މަޖިލީހުގެ ރައީސްކަމާ ހަވާލުވެވަޑައިގެންނެވިއިރު، ލިޔުމުން ޖަވާބު ހޯއްދެވުމަށް 50 ސުވާލު ހުށަހަޅުއްވާފައި އޮތް - އަސްލަމް
މި އަހަރުގެ ބޮޑު ބައެއްގައި މަޖިލިސް އޮތީ ކުރިއަށް ނުގޮސް ހުއްޓިފައި
ރައްޔިތުންގެ މަޖިލީހުގެ ރައީސް މުޙައްމަދު އަސްލަމް
މަޖިލީހުގެ ރައީސްކަމާ ހަވާލުވެވަޑައިގެންނެވި އިރު، ލިޔުމުން ޖަވާބު ހޯއްދެވުމަށް މަޖިލީހުގެ މެންބަރުން 50 ސުވާލު ހުށަހަޅުއްވާފައި އޮތް ކަމަށް މަޖިލީހުގެ ރައީސް މުހައްމަދު އަސްލަމް ވިދާޅުވެއްޖެއެވެ.
އަސްލަމް އެފަދައިން ވިދާޅުވީ އަންގާރަ ދުވަހުގެ ޖަލްސާގެ ރިޔާސަތުގައި އިންނަވާ ވާހަކަފުޅު ދައްކަވަމުންނެވެ. އަންގާރަ ދުވަހު މަޖިލީހުގެ ޖަލްސާގައި ކުރީގެ އިސްލާމިކް މިނިސްޓަރު ޑރ އަހުމަދު ޒާހިރަށް ދެންނެވުމަށް ފޮނުވާފައިވާ ސުވާލުތަކުގެ ޖަވާބު އިއްވާފައި ވަނީ އަހަރެއްހާ ދުވަސް ފަހުންނެވެ. އަންގާރަ ދުވަހު މަޖިލީހުގައި އިއްވަވާފައިވާ ޖަވާބުތަކަކީ މީގެ އަހަރެއްހާ ދުވަސް ކުރިން މެންބަރަކު ކުރައްވާފައިވާ ސުވާލުތަކުގެ ޖަވާބެއެވެ. އަދި އެ ސުވާލަށް ޖަވާބު ވެސް ފޮނުއްވާފައި ވަނީ ނިމިދިޔަ އަހަރެވެ.
އެ ޖަވާބުތައް އިއްވެވުމަށް ފަހު އަސްލަމް ވަނީ އެމަނިކުފާނު މަޖިލީހުގެ ރިޔާސަތުގައި އިންނަވައިގެން އެކަން އެގޮތަށް ނުހިނގާނެ ކަމަށް ވިދާޅުވެފައެވެ. އެގޮތުން މެންބަރުން ފޮނުއްވާ ސުވާލުތަކުގެ ޖަވާބު އަވަހަށް ލިބެންޖެހޭ ކަަމަށް އަސްލަމް ވިދާޅުވިއެވެ. ރައްޔިތުންގެ މަޖިލީހުގެ މެންބަރުން ވަޒީރުންނަށް ދަންނަވާ ސުވާލުތަކުގެ ޖަވާބު، އިތުރަށް ޖަލްސާތައް ބާއްވައިގެން ވެސް އަވަހަށް ހޯއްދަވާދެއްވާނެ ކަަމަށް ވެސް އަސްލަމް ވިދާޅުވިއެވެ. މެންބަރުން ލިޔުމުން ހުށަހަޅާ ސުވާލުތަކުގެ ޖަވާބު ވީހާވެސް އަވަހަށް، މަޖިލީހުގެ ގަވާއިދު ބުނާ މުއްދަތުގެ ތެރޭގައި ލިބޭނެ މަގުފަހިކޮށްދެއްވާނެ ކަމަށް އެމަނިކުފާނު ވިދާޅުވިއެވެ.
މި އަހަރުގެ ބޮޑު ބައެއްގައި މަޖިލިސް އޮތީ ކުރިއަށް ނުގޮސް ހުއްޓިފައެވެ. އެއީ މަޖިލީހުގެ ކުރީގެ ރައީސް މުހައްމަދު ނަޝީދާއި ނާއިބު ރައީސް އީވާ އަބްދުﷲގެ އިތުބާރު ނެތްކަމުގެ މައްސަލަ ކުރިއަށް ނުގެންދެވި މަޖިލީހުގެ މަސައްކަތްތައް އެއްކޮށް މަޑުޖެހުމުންނެވެ.
