ރައީސް ޔާމީންގެ ޝަރީއަތް ލަސްވާ ސަބަބު ބަލައިދިނުމަށް ޖޭއެސްސީއަށް ހުށަހަޅާނަން - އަސްލަމް

ކުރީގެ ރައީސް އަބްދުﷲ ޔާމީންގެ ޝަރީއަތް ލަސްވާ ސަބަބު ބަލައިދިނުމަށް ޖޭއެސްސީއަށް ހުށަހަޅުއްވާނެ ކަމަށް މަޖިލީހުގެ ރައީސް އަދި ޖޭއެސްސީގެ މެންބަރު މުހައްމަދު އަސްލަމް ވިދާޅުވެއްޖެއެވެ.

މިސްރާބު ހަމަމަގަށް އެމްޑީޕީން އައްޑޫ ސިޓީގައި ބޭއްވި ޖަލްސާގައި އަސްލަމް ވިދާޅުވީ ވަރަށް މަސައްކަތުން ރާއްޖެއަށް މަލްޓިޕާޓި ޑިމްކްރަސީ ގެނެސްފައިވާ ކަމަށާއި، އައްޑޫ ރައްޔިތުންގެ ހިއްސާވެސް އެކަމުގައި ބޮޑު ކަމަށެވެ. އަސްލަމް ވިދާޅުވީ ކުރީގެ ރައީސް އަބްދުﷲ ޔާމީންވެސް އިހައްދުވަހަކު ސިޔާސީ ޕާޓިއެއް ހަދައިގެން ރަޖިސްޓްރީކުރަން ބޭނުންވާ ޖަލްސާ ބާއްވަން އުޅުނު ކަމަށެވެ. އަދި އެތަނަށް ފުލުހުން ގޮސް ރައްޔިތުންގެ ގައިގައި ތަޅާ ޖަލްސާ ހުއްޓުވަން އަމިއްލައަކަށް ނުދާނެކަމަށާއި، ސަރުކާރުން ބުނެގެން ނޫނީ އެކަން ފުލުހުން ނުކުރާނެ ކަމަށެވެ.

އަސްލަމް ވިދާޅުވީ ރައީސް ޔާމީންގެ ޝަރީއަތުގެ ހުރިހާ އަޑުއެހުންތަކުގެ އަޑުއެހުން ނިމުމަށްފަހުގައިވެސް ލަސްވެގެންދާ ކަމަށާއި، އެންމެ ފަހުން އަޑުއެހުމެއް ބާއްވާފައިވަނީ ޑިސެމްބަރު މަހުގައި ކަމަށެވެ. 4 މަސްވެގެން ދިޔައިރުވެސް ހުކުމް އިއްވާނުލެވުނު ކަމަށާއި، ސަރުކާރުން ރައީސް ޔާމީންގެ ޝަރީއަތަށް އަތްބާނާ މިންވަރު ފެނިގެންދާ ކަމަށެވެ.

އަސްލަމް ވިދާޅުވީ އިންސާފުގެ ކުރިމަތީގައި ވަކި ސަރުކާރަކުން ވަކި ނުފޫޒެއް ފޯރުވައިގެން ނުވާނެ ކަމަށެވެ. ކޮންމެ މީހަކަށް ވެސް ފުރިހަމަ އިންސާފު ލިބެންޖެހޭނެ ކަމަށާއި، އެމްޑީޕީގެ ނިޝާނުން ފެންނަނީ އެކަން ކަމަށެވެ. އަދި މިސްރާބު ހަމަމަގަށް އެޅުވުމަށް ކުރަންޖެހޭ މަސައްކަތް އެމްޑީޕީން ކުރަމުން ގެންދާނެ ކަމަށެވެ.