އޮފީސް މުބާރާތުގެ ފިރިހެން ބައިގެ ޗެމްޕިއަންކަން ޕޮލިހުން ހޯދައިފި

މިހާރު ކުރިއަށްދާ އިންޓަރ އޮފީސް ކޮމްޕެނީ ވޮލީ މުބާރާތުގެ ފިރިހެން ޑިވިޝަނުގެ ޗެމްޕިއަންކަން މޯލްޑިވްސް ޕޮލިސް ސާވިސް އިން ހޯދައިފިއެވެ.

ޒުވާނުންގެ މަރުކަޒު އެތެރޭ ކޯޓުގައި ކުޅުނު ފައިނަލް މެޗު ކާމިޔާބުކޮށް ޕޮލިހުން ޗެމްޕިއަންކަން ހޯދީ މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އާއި ވާދަކޮށް ވާދަވެރި ކުޅުމަކަށްފަހު ސީދާ ތިން ސެޓުން މެޗު ކާމިޔާބުކޮށްގެންނެވެ.

ދެޓީމުގެ ފަރާތުންވެސް ފޯރިގަދަ ކުޅުމެއް ފެނިގެންދިޔަ މި މެޗުގެ ސެޓުތައް ޕޮލިހުން ކާމިޔާބުކުރީ 24-26، 24-26 އަދި 14-25 އިންނެވެ. މެޗުގެ މޮޅު ކުޅުންތެރިޔާގެ މަގާމަށް ހޮވުނީ ޕޮލިހުގެ ސާދިގު މޫސާއެވެ.

މި މުބާރާތުގެ އަންހެން ޑިވިޝަންގެ ފައިނަލް މެޗު ވެސް އަންގާރަ ދުވަހުގެރޭ ކުޅުމަށް ހަމަޖެހިފައިވާ އިރު، މި މެޗުގައި ބައްދަލުކުރާނީ މޯލްޑިވްސް ޕޮލިސް ސާވިސް އާއި މިނިސްޓްރީ އޮފް ޔޫތު އެންޑް ސްޕޯޓްސްއެވެ.