އިތުރު ގައިދީން ދޫކުރާނަމަ، އެއްބަސްވުމުގެ މުއްދަތު އިތުރުކުރުމާމެދު ވިސްނާނެކަމަށް އިސްރާއީލުން ބުނެފި

ހަމާސް ޖަމާއަތުން، އިތުރު ގައިދީން މިނިވަންކުރަން އެއްބަސްވެއްޖެނަމަ، ޣައްޒާގައި މިހާރު ހިނގަމުންދާ ހަނގުރާމަ ހަތަރު ދުވަހުގެ މުއްދަތަށް ހުއްޓާލުމަށް ވެފައިވާ އެއްބަސްވުމުގެ މުއްދަތު އިތުރުކުރުމާމެދު ވިސްނާނެކަމަށް އިސްރާއީލުން ބުނެފިއެވެ.

މިސްރު، ގަތަރު އަދި އެމެރިކާއިން، ދެ ފަރާތަށްވެސް ބާރުއަޅަމުން ދަނީ ހަނގުރާމަ މެދުކަނޑާލުމަށް ވެފައިވާ އެއްބަސްވުން ދިގުދަންމާލުމަށެވެ. އިސްރާއީލާ ހަމާސްއާ ދެމެދު ހިނގި ކުރިމަތިލުންތަކުގައި މިހާތަނަށް ފަލަސްތީނުގެ 14،854 މީހުންނާއި އިސްރާއީލުގެ 1،200 މީހުން މަރުވެފައިވާކަމަށް އދ.ގެ ހިސާބުތަކުން ދައްކައެވެ.

އިސްރާއީލު ސިފައިންނާ މުޚާތަބު ކުރައްވައި ވާހަކަފުޅު ދައްކަވަމުން ބޮޑުވަޒީރު ބެންޖަމިން ނަތަންޔާހޫ ވިދާޅުވީ، ބޭނުންވެއްޖެނަމަ ހަމަލާތައް އަލުން ފެށުމަށް އިސްރާއީލު އޮތީ ތައްޔާރަށް ކަމަށާއި، އެކަމަށް ހުރަސް އެޅޭނެ އެއްވެސް ބާރެއް ނެތްކަމަށެވެ. ނަމަވެސް މިނިވަންކުރާ ކޮންމެ އިތުރު 10 ގައިދީއަކަށް އެއް ދުވަހަށް ހަނގުރާމައިގެ މުއްދަތު އިތުރުކުރައްވާނެ ކަމަށް އެއްބަސްވެފައިވާ އެއްބަސްވުން އޭނާ ތަކުރާރު ކުރެއްވިއެވެ.

ހަމާސް ޖަމާއަތުން ވަނީ މިދިޔަ ހަފުތާގައި އެއްބަސްވި އެއްބަސްވުމުގެ ޝަރުތުތަކުގެ ދަށުން މިހާތަނަށް އިސްރާއީލުގެ 17 މީހަކު މިނިވަންކޮށްފައެވެ. އަދި އިސްރާއީލުންވެސް ވަނީ ފަލަސްތީނުގެ 39 މީހަކު މިނިވަން ކޮށްފައެވެ. އިތުރު ގައިދީން ބަދަލުކުރުމުގެ ފުރުސަތު ހުޅުވާލާފައި ވީނަމަވެސް، ހަނގުރާމަ ހުއްޓާލުމުގެ މުއްދަތު އިތުރުކުރަން ޖެހޭ ދުވަހުގެ އަދަދު ހާމަކޮށްފައެއް ނުވެއެވެ.

އެމެރިކާގެ ރައީސް ޖޯ ބައިޑަންއާ ފޯނުން ގުޅުއްވައި ނަތަންޔާހޫ ވިދާޅުވީ، އިތުރު 10 ގައިދީން ހަމާސްއިން ދޫކޮށްލާނަމަ ހަނގުރާމަ ހުއްޓާލުމުގެ މުއްދަތު އިތުރު އެއް ދުވަހަށް އިތުރުކުރައްވާނެ ކަމަށެވެ.

މިހާރު ހިނގަމުންދާ ހަނގުރާމައިގެ މުއްދަތު އަންނަ ހޯމަ ދުވަހުގެ ރޭ ހަމަވާއިރު، ކުރިއަށް އޮތް 48 ގަޑިއިރަކީ ވަރަށް ނާޒުކު ވަގުތެކެވެ. ފަލަސްތީނުގެ ގިނަ އަދަދެއްގެ ރައްޔިތުން ޣައްޒާއާއި ހުޅަނގު އައްސޭރިއަށް އެއްވެފައިވާއިރު، އެމީހުން ޑިމާންޑްކުރަމުން ދަނީ ގައިދީން ބަދަލުކުރުމުގެ ޝަރުތުތަކަށް ބެލުމެއް ނެތި، އިސްރާއީލުން 15 އަހަރު ވަންދެން އަޅާފައިވާ ލޮކްޑައުން ނިމުމަކަށް ގެނައުމަށެވެ.