ޕީއެސްޖީ މެޗުން ތިން ޕޮއިންޓު ނޫން އެއްޗެއް ނިއުކާސަލް ބޭނުން ނުވޭ!

ޔުއެފާ ޗެމްޕިއަންސް ލީގުގެ ގުރޫޕް ސްޓޭޖުގައި ޕެރިސް ސެއިންޓް ޖާމަން (ޕީއެސްޖީ)އާ ދެކޮޅަށް ކުޅޭ މެޗުން ބޭނުންވަނީ ތިން ޕޮއިންޓު ކަމަށް ނިއުކާސަލް ޔުނައިޓެޑުގެ ކޯޗު އެޑީ ހޯވް ބުނެފި އެވެ.

އޭނާ މިހެން ބުނީ ޕީއެސްޖީއާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. އޭނާ ބުނީ ޕީއެސްޖީ މެޗަށް ދުރާލާ ތައްޔާރުވަމުން އަންނަނީ މޮޅުވުމުގެ މަޤުސަދުގައި ކަމަށެެވެ. އޭގެ ފަހުން އޭސީ މިލާނާ ދެކޮޅަށް ކުޅެން ޖެހޭއިރު، އެ މެޗާ ދޭތެރޭގައި ވިސްނަން ބޭނުންވަނީ ވެސް ޕީއެސްޖީ މެޗަށްފަހު ކަމަށް އޭނާ ބުންޏެވެ. އޭނާ ބުނި ގޮތުގައި ނިއުކާސަލް އޮތީ އެންމެ ބޭނުންވާ ޙާލަތެއްގައެއް ނޫނެވެ. އެހެން ނަމަވެސް މިވަގުތަށް ބަހަނާ ދައްކަން ބޭނުން ނުވާ ކަމަށާއި، މެޗުން ބަލި ނުވެ ކުރިއަށް ދާން ޖެހޭ ކަމަށް ހޯވް ބުންޏެވެ.

ޕީއެސްޖީއާ ގުޅޭ ގޮތުން ވާހަކަ ދައްކަމުން އޭނާ ބުނީ، އެ ޓީމުގައި ފެންވަރު ރަނގަޅު މޮޅެތި ކުޅުންތެރިން ތިބި ކަމަށެވެ. ޚާއްސަކޮށް ކޮންމެ މަގާމަކަށް ކުޅެން ވެސް ތިބީ އެންމެ ފެންވަރު ރަނގަޅު ކުޅުންތެރިން ކަމަށް އޭނާ ވަނީ ފާހަގަކޮށްފަ އެވެ. އެހެންކަމުން އެ މެޗަށް ނިއުކާސަލުން ތައްޔާރުވާނީ އެންމެ ފުރިހަމަ އަށް ކަމަށާއި، މެޗުން މޮޅުވެވޭނެ ހުރިހާ ގޮތްތަކެއް ރާވާނެ ކަމަށް ވެސް އޭނާ ބުންޏެވެ. ނިއުކާސަލްގެ ކުޅުންތެރިން ފަރާތުން ފެންނަމުން އަންނަ މަސައްކަތާއި، ކުޅުންތެރިންގެ ހިތްވަރަށް ބަލާއިރު، ޕީއެސްޖީ މެޗުން މޮޅު ނުވެވޭންވީ ސަބަބެއް ނެތް ކަމަަށް ވެސް އޭނާ ވަނީ ބުނެފަ އެވެ.

ޕީއެސްޖީ މެޗަށް ކުރިމަތިލާއިރު، ނިއުކާސަލް އޮތީ ގުރޫޕުގެ ފުލުގަ އެވެ. އެއީ މިހާތަނަށް ކުޅުނު ހަތަރު މެޗުން ހަތަރު ޕޮއިންޓު ހޯދައިގެންނެވެ. ނަމަވެސް، ޕީއެސްޖީ މެޗުން މޮޅުވެ، އަނެއް ބުރަށް ދިޔުމަށް އެ ޓީމަށް އުންމީދެއް ލިބޭނެ އެވެ.