ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު،  ޤާސިމް އިބްރާހިމްގެ ސިއްހީ ހާލަތު ދަށްވުމުގެ ސަބަބުން، އަންގާރަ ދުވަހުގެރޭ ކުރިއަށްގެންދިޔަ އެމަނިކުފާނުގެ މައްޗަށް ދައުލަތުން ކޮށްފައިވާ ދައުވާގެ ޝަރީޢަތް ފެށުމަށް ފަހު، ޝަރީއަތުގެ މަޖިލިސް ނިންމާލައިފިއެވެ.

މި އަޑުއެހުން ކުރުކޮށް، ނިންމާލުމާ ގުޅިގެން، އެ މަޖިލިސް ފަހުގެ ތާރީހެއްގައި ބޭއްވުމަށް ވަނީ ނިންމާފައެވެ.

ޤާސިމްގެ ވަކީލް އަލްއުސްތާޛާ ހިސާން ޙުސައިން ވިދާޅުވީ، ޝަރީޢަތް ކެންސަލް ކުރީ ޤާސިމްގެ އެދިވަޑައިގަތުމުގެ މަތިން ކަމަށެވެ.

މިއަދުގެ ޝަރީޢަތް ކެންސަލް ކޮށްދެއްވުމަށް އެދިވަޑައިގަތުމުން، ގާޒީވެސް އެކަން ފާހަގަކުރައްވާ މިއަދުގެ ޝަރީޢަތް ކެންސަލް ކުރެއްވީ

ގާސިމްގެ މައްޗަށް ދައުލަތުން ފުރަތަމަ ދައުވާ އުފުލީ އޭޕްރީލް މަހުގެ 12 ވަނަ ދުވަހުއެވެ. އެ ދައުވާތަކުގެ ޝަރީއަތް ކުރިއަށް ދަނިކޮށް، މިމަހުގެ 10 ވަނަ ދުވަހު ބޭއްވި އަޑުއެހުމަށް ދައުލަތުގެ ވަކީލުން ގަސްތުގައި ހާޒިރުނުވުމުން އެ މައްސަލަ ބާތިލްކޮށް، އަނބުރާ ވަނީ ފޮނުވާލާފައެވެ. އެއިރު މައްސަލަ ބެއްލެވީ، ކްރިމިނަލް ކޯޓުގެ އެއިރުގެ އިސްގާޒީ އަބްދުލް ބާރީ ޔޫސުފާއި، ގާޒީ އަހުމަދު ޝަކީލުގެ އިތުރުން މިހާރު ކްރިމިނަލް ކޯޓް ހިންގެވުމާއި ވަގުތީ ގޮތުން ހަވާލުވެ ހުންނެވި ގާޒީ އާދަމް އާރިފް ހިމެނިވަޑައިގަންނަވާ ބެންޗަކުންނެވެ.

ގާސިމްގެ މައްސަލަ ބާތިލްކޮށް، އަނބުރާ ފޮނުވާލިތާ މާގިނަ އިރުތަކެއް ނުވަނީސް، ގާޒީ ބާރީ ޖުވެނައިލް ކޯޓަށް، އަދި ގާޒީ ޝަކީލް ފެމިލީ ކޯޓަށް ބަދަލުކުރުމަށް ކުރުމަށް ޖުޑިޝަލް ސާރވިސް ކޮމިޝަން(ޖޭއެސްސީ) އިން ނިންމި އެވެ.

ކްރިމިނަލް ކޯޓުން މައްސަލަ ބާތިލްކުރުމުން، ޕްރޮސެކިއުޓާރ ޖެނެރަލްގެ އޮފީހުން ވަނީ އަލުން އަނބުރާ އެ މައްސަލަ ކޯޓަށް ހުށަހަޅާފައެވެ. ފަހުން ހުށަހެޅި މައްސަލައިގެ ގަޒިއްޔާ ނަމްބަރަކީ 627 އެވެ. ކުރިން ތިން ދައުވާއެއް ކުރިއިރު، އެ މައްސަލަތަކުގެ ގަޒިއްޔާ ނަމްބަރުތަކަކީ 478، 479، އަދި 480 އެވެ.

ގާސިމްގެ މައްޗަށް ދައުލަތުން ކުރިން ކުރީ ރިޝްވަތު ދިނުމަށް ހުށަހެޅުމާއި، ރަސްމީ ހައިސިއްޔަތުން ކުރަންޖެހޭ ކަންކަމަށް ނުފޫޒު ފޯރުވަން އުޅުމާއި، ވޯޓު ދޭން ހުރި މީހަކަށް ނުރަނގަޅު ނުފޫޒު ފޯރުވަން އުޅުމުގެ ދައުވާއެވެ. ނަމަވެސް ފަހުން ގާސިމްގެ މައްޗަށް ކޮށްފައިވަނީ ހަމައެކަނި ރިޝްވަތު ދިނުމަށް ހުށަހެޅުމުގެ ދައުވާއެވެ.

އެ މައްސަލައިގައި މިއަދުގެ (އަންގާރަ ދުވަހު) ހެނދުނު 11:00 ގައި ބޭއްވި އަޑުއެހުމުގައި، މައްސަލަ ބައްލަވަން އިންނެވީ ގާޒީ އާދަމް އާރިފެވެ.

ގާޒީ އާދަމް އާރިފް ވިދާޅުވީ ކުރިން ކުރި ދައުވާގެ މައްސަލަ ބާތިލްކުރީ ޕްރޮސެކިއުޓާރ ޖެނެރަލްގެ އޮފީހުގެ ވަކީލުން ގަސްތުގައި ކޯޓަށް ހާޒިރުނުވުމުން ކަމަށާއި، ފަހުން އުފުލި ދައުވާގެ ސީޣާގައި ވެސް ވަނީ ހަމަ އެއްވާހަކަތަކެއް ކަމަށެވެ. އެހެންކަމުން، ބާތިލްކުރި ގަޒިއްޔާ، ބާތިލްކުރުމާ ހަމައަށް ކުރިއަށް ގޮސްފައިވާ ހިސާބުން މި ގަޒިއްޔާ ފެށުމަށް ނިންމަވާފައިވާ ކަމަށް ގާޒީ އާރިފް ވިދާޅުވިއެވެ.

އަޑުއެހުމަށް ގާސިމް ވަޑައިގެންނެވީ ވަކީލަކާ ނުލައެވެ. އާލާސްކަންފުޅާ އެޑްމިޓް ކުރުމަށް ފަހު ހޮސްޕިޓަލުން ގާސިމް ދޫކޮށްލިތާ 24 ގަޑިއިރު ވެސް ނުވާއިރު، ވަކީލަކު ހަމަޖެއްސުމަށް 10 ދުވަސް ދެއްވުމަށް އޭނާ އެދިވަޑައިގެންނެވިއެވެ. ނަމަވެސް، ގާޒީ އާރިފް ވިދާޅުވީ ގާސިމްގެ ބަލިހާލަތުގެ ކަންކަމުގައި ރާއްޖެއިން ބޭރަށް ފުރުމުގެ ހުއްދައަކަށް އެދި ވަކީލުން ކޯޓަށް ވަޑައިގެންނެވި ކަމަށާއި، އަދި ގާސިމްގެ ހާލުކޮޅާ ގުޅިގެން މީޑިއާގައި ވެސް ވަކީލުން ވާހަކަދައްކަވާފައިވާތީ އެ މުއްދަތު ދެވެން ނެތް ކަމަށެވެ.

އަންގާރަ ދުވަހުގެ މެންދުރުވެސް، އަދި އަންގާރަ ދުވެހުގެރޭވެސް ގާސިމް ކޯޓަށް ވަޑައިގެންނެވީ އެމަނިކުފާނުގެ ބޮޑީގާޑުގެ އަތުގައި ހިއްޕަވައިގެން ކޮރުޖައްސަވަމުންނެވެ. މެންދުރުގެ އަޑުއެހުމުގައި ގާސިމް ވަނީ އާލާސްކަންފުޅާ އުޅުއްވާ ކަމާއި، ގިނަ ބޭސްތަކެއް ބޭނުންކުރައްވަން ޖެހިވަޑައިގެންފައިވާތީ ހަށިގަނޑު ވަރަށް ބޮޑަށް ވަރުބަލިވާ ކަމަށް ވިދާޅުވެފައެވެ.

މިމަހުގެ 16 ވަނަ ދުވަހު ގާސިމް ހޮސްޕިޓަލުގައި އެޑްމިޓް ކުރިގޮތަށް ދޫކޮށްލާފައިވަނީ ހޯމަ ދުވަހުއެވެ. ގާސިމްގެ ޕާސްޕޯޓް ހިފަހައްޓައި ފުރުން މަނާކޮށްފައިވާތީ، ރާއްޖެއިން ބޭރަށް ފަރުވާއަށް ވަޑައިގެންނެވޭ ގޮތެއް ނުވިއެވެ.

އިތުރު ތަފްޞީލް އަންނަނީ....