ބްރެޒިލާ ގުޅޭ ގޮތުން ސުވާލު ކުރުމުން އަންޗެލޮޓީގެ ފިނި ޖަވާބެއް

ބްރެޒިލްގެ ޤައުމީ ފުޓުބޯޅަ ޓީމުގެ ކޯޗުކަމާ ހަވާލުވުމާ ގުޅޭ ގޮތުން ސުވާލު ކުރުމުން، ރެއާލް މެޑްރިޑުގެ ކޯޗު ކާލޯ އަންޗެލޮޓީ ފިނި ޖަވާބެއް ދީފި އެވެ.

މިދިޔަ އަހަރުގެ ޑިސެމްބަރު މަހު ޤަތަރުގައި ނިމުނު ފީފާ ވޯލްޑް ކަޕް ފުޓުބޯޅަ މުބާރާތަށްފަހު، ބްރެޒިލްގެ ކޯޗުކަމުގެ މަޤާމު އޮންނަނީ ހުހަށެވެ. އެއީ އެ މަގާމުގައި ހުރި ޓީޓޭ ވަކިވުމުންނެވެ. އޭގެ ފަހުން ބްރެޒިލްގެ ފުޓުބޯޅަ ފެޑެރޭޝަންގެ ރައީސް ވަނީ، އެ މަޤާމަށް އަންޗެލޮޓީ ގެންނަން ބޭނުންވާކަން ހާމަކުރައްވައިފަ އެވެ. އަދި އެކަމާ ގުޅޭ މަޝްވަރާތައް ކުރިއަށް ގެންދެވޭ ކަމަށް ވެސް އޮތީ ވިދާޅުވެފަ އެވެ.

އެކަމާ ގުޅިގެން ނޫސްވެރިންގެ ގިނަ ސުވާލުތަކެއް އަންޗެލޮޓީ އަށް އަމާޒުވާއިރު، މިހާތަނަށް އޭނާ ވަނީ އެ ވާހަކަތައް ދޮގު ކޮށްފަ އެވެ. ދާދި ފަހުން އަނެއްކާ ވެސް ނޫސްވެރިޔަކު ވަނީ އަންޗެލޮޓީ އަށް އެ ސުވާލު އަމާޒުކޮށްފަ އެވެ. އެއާއެކު އަންޗެލޮޓީ ބުނީ، ރެއާލްގައި އޭނާ ހުރީ ވަރަށް ހިތްހަމަ ޖެހިގެން، ވަރަށް އުފަލުން ކަމަށެވެ. ނަމަވެސް ކުރިއަށް އޮތް ތަނުގައި ކަންތައް ވާނެ ގޮތެއް އެއްވެސް މީހަކަށް ނޭންގޭނެކަން ފާހަގަކޮށް އަންޗެލޮޓީ ބުނީ، ވާން ހުރި ގޮތެއް ވާނެ ކަމަށެވެ. ނަމަވެސް މިހާތަނަށް ރެއާލްގައި ހިތްހަމަ ޖެހިގެން ހުރި ކަމަށް ބުނާ ބުނުން އޭނާ ވަނީ ތަކުރާރުކޮށްފަ އެވެ.

ރެއާލާއެކު އަންޗެލޮޓީ ހަދާފައިވާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ. ނަމަވެސް، އެ މުއްދަތު ހަމަވުމާއެކު އަމަލުކުރާނެ ވަކި ގޮތެއް މިހާތަނަށް އަންޗެލޮޓީ ނިންމާފައެއް ނުވެ އެވެ. ރެއާލުން ބޭނުންވަނީ އިތުރު މުއްދަތަކަށް އަންޗެލޮޓީ އެ ކުލަބުގައި ބަހައްޓަން ކަމަށް ވެސް ސްޕެއިންގެ މީޑިއާ ތަކުން ބުނެ އެވެ. ނަމަވެސް، އެއްބަސްވުން އައު ކުރުމުގެ ބަދަލުގައި، ބްރެޒިލް ޤައުމީ ޓީމާ އޭނާ ހަވާލުވާނެ ކަމަށް ވެސް ބައެއް މީޑިއާ ތަކުން ވަނީ ރިޕޯޓުކޮށްފަ އެވެ.