ޑެޕިއުޓީ މިނިސްޓަރުކަމަށް އައްޔަންކުރެއްވި އިތުރު 20 ބޭފުޅުންގެ ތެރޭގައި އެންމެ 2 އަންހެން ބޭފުޅުން
29 ނޮވެމްބަރު 2023 | ބުދަ 13:55އަންގާރަ ދުވަހުވެސް އެކި މިނިސްޓްރީތަކުގެ ނައިބުންގެ މަގާމަށް 26 ބޭފުޅަކު އައްޔަންކުރައްވާފައިވޭ
ރައީސުލްޖުމްހޫރިއްޔާ، ޑރ. މުހައްމަދު މުއިއްޒު
މި ސަރުކާރުގެ ޑެޕިއުޓީ މިނިސްޓަރުންގެ މަގާމަށް އިތުރު 20 ބޭފުޅަކު އައްޔަންކުރެއްވިއިރު، އެ ބޭފުޅުންގެ ތެރޭގައި ހިމެނުނީ އެންމެ 2 އަންހެން ބޭފުޅުންނެވެ.
ރައީސް އޮފީހުން ބުދަ ދުވަހު ނެރުނު އިއުލާނުގައި ވަނީ ރައީސުލްޖުމްހޫރިއްޔާ މުހައްމަދު މުއިއްޒު، އިތުރު 20 ބޭފުޅަކު ޑެޕިއުޓީ މިނިސްޓަރުކަމުގެ މަގާމަށް އައްޔަންކުރެއްވި ކަމަށް ބުނެފައެވެ.
އެގޮތުން އެ 20 ބޭފުޅުންގެ ތެރެއިން ޑެޕިއުޓީ މިނިސްޓަރަކަށް އައްޔަންކުރެއްވި އަންހެން ދެ ބޭފުޅުންނަކީ؛ މިނިސްޓަރ އޮފް ފޮރިން އެފެއަރޒްގެ ނައިބުގެ މަގާމަށް، ގ. ކުދިރުވާލިގޭ އާމިނަތު ރަނާ ހުސައިން ޝިހާމް، އަދި މިނިސްޓަރ އޮފް ފިޝަރީޒް އެންޑް އޯޝަން ރިސޯސަސްގެ ނައިބުގެ މަގާމަށް، ފ. ނިލަންދޫ ބީޗްސައިޑް، އަލްއުސްތާޒާ ޝަފީގާ ނައީމެވެ.
މި ލިސްޓުގެ އިތުރުުން، އަންގާރަ ދުވަހުވެސް އެކި މިނިސްޓްރީތަކުގެ ނައިބުންގެ މަގާމަށް 26 ބޭފުޅަކު ވަނީ އައްޔަންކުރައްވާފައެވެ. އެ 26 ބޭފުޅުންގެ ތެރެއިންވެސް 9 ބޭފުޅުންނަކީ އަންހެން ބޭފުޅުންނެވެ.
ޑެޕިއުޓީ މިނިސްޓަރުންނަށް ބަލާއިރު، އެ މަގާމުގެ ބޭފުޅުންނަށް މުސާރައާއި އެލަވަންސްގެ ގޮތުގައި މަހަކު 35،000 ރުފިޔާ ލިބޭނެއެވެ. އަދި ސްޓޭޓް މިނިސްޓަރު މަގާމުގެ ބޭފުޅުންނަށް 32،000 ރުފިޔާގެ މުސާރައެއް ލިބޭނެއެވެ.
