މިހާރު ދަނީ މާލޭ ޖަލުގައި ބާކީ ތިބި ވިއްސަކަށް ގައިދީން މާލޭގެ އެހެން ޖަލަކަށް ބަދަލުކުރުމުގެ މަސައްކަތް ކުރަމުން
މާލެ ޖަލު އަދި ދަރުމަވަންތަ ސްކޫލު
މާލެ ޖަލާ އިންވެގެން ހުންނަ ދަރުމަވަންތަ ސްކޫލުގެ ދަރިވަރުންނަށް، ޖަލު ތެރެއިން ޤައިދީން ގޮވާ މައްސަލަ ފެންމަތިވެފައިވާ ކަމަށާއި، ޖަލު ބަދަލުކުރުމުގެ މަސައްކަތް ކުރައްވަމުން ގެންދަވާ ކަމަށް ހޯމް މިނިސްޓަރު ޢަލީ އިޙްސާން ވިދާޅުވެއްޖެ އެވެ.
މާލެ ޖަލުގައި ތިބި ޤައިދީން، ދަރުމަވަންތަ ސްކޫލުގެ ދަރިވަރުންނަށް ގޮވައިހަދާ މައްސަލަ ބޮޑުވެ، އެކަމުގެ ކަންބޮޑުވުން އެ ދަރިވަރުންގެ ބެލެނިވެރިން ވަނީ ފާޅުކޮށްފަ އެވެ. އެކަމާ ގުޅިގެން "ރާއްޖެ އެމްވީ" އިން ސުވާލު ކުރުމުން ހޯމްލޭންޑް، ސެކިއުރިޓީ އަދި ޓެކްނޮލޮޖީ ވުޒާރާގެ ވަޒީރު އަލީ އިޙްސާން ވިދާޅުވީ އެ ކަންބޮޑުވުން ލިބިފައިވާ ކަމަށާއި، އެކަމާ އެކު ޖަލުން ޤައިދީން ބަދަލުކުރުމުގެ މަސައްކަތް ކުރެއްވި ކަމަށެވެ.
އެގޮތުން ވަޒީރު ވިދާޅުވީ ކުރިން ސްކޫލު ދަރިވަރުންނަށް ގައިދީން ގޮވައި ހެދުމުގެ މައްސަލަ ފެންމަތިވީ، ގައިދީން އެއްތަނުން އަނެއް ތަނަށް ގެންދިޔުމުގެ ތެރޭގަ އި ޖަލުގައި ހުންނަ ހުސް ތަނުގައި ގައިދީން ތިބޭ އިރު ކަމަށެވެ. އެހެން ނަމަވެސް މިހާރު އެފަދަ ހާލަތެއް އެތަނުގައި ނެތް ކަމަށް ވަޒީރު ވިދާޅުވި އެވެ. އޭގެ ސަބަބެއް ކަމުގައި ވަޒީރު ވިދާޅުވީ މާލެ ޖަލުން ގައިދީން މަދު ކުރުމުގެ ތެރެއިން ހުޅުމާލެ ޖަލަަށް ވެސް މީހުން ބަދަލުކުރުމުގެ މަސައްކަތް ކުރެއްވި ކަމަށާއި، އެ ޖަލަށް ގެންދެވޭ އެންމެ ގިނަ ގައިދީން މިހާރު އެ ޖަލަށް ބަދަލުކުރައްވާފައިވާކަމަށް ވަޒީރު ވިދާޅުވި އެވެ. ވަޒީރު ވިދާޅުވީ މިހާރު މާލޭގެ ޖަލުގައި ތިބޭނީ ވިއްސަކަށް ގައިދީން ކަމަށެވެ.
ވަޒީރު އިތުރަށް ވިދާޅުވީ މާލޭގެ ޖަލުގައި ބާކީ ތިބި ގައިދީން، މާލޭގެ ޖަލުގެ ސަރަހައްދުގައި ހުންނަ ކަރެކްޝަންސްގެ އެނެކްސް ނުވަތަ މާލެ ޖަލުގެ "ރިމާންޑް" އަށް ބަދަލުކުރުމުގެ މަސައްކަތް މިހާރު ކުރަމުން އަންނަ ކަމަށެވެ. އެގޮތުން މިހާރު އެތަން ހުރި ހާލަތުގެ ސަބަބުން މަރާމާތު ކުރުމުގެ މަސައްކަތް ކުރައްވަމުން އަންނައިރު، މި އަންނަ ހަފުތާގެ ތެރޭގައި އެތަނަށް ގައިދީން ބަދަލުކުރެވޭނެ ތާރީޚެއް އިއުލާން ކުރައްވާނެ ކަމަށް ވަޒީރު ވިދާޅުވި އެވެ.
ވަޒީރު އިތުރަށް ވިދާޅުވީ ޖަލާ އިންވެގެން ސްކޫލު ގާއިމް ކުރެވުނު ހިސާބުން ވެސް، އެންމެ ބޮޑު އަމާޒަކަށް ވީ ގައިދީން އެހެން ސަރަހައްދަކަށް ބަދަލު ކުރެއްވުން ކަމަށާއި، އެކަން ވަރަށް އަވަހަށް ކުރެއްވޭނެ ކަމަށެވެ. އަދި އެކަން ކުރެއްވުމަށް ފަހު ޖަލުގެ ބިން ހުސްކުރައްވައި، ސަރުކާރުގެ ޕްލޭނާ އެއްގޮތަށް އެ ބިން އެޑިއުކޭޝަން މިނިސްޓްރީ އާ ހަވާލުކުރައްވާނެ ކަމަށް ވަޒީރު ވިދާޅުވި އެވެ.
