"ވަރުގަދަ" ބާސެލޯނާއާ ދެކޮޅަށް ޕޯޓޯ އޮތީ ތައްޔާރަށް!

ޔުއެފާ ޗެމްޕިއަންސް ލީގުގެ ގުރޫޕް ސްޓޭޖުގައި ސްޕެއިންގެ "ވަރުގަދަ" ބާސެލޯނާއާ ދެކޮޅަށް ޕޯޓޯ އޮތީ ފުރިހަމަ އަށް ތައްޔާރަށް ކަމަށް އެ ޓީމުގެ ކޯޗު ސާޖިއޯ ކޮންސެއިސާއޯ ބުނެފި އެވެ.

އަންގާރަ ދުވަހުގެ ރޭ ބާސެލޯނާއާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުން ކޮންސެއިސާއޯ ބުނީ، ބާސެލޯނާ އަކީ ވަރަށް ވަރުގަދަ ޓީމެއް ކަމަށެވެ. މެޗަށް ކުރިމަތިލަނީ ވަރަށް ރަނގަޅަށް އެކަން އެނގި ތިބެ ކަމަށާއި، މެޗަށް ފުރިހަމަ އަށް ތައްޔާރު ކަމަށް ވެސް އޭނާ ބުންޏެވެ. މީގެ އިތުރުން ބާސެލޯނާގެ ކުޅުންތެރިންނަކީ ހުނަރުވެރި، މޮޅު ކުޅުންތެރިންތަކެއް ކަމަށް ވެސް އޭނާ ޤަބޫލު ކުރެ އެވެ. އަނެއްކޮޅުން ބާސެލޯނާގެ ކޯޗު ޒަވީ ހެނާންޑޭޒް އަކީ ޗެމްޕިއަންސް ލީގަށް ވަރަށް ފަރިތަ، އެ މުބާރާތުގެ ތަޖުރިބާ ބޮޑު ކޯޗެއް ކަމަށް ވެސް އޭނާ ވަނީ ބުނެފަ އެވެ. އެހެންކަމުން ބާސެލޯނާ މެޗަކީ ވަރަށް "ޓަފް" މެޗެއް ކަމަށާއި، މޮޅުވުމަކީ ދެ ޓީމަށް ވެސް ފަސޭހެ ކަމަކަށް ނުވާނެ ކަމަށް ކޮންސެއިސާއޯ ވަނީ ބުނެފަ އެވެ.

މީގެ އިތުރުން އޭނާ ބުނީ ބާސެލޯނާއާ ދެކޮޅަށް ކުޅޭ މެޗު ނިންމާލަން ބޭނުންވަނީ އުފާވެރި އިހުސާސްތަކާ އެކު ކަމަށާއި، ޕޯޓޯ އަކީ ބާސެލޯނާ ބަލި ކުރެވޭ ފެންވަރުގެ ޓީމެއް ކަމަށް ވެސް ކޮންސެއިސާއޯ ވަނީ ބުނެފަ އެވެ. މެޗަށް ކުރިމަތިލަނީ މޮޅުވާން ބޭނުންވެގެން ކަމަށާއި، މެޗުން މޮޅުވެ އަނެއް ބުރަށް ދިޔުމަކީ އެ ޓީމުގެ އެންމެ ބޮޑު އަމާޒު ކަމަށެވެ. އެހެންކަމުން މިވަގުތު ފޯކަސް ކުރަން ޖެހެނީ ބާސެލޯނާ މެޗަށް ކަމަށާއި، މެޗުން މޮޅުވެވޭނީ ވަރަށް ރަނގަޅަށް މަސައްކަތް ކޮށްގެން ކަމަށް ވެސް އޭނާ ވަނީ ފާހަގަކޮށްފަ އެވެ.

މި ދެ ޓީމު ކުރިމަތިލާއިރު، ބާސެލޯނާ އެއް ވަނައިގައި އޮތީ ލަނޑުގެ ތަފާތުންނެވެ. ދެ ޓީމަށް ވެސް ހަތަރު މެޗުން ލިބެނީ ނުވަ ޕޮއިންޓެވެ. އެހެންކަމުން، މި މެޗުން މޮޅުވާ ޓީމަކަށް އަނެއް ބުރުގެ ޖާގަ ލިބޭނެ އެވެ.