ފެނުނީ ވާދަވެރި މެޗެއް، މިއީ މުހިންމު މޮޅެއް: އަންޗެލޮޓީ

ޔުއެފާ ޗެމްޕިއަންސް ލީގުގެ ގުރޫޕް ސްޓޭޖުގައި ނަޕޯލީއާ ދެކޮޅަށް ކުޅެން ޖެހުނީ ވަރަށް ވާދަވެރި މެޗެއް ކަަމަށާއި، އެ މެޗުން ލިބުނޫ ވަރަށް މުހިންމު މޮޅެއް ކަމަށް ރެއާލް މެޑްރިޑުގެ ކޯޗު ކާލޯ އަންޗެލޮޓީ ބުނެފި އެވެ.

ނަޕޯލީ މެޗަށްފަހު ވާހަކަ ދައްކަމުން އަންޗެލޮޓީ ބުނީ، އެއީ ވަރަށް ހަމަހަމަ އަދި އެހާމެ ވާދަވެރި މެޗެއް ކަމަށެވެ. ޚާއްސަކޮށް އިދިކޮޅު ޓީމުގެ ފަރާތުން ފެނުނީ މޮޅު ކުޅުމެއް ކަމަށާއި، އެމީހުންނާ ދެކޮޅަށް ކުޅެން އުނދަގޫވި ކަމަށް ވެސް އޭނާ ބުންޏެވެ. ނަމަވެސް މެޗުގެ ވަކި ހިސާބަކުން ރެއާލްގެ ކުޅުންތެރިން މެޗުގެ ތެރެއަށް ރަނގަޅަށް ވަދެ، މެޗުގެ ކޮންޓްރޯލް ނެގިކަން އޭނާ ވަނީ ފާހަގަކޮށްފަ އެވެ. އެކަން ފާހަގަކޮށް އަންޗެލޮޓީ ބުނީ، މެޗުން މޮޅުވެވުނީ ކުޅުންތެރިން އަވަސް އަރުވާލުމުގެ ބަދަލުގައި، ހަމަޖެހިގެން ރޭވުންތެރިކަމާއެކު މެޗު ކުޅުމުން ކަމަށެވެ. އޭނާ ދެކޭ ގޮތުގައި އަދިވެސް ރެއާލަށް އެއަށްވުރެ ފުރިހަމަ އަށް ޑިފެންސްގައި ކުޅެވޭނެ އެވެ.

މީގެ އިތުރުން އަންޗެލޮޓީ ބުނީ މެޗުންް މޮޅުވުމުގެ ހަކަތަ ރެއާލްގެ ކިބިގައި ނެތްކަމަށް ހީކުރެވުނު ނަމަވެސް، ކުޅުންތެރިން ދެއްކީ އެއާ މުޅިން ޚިލާފު މަންޒަރެއް ކަމަށެވެ. ޚާއްސަކޮށް އިދިކޮޅަށް ކުޅެން އޮތް ޓީމަށް ވުރެ، މާ ވަރުގަދަ ހަކަތައެއް ރެއާލްގެ ކުޅުންތެރިން ދެއްކި ކަމަށް ވެސް އޭނާ ވަނީ ފާހަގަކޮށްފަ އެވެ. އަންޗެލޮޓީ ވަނީ ރެއާލަށް ކުލެމުން އަންނަ އިންގްލެންޑުގެ ޒުވާން ކުޅުންތެރިޔާ ޖޫޑް ބެލިންހަމްގެ ވާހަކަ ވެސް ފާހަގަކޮށްފަ އެވެ. އޭނާ ބުނީ، ބެލިންހަމް އަންނަނީ އަބަދު ވެސް ތަފާތު ދައްކަމުން ކަމަށާއި، އޭނާގެ ހުނަރާއި، ކުޅުމާމެދު އެއްވެސް ސުވާލެއް ނެތް ކަމަށެވެ.

މޮޅާއެކު ރެއާލުން ވަނީ ގުރޫޕް ސީގެ އެއް ވަނަ ކަށަވަރުކޮށްފަ އެވެ. ނަޕޯލީ މެޗަށް ކުރިމަތިލީއިރު، އަންޗެލޮޓީ އަށް އޮތް އެންމެ ބޮޑު އެއް ކަންބޮޑުވުމަކީ އަނިޔާގެ މައްސަލަ އެވެ. ނަމަވެސް އެކަން ބަހަނާއަކަށް ދައްކަން ބޭނުންނުވާ ކަމަށް އޭނާ ވަނީ މެޗުގެ ކުރިން ވެސް ބުނެފަ އެވެ.