މެދު ހެންވޭރު ދާއިރާގެ މެންބަރު އަލީ އާޒިމް ވަނީ އަސްލަމް މަޤާމުގައި ހުންނެވީ ޤާނޫނާއި ޚިލާފަށް ކަމަށް ވިދާޅުވެފައި
ރައްޔިތުންގެ މަޖިލީހުގެ ރައީސް މުޙައްމަދު އަސްލަމް
ޤާނޫނާއި ޚިލާފަށް މަޤާމުގައި ހުންނަވާކަމަށް ބުނާ މެންބަރުންނަށް, ރައްޔިތުންގެ މަޖިލީހުގެ ރައީސް މުހައްމަދު އަސްލަމް ވަރުގަދަ ރައްދެއް ދެއްވައިފިއެވެ.
އަސްލަމް އެފަދައިން ވިދާޅުވީ ހޯމަ ދުވަހުގެ ޖަލްސާގައި ވާހަކަފުޅު ދައްކަވަމުން މަޖިލީހުގެ މެދު ހެންވޭރު ދާއިރާގެ މެންބަރު އަލީ އާޒިމް އަސްލަމް މަޤާމުގައި ހުންނެވީ ޤަވާއިދާއި ޚިލާފަށް ކަމަށް ވިދާޅުވުމުން އެކަމަށް ރައްދު ދެއްވައެވެ. މަޖިލީހުގެ ރިޔާސަތުގައި އިންނަވާ ވާހަކަފުޅުދައްކަވަމުން އަސްލަމް ވިދާޅުވީ އަބަދުވެސް އެމަނިކުފާނު މަަސައްކަތް ކުރައްވާފައިވާނީ ޤަވާއިދާއި އެއްގޮތަށް ޢަމަލުކުރެއްވޭތޯ ކަމަށެވެ. އަދި އެ މަޤާމަށް ވަޑައިގެންނެވީ ވެސް މެންބަރުންގެ ފުރިހަމަ އަގުލަބިއްޔަތާއި އެކުގައި ކަމަށް އަސްލަމް ވިދާޅުވިއެވެ. 44 މެންބަރުންގެ ސޮޔާއެކު މަޖިލީހުގެ ރައީސްގެ އިތުބާރު ނެތްކަމަށް ހުށަހަޅައިފި ނަމަ އެންމެ މިނެޓަކު ވެސް ރިޔާސަތުގައި ނުހުންނަވާނެ ކަމަށް އަސްލަމް ވިދާޅުވިއެވެ.
އަސްލަމް ވަނީ އެމަނިކުފާނު މަޤާމުން ވަކިކުރަން ބޭނުންވާ ނަމަ އެކަން ކުރަން އޮތްގޮތަކީ މެންބަރުންގެ އަގުލަބިއްޔަތާ އެކު އިތުބާރު ނެތްކަމުގެ މައްސަލަ އެއް ހުށަހެޅުން ކަމަށް ވިދާޅުވެފައެވެ.
ރައްޔިތުންގެ މަޖިލީހުގެ ރައީސަކަށް އައްޑޫ ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް އައްޔަން ކުރައްވާފައި ވަނީ މި ހިނގާ ނޮވެމްބަރު މަހުގެ 13 ވަނަ ދުވަހުއެވެ. އަސްލަމް މަޤާމަށް އިންތިޚާބުވެވަޑައިގެންފައި ވަނީ މަޖިލީހުގެ ޖަލްސާއަށް ހާޒިވެވަޑައިގެން ވޯޓުދެއްވި 76 މެންބަރުންގެ ތެރެއިން 53 މެންބަރުންގެ ވޯޓުންނެވެ.
