޫނާ ކައުންސިލަށް މާލެ ސިޓީ ކައުންސިލް ހެދުން
މާލެ ސިޓީ މޭޔަރ އާދަމް ޢާޒިމް
މާލެ ސިޓީ ކައުންސިލާ މެދު، ރައްޔިތުންގެ އިތުބާރު ބޮޑުކުރުމަށް ޓަކައި، މިހާރު ކުރަންޖެހޭ އެންމެ މުހިންމު އެއް މަސައްކަތަކީ، ދެ ފުށްފެންނަ ގޮތަށް މަސައްކަތްތައް ކުރުން ކަމަށް، މޭޔަރ އާދަމް ޢާޒިމް ވިދާޅުވެއްޖެއެވެ.
މޭޔަރ ޢާޒިމް މި ފަދައިން ވިދާޅުވީ، ވިސްޓްލްބްލޮވިންގް އަށް، މާލެ ސިޓީ ކައުންސިލްގެ އިސްވެރިންނާއި މުވައްޒަފުން އަހުލުވެރި ކުރުމަށް ކުރިއަށް ދިޔަ ސެޝަނަށް ފަހު ދެއްކެވި ވާހަކައިގައެވެ.
މާލެ ސިޓީ ކައުންސިލްގެ އަމާޒަކީ، ދެ ފުށްފެންނަ، ރައްޔިތުން އެންމެ އިތުބާރުކުރާ ރާއްޖޭގެ އެންމެ ނަމޫނާ ކައުންސިލަށް މާލެ ސިޓީ ކައުންސިލް ހެދުންކަމަށް މޭޔަރ ޢާޒިމް ވިދާޅުވިއެވެ. އަދި ވިސްޓްލްބްލޮވިންގ އަށް ކައުންސިލްގެ މުވައްޒަފުން އަހުލުވެރި ކުރުމަށް، ވިސްޓްލްބްލޮވަރ ޕްރޮޓެކްޝަން ޔުނިޓުގެ މެމްބަރުން، މި ކަހަލަ ސެޝަނެއް އިންތިޒާމް ކޮށްދެއްވީތީ، ވަރަށް ބޮޑަށް ޝުކުރު އަދާކުރާކަމަށް ވެސް މޭޔަރ ޢާޒިމް ވިދާޅުވިއެވެ.
މޭޔަރ ޢާޒިމް ވިދާޅުވީ، ވިސްޓްލްބްލޯ ކުރުމަކީ ކޮބައިކަން، ކައުންސިލްގެ މުވައްޒަފުންނަށް މިހާރު އެނގިފައިވުމުން، ކައުންސިލްގެ އެއްވެސް ކަމެއް ގޯސްކޮށް ހިނގާނަމަ، އެ ކަން ރަނގަޅު ކުރުމަށް މަސައްކަތް ކޮށްދެއްވުމަށާއި، ގޯސްކޮށް ކަމެއް ހިނގާނަމަ ލަސްނުކޮށް އެ ކަން ރިޕޯޓް ކުރެއްވުމަށް މޭޔަރ އެދިވަޑައިގެންނެވިއެވެ.
މީގެ އިތުރުން މޭޔަރ ޢާޒިމް ވިދާޅުވީ، ރައްޔިތުންގެ އިތުބާރު ހޯދައި، އެ އިތުބާރު ދެމެހެއްޓުމަށް ކުރިމަތިވެފައިވާ އެންމެ ބޮޑު ގޮންޖެހުމަކީ، ރާއްޖޭގެ މުހިއްމު އިދާރާ ތަކުގެ އިތުބާރު، ރައްޔިތުންގެ ކުރިމަތީގައި ގެއްލިފައިވުމެވެ. އެހެންކަމުން ޢާއްމު ރައްޔިތުންނާއި އިދާރަތަކުގެ މުވައްޒަފުން ވެސް، މައްސަލައެއް ހުށަހަޅައިފި ނަމަ، އެ މައްސަލަ، އިންސާފުވެރިކަމާއެކު ބަލައި ފިޔަވަޅު އަޅާނެ ކަމުގެ ޔަގީންކަން ދެވެން ޖެހޭ ކަމަށެވެ. މި ގޮތަށް ޢަމަލުކުރަން ފެށުމުން، ދިވެހިރާއްޖޭގެ އިދާރާ ތަކަށް ރައްޔިތުންގެ އިތުބާރު ބޮޑުވެގެންދާނެ ކަމަށް، މޭޔަރ ޢާޒިމް ވިދާޅުވިއެވެ.
