މާވެޔޮ މިސްކިތް ކައިރީގައި ހުރި ޓްރާންސްފޯމަރު ނެގުމުގެ މަސައްކަތް ފަށައިފި

މާވެޔޮ މިސްކިތް ކައިރީ މަގުމައްޗަށް ވާގޮތަށް ހުރި ޓްރާންސްފޯމަރު ނެގުމުގެ އަމަލީ މަސައްކަތް ސްޓެލްކޯއިން އަންގާރަ ދުވަހު ފަށައިފިއެވެ.

މިއީ ސްޓްލެކޯގެ މެނޭޖިން ޑިރެކްޓަރުގެ މަގާމަށް ހުސައިން ފަހުމީ އައްޔަން ކުރެއްވުމާއެކު އެންމެ ފުރަތަމަ ފެއްޓެވި މަސައްކަތެކެވެ. އޭނާ އެ މަގާމަށް އައްޔަން ކުރެއްވީ އަންގާރަ ދުވަހުއެވެ.

ސްޓެލްކޯއިން ބުނި ގޮތުގައި ޓްރާންސްފޯމަރު ހުރި ސަރަހައްދާއި އެ މަގު ބޭނުންކުރާ މީހުންނަށް އޭގެ ސަބަބުން ތަކުލީފަކަށް ވެފައިވާތީ، ފަހުމީވަނީ އެ ސަރަހައްދަށް ވަޑައިގެން އާންމުންގެ ކިބައިން މާފަށް އެދިވަޑައިގެންފައެވެ.

މި ޓްރާންސްފޯމަރަކީ މީގެ ހަ އަހަރު ކުރިން ބެހެއްޓި ޓްރާންސްފޯމަރެކެެވެ. މި ޓްރާންސްފޯމަރު ނެގުމުގެ އަމަލީ މަސައްކަތް ފަށައި މި އަހަރު ނިމުމުގެ ކުރިން އެކަން ނިންމާނެ ކަމަށް ސްޓެލްކޯއިން ބުނެއެވެ.

ސްޓެލްކޯގެ މެނޭޖިން ޑިރެކްޓަރު ފަހުމީ އަކީ 1998 ވަނަ އަހަރުން ފެށިގެން އެ ކުންފުނީގައި މަސައްކަތްކުރައްވާ ބޭފުޅެކެވެ. އޭނާ އެ ކުންފުންޏާ ގުޅިވަޑައިގަތީ އެކައުންޓް އެސިސްޓެންޓް ޓްރެއިނީއެއްގެ ގޮތުގައެވެ.