ނަބާއާއި ނަބީ ރިހި، ފިރިހެން ޑަބަލްސް ދެ ޕެއަރއަށް ލޯ މެޑަލް
26 ނޮވެމްބަރު 2023 | އާދީއްތަ 16:04ސިންގަލްސް އޯޕަންސް ކްއާޓަރުން ނަބާ ޖާގަ ހޯދި
ނަބާއާއި ނަބީ، ރިހި މެޑަލާއެކު
މިއަދު ނިމުނު ބޮޓްސްވާނާ އިންޓަރނޭޝަނަލް 2023 ބެޑްމިންޓަން މުބާރާތުގެ އަންހެން ޑަބަލްސްއިން، ރާއްޖޭގެ އައިމިނަތު ނަބީހާއާއި ފާތިމަތު ނަބާހާ ރިހި މެޑަލް ހޯދައިފިއެވެ.
ނަބާއާއި ނަބީއަށް ރިހި މެޑަލް ލިބުނީ، ފައިނަލްގައި ދެކުނު އެފްރިކާ ޕެއަރއާ ވާދަކޮށް، ބަލިވުމުންނެވެ. އެއްވަނައަށް ސީޑްކޮށްފައިވާ އެކަމަންއާއި ޑެއިޑްރޭ ލޯރެންސްގެ ޕެއަރ އަތުން ބަލިވީ 2-1 ސެޓުންނެވެ. އެއީ 21-13, 20-22 އަދި 21-18އިންނެވެ. އިންޑިޔަން އޯޝަން އައިލެންޑް ގޭމްސްގައި ރަން މެޑަލް ހޯދި ދެބެން މި މުބާރާތުގައިވެސް މޮޅަށް ކުޅެ، ރަނގަޅު ކުޅުމެއް ދެއްކިއެވެ.
ރާއްޖޭގެ ފިރިހެން ޑަބަލްސް ދެ ޕެއަރ ވަނީ މުބާރާތުގެ ލޯ މެޑަލް ހޯދާފައެވެ. ސެމީފައިނަލަށް ދަތުރުކޮށް, ސެމީގައި ނާކާމިޔާބުވި ރާއްޖޭގެ ދެ ޕެއަރއަކީ ޒަޔާން ޒަކީއާއި ނަޝްފާން މުހައްމަދުގެ ޕެއަރއާއި، މުހައްމަދު އަޖުފާނާއި ނިބާލް އަހުމަދުގެ ޕެއަރއެވެ. ސިންގަލްސްގައި ރާއްޖެއިން އެންމެ ދުރަށް ދަތުރުކުރީ ނަބާއެވެ. ސިންގަލްސް އޯޕަންސްގެ ކްއާޓަރ ފައިނަލަށް ނަބާ ދަތުރުކުރިއެވެ. ފިރިހެން ކުޅުންތެރިންގެ ތެރެއިން ނިބާލާއި ޒަޔާން ގަދަ ސޯޅާގައި ވާދަކުރިއެވެ.
