ރާއްޖެއިން ކްލައިމެޓް ރެފިއުޖީންނަށް ވާކަށް ބޭނުމެއް ނޫން، ރާއްޖޭގެ ހަމަޖެހުމާއި ތިމާވެށީގެ ރައްކާތެރިކަމާއި ވަނީ ގުޅިފައި - އަސްލަމް

ރާއްޖެއިން ކްލައިމެޓް ރެފިއުޖީންނަށް ވާކަށް ބޭނުން ނުވާ ކަމަށާއި ރާއްޖޭގެ ހަމަޖެހުމާއި ތިމާވެށީގެ ރައްކާތެރިކަމާއި ވަނީ ގުޅިފައި ކަމަށް ރައްޔިތުންގެ މަޖިލީހުގެ ރައީސް މުހައްމަދު އަސްލަމް ވިދާޅުވެއްޖެއެވެ.

އެމަނިކުފާނު އެފަދައިން ވިދާޅުވީ އިންޓަރނޭޝަނަލް ޕާލިމެންޓްރީ ޔޫނިއަން، އައިޕީޔޫގެ 148 ވަނަ އެސެމްބްލީގައި، ބިލްޑިން ބްރިޖެސް ފޯ ޕީސް އެންޑް އަންޑަސްޓޭންޑިން ނުވަތަ ހަމަޖެހުމަށް މަސައްކަތްކުރުން މި މައުޟޫއަށް ވާހަކަދައްކަވަމުންނެވެ. އަސްލަމް ވަނީ އެ މަގުން މަސައްކަތްކުރުމުގައި މަޖިލީހުގެ ދައުރުގެ މުހިންމުކަމަށް އަލިއަޅުވާލައްވާފައެވެ. އެގޮތުން ޔޫއެންގެ ކުރީގެ ސެކްރެޓަރީ ޖެނެރަލް ކޯފީ އަނާން ވިދާޅުވެފައިވާ ފަދައިން ބަދަލުވުން ނުވަތަ ރިފޯމްވުމަކީ މަރުހަލާ އެއް ކަމަށާއި އެއީ އެންމެ ކަމަކުން ނުވަތަ އިވެންޓަކުން ވާނެ ކަމެއް ނޫން ކަަމަށް އަސްލަމް ވަނީ ވިދާޅުވެފައެވެ. މަޖިލިސް މެމްބަރުންނަކީ ރިފޯމްގެ އެންމެ މުހިންމު އެއްބައި ކަމަށް ޤަބޫލުކުރައްވާކަމަށް އަސްލަމް ވަނީ ވިދާޅުވެފައެވެ. އަދި އެއީ ވަރަށް ބޮޑު ޒިންމާ އެއް ކަަމަށް ވެސް އަސްލަމް ވަނީ ވިދާޅުވެފައެވެ.

އަސްލަމް ވަނީ ރާއްޖެ އަށް އަސަރު ކުރާ ކަންކަމަށް އަލިއަޅުވާލައްވާފައެވެ. އޭގެ ތެރޭގައި ޓެރަރިޒަމް އާއި މަސްތުވާތަކެތީގެ މައްސަލަތައް ފަދަ މައްސަލަތައް އަސްލަމް ވަނީ ފާހަގަކުރައްވާފައެވެ. ކުރީގެ ރައީސް އަދި މަޖިލީހުގެ ކުރީގެ ރައީސް މުހައްމަދު ނަޝީދަށް ދިން ޓެރަރިސްޓް ހަމަލާ އަކީ ނުރައްކާތެރި ހަމަލާ އެއް ކަަމަށާއި ޓެކްނޮލޮޖީގެ ގޮތުން ކުރިއަރާފައިވާ މި ޒަމާނުގައި އެފަދަ ހަމަލާތައް ދިނުން އިތުރަށް ފަސޭހަވެފައިވާ ކަމަށް އަސްލަމް ވިދާޅުވިއެވެ. ހަރުކަށި ފިކުރުގެ ބިރުވެރިކަން ރާއްޖޭގައި އިތުރުވަމުންދާއިރު އެކަމަށް ކުރިމަތިލާން ބޭނުންވާ ޤާނޫނީ ފްރޭމްވޯކް ވަރުގަދަކުރުމުގެ މަސައްކަތް ރާއްޖޭގެ ކަމާއި ގުޅުން ހުރި އިދާރާތަކުން ކުރަމުންދާ ކަަމަށް އަސްލަމް ވަނީ ވިދާޅުވެފައެވެ.

އަސްލަމް އިތުރަށް ވިދާޅުވީ ރާއްޖެއަށް ތިމާވެށީގެ ރައްކާތެރިކަން ވަރަށް މުހިންމު ކަމަށެވެ. އެގޮތުން ކުޑަ ޖަޒީރާ ގައުމެއްގެ ހައިސިއްޔަތުން، މޫސުމަށް އަންނަ ބަދަލުތަކުގައި ރާއްޖޭގެ ހިއްސާ ކުޑަ ކަމަށް އަސްލަމް ވިދާޅުވިއެވެ. އެހެންނަމަވެސް މޫސުމަށް އަންނަ ބަދަލުތަކުގެ ސަބަބުން ރާއްޖެ އަށް ވަރަށް ބޮޑަށް އަސަރުކުރާ ކަމަށް އަސްލަމް ވިދާޅުވިއެވެ.