ކްރިމިނަލް ކޯޓުގެ އަމުރެއްގެ ދަށުން ފުލުހުން މާފަންނު ކުނޫޒް ބަލައި ފާސްކޮށް އެއްވެސްހެއްކެއް ނުފެނުނު ކަމަށް ފުލުހުން ބުނެފައިވާއިރުވެސް އަދިވެސް ފުލުހުންގެ ބެލުމުގެ ދަށުގައި ކުނޫޒު އޮތް ކަމަށް ޖުމްހޫރީ ޕާޓީން ބުނެފިއެވެ.
ރާއްޖެއެމްވީއާ ވާހަކަދައްކަވަމުން ޖޭޕީގެ ސްޕޯކްސްޕާރސަން އަލީ ސޯލިޙް ވިދާޅުވީ އާންމު އުސޫލުން ޖޭޕީ އޮފީހަށް މުވައްޒަފުން މަސައްކަތަށް ނިކުތުމުން ފުލުހުން އެކަމަށް ހުރަސް އަޅާފައިވާ ކަމަށާއި ކޯޓް އަމުރުގެ ދަށުން އަދިވެސް 4 ގަޑި އިރު ފުލުހުންނަށް އެބައޮތް ކަމަށް ބުނެފައިވާ ކަމަށެވެ.
ޖުމްހޫރީ ޕާޓީގެ ޖަގަހަ އާއި އެ ޕާޓީގެ އޮފީސް ބަލާ ފާސްކުރުމަށް ފުލުހުން އެތަނުގައި ގާތްގަނޑަކަށް ފަސް ގަޑިއިރު ހޭދަކުރިއެވެ. ނަމަވެސް ޖުމްހޫރީ ޕާޓީގެ ސެކްރެޓަރީ ޖެނަރަލް އަހްމަދު ސަމީރު ވިދާޅުވީ މައްސަލައާ ގުޅުންހުރި އެއްވެސް ހެއްކެއް ފެނިފައިނުވާކަމަށް ބުނެ ފުލުހުން ލިޔުމެއް ދިން ކަމަށެވެ. ފުލުހުން ކުނޫޒު ބަލާ ފާސްކުރުމަށް ވަނީ އަންގާރަ ދުވަހުގެ ރޭ 20.30 ހާއިރެވެ. އަދި އެތަނުން ފުލުހުން ނިކުތީ ދަންވަރު 1.30 ހާއިރެވެ.
ޖުމްހޫރީ ޕާޓީގެ މައި ޖަގަހަ، ކުނޫޒު ބަލައި ފާސްކުރުމަށް އަންގާރަ ދުވަހުގެރޭ ނެރެފައިވާ ކޯޓު އަމުރުގައި ވަނީ އެތަން ބަލާ ފާސްކުރަނީ ޖުމްހޫރީ ޕާޓީ އާއި އެމްޑީޕީ އާއި އަދާލަތު ޕާޓީ އާއި އަދި މިނޫން ވެސް ބައެއް ފަރާތްތަކުން އިސްކޮށް ތިބެ ދިވެހިރާއްޖޭގައި ޤާނޫނީ ގޮތުން އުފެދިފައިވާ ސަރުކާރު ހިންގުމަށް ދަތިކުރުމާއި، ސަރުކާރު ވައްޓާލުމަށް ސައްލާކޮށް، ރާވާއި، އަދި ރައްޔިތުން މަޖިލީހުން ކުރާ ރަސްމީ މަސައްކަތްތަކަށް ހުރަސް އެޅުމަށް މަސައްކަތްކުރަމުންދާ ކަމަށް ތުހުމަތުކުރެވޭތީ އެކަމާ ގުޅޭ ހެކި ހޯދުމަށް ކަމަށެވެ.
މި އަމުރުގައިވާ ގޮތުން ކުނޫޒުން ބަލައި ފާސްކުރަން ހަމަޖެހިފައި ވަނީ ސަރުކާރު ބަދުނާމުވާ ގޮތަށް ލިޔެފައިވާ ލިޔެކިޔުންތަކާއި ބެނާތަކާއި ފޮތިތަކާއި އަދި ސީސީޓީވީ ފޫޓޭޖް ހޯދުމަށެވެ. އަދި ކޯޓް އަމުރުގައި ބުނެފައިވަނީ ކުނޫޒް ބަލައި ފާސްކުރުމަށް ހަމަޖެއްސީ ފުލުހުންގެ އިންޓެލިޖަންސްއަށް ލިބުނު ސިއްރު މައުލޫމާތަކާއި ގުޅިގެން ކަމަށެވެ.
ކުނޫޒް ބަލައި ފާސްކުރަން ކްރިމިނަލް ކޯޓުން ނެރެފައިވަނީ 72 ގަޑިއިރުގެ ކޯޓް އަމުރެކެވެ. ކުނޫޒް ފާސްކުރަމުން ދިޔައިރު، ފުލުހުން ވަނީ އެ ސަރަހައްދު ނުފެންނަހާ ދުރަށް އާންމުންނާއި ނޫސްވެރިން ޖައްސާފައެވެ.
