ޔާމީނާމެދު، ރައީސް ޑރ. މުއިއްޒު ކަންތައް ކުރެއްވި ގޮތް!

"ތެދުވެރިން ނޫޅެޔޭ އިނގޭ، އެކުވެރިން ނޫޅެޔޭ އިނގޭ، ކެހިވެރިން ގިނަ ތަނެއް އިނގޭ، ދުނިޔެ މިއީ ދަސްކުރޭ އިނގޭ. އެންމެ ކައިރީގައި ހީފާ އުޅޭ ރައްޓެހިން ވާނެ ފަހުން ބޭވަފާ" ލައިވައިގެ މި ކަޑި އަޑުއިވުމުން، ތި އެންމެ ބޭފުޅުން ހިތަށް އަރަނީ ކީކޭތޯ؟ ކެހިވެރިންގެ ވާހަކަ އާއި ރައްޓެހިން ބޭވަފާތެރިވާ ވާހަކަ ދެއްތޯއެވެ؟ ކުރީގެ ރައީސް އަބްދުﷲ ޔާމީނާއި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ގުޅުމަށް ވެސް ވީ ހަމަ މިކަހަލަ ގޮތެކެވެ.

ރައީސް ޔާމީން ޖަލު ހުކުމެއްގައި އޭރު ހުންނެވުމުން، ރިޔާސީ އިންތިޚާބުގައި ވާދަކުރެއްްވޭ ގޮތް ނުވުމުން ޕީޕީއެމްގެ ރިޔާސީ ޓިކެޓް އެއްވެސް ބޭފުޅަކަށް ނުދެއްވުމަށް ރައީސް ޔާމީން ނިންމެވިއެވެ. އެހާހަމައިން ޑރ މުއިޒް ވިސްނެވީ ޕީއެންސީ ގެ ކެންޑިޑޭޓްގެ ގޮތުގައި ނިކުންނެވުމަށެވެ. އަދި އެމަގަށް ކަންތައްތައް ފަހި ކުރެއްވިއެއެވެ. ބުނެވޭ ގޮތުގައި ޕީއެންސީ ހިންގެވުމާއި ހަވާލުވެ ހުންނެވި އަބްދުއްރަހީމް "ގަނެލައިގެންނެވެ." އެއަށްފަހު ޕީޕީއެމް އާއި ޕީއެންސީ އަކީ އެކަޗެއްކަމަށް ދެއްކެވުމަށް ގިނަ މަސައްކަތްތަކެއް ކުރެއްވިއެވެ. އެއާއެކު ޕީޕީއެމްގެ ސަޕޯޓަރުންގެ ތާއީދު ހޯއްދެވުމަށް "އުކުޅު" ތަކެއް ހެއްދެވިއެވެ. އެކަމުގައި ކާމިޔާބުވެސް ކުރެއްވިއެވެ. ކޮންމެ ޕޯސްޓަރެއްގެ މެދުގައި މުއިޒް ގެ ފޮޓޯ އަށް ވުރެ ބޮޑުކޮން ޔާމީންގެ ފޮޓޯ ޖަހައިގެންނެވެ. ޔާމީން ދޫކޮށްލައްވާނެ ކަމުގެ ދޮގު ވައުދުތައް ވެގެންނެވެ. ރައީސް މުއިއްޒު އޭރު ވިދާޅުވަމުން ގެންދެވީ ވެރިކަމަށް ވަޑައިގަތުމަށްފަހު، އެންމެ އިސް ޒިންމާއަކަށްވާނީ ރައީސް ޔާމީން މިނިވަން ކުރެއްވުމަށް ކަމަށެވެ. އެކަމަކު އެދުވަހެއް ނައެވެ.

ސިޔާސީ ގޮތުން ބާރުވެރިކަން ލިބުނުހާ އަވަހަކަށް ކުރީގެ ރައީސް އަބްދުﷲ ޔާމީން މިނިވަން ކުރައްވާނެކަމަށް އޭރު ރައީސް މުއިއްޒު ވިދާޅުވިއެވެ. ވެރިކަމަށް ވަޑައިގަންނަވާ ފުރަތަމަ ދުވަހު ރައީސް ޔާމީން މިނިވަން ކުރައްވާނެ ކަމަށް ވައުދު ވެވަޑައިގެންނެވިއެވެ. އެހެންނަމަވެސް އެކަން އެގޮތަކަށް ނުވިއެވެ. އެބޭފުޅުން ކުރީ ސަރުކާރުގައި ވިިދާޅުވިފަދައިން އަދިވެސް "ރައީސް ޔާމީން ހުންނެވީ ހަރާމް ހުކުމެއް" ގައި ނޫންތޯއެވެ. އެ ހުކުމަށް މިހާރު ވީ ކިހިނެއްތޯއެވެ. ރައީސް މުއިއްޒު ވެރިކަމަށް ވަޑައިގަތުމުން މިހާރު އެ ހުކުމް "ހަލާލުވީތޯ" އެވެ.

ކަންތައްތައް ވެގެން މިދިޔައީ ރައީސް މުއިއްޒު ވިދާޅުވި ގޮތާއި ޚިލާފަށެވެ. ރައީސް ޔާމީނަށް ޖެހިވަޑައިގެންނެވީ އެންމެފަހުން އަމިއްލަފުޅު ޕާޓީ ވެސް ދޫކޮށް ވަޑައިގަންނަވާށެވެ. ރައީސް މުއިއްޒަށް އެމަނިކުފާނު އިތުބާރު ކުރެއްވީ އެއްވެސް ހާލެއްގައި މި ދުވަސް ފެނިދާނެ ކަމަށް އުންމީދު ކުރައްވައިގެނެއް ނޫނެވެ. އެކަމަކު މިއަދު މި އޮތީ އެ ހަޤީޤަތާއި އެމަނިކުފާނަށް ކުރިމަތިލައްވަން ޖެހިފައެވެ. ވެރިކަން ލިބިވަޑައިގަތުމާއެކު ޑރ. މުއިއްޒު، ރައީސް ޔާމީން މަތިން ހަނދުމަފުޅު ނެތުނީއެވެ. ރައީސް ޔާމީންގެ ފޯނަށް ޖަވާބު ދެއްވުން ވެސް ހުއްޓަވާލެއްވީއެވެ. ރައީސް ޔާމީން ގޭބަންދަށް ބަދަލުކުރެއްވުމަށްފަހު، ޕާޓީ އޮފީހަށް ވަޑައިގަތުމުން ލީޑަރޝިޕްގެ ބޭފުޅުން ވަޑައެއްވެސް ނުގަތެވެ. ވެރިކަން ލިބިވަޑައިގަތުމުން އުފާ ފާޅުކުރެއްވުމުގެ ރަސްމިއްޔާތަށް ވެސް ރައީސް ޔާމީން ވަޑައިގަތުމަށް އެދިވަޑައިގަތުމުން އެކަން ވެސް މަނާ ކުރެއްވީއެވެ. ރައީސް މުއިއްޒުގެ ވާހަކަފުޅުތަކުން ރައީސް ޔާމީންގެ ނަން ފޮހެލެއްވީއެވެ. މިއީ ހައްތަހާވެސް ކަން ހިނގާ ދިޔަ ގޮތްކަމަށް ރައީސް ޔާމީނާއެކު ތިއްބެވި މެންބަރުން ވިދާޅުވި ގޮތެކެވެ.

ރައީސް މުއިއްޒު ވިދާޅުވި ހަނދާނެއް ވެއެވެ. ރައީސް ޔާމީނަކީ ސިޔާސީ މައިދާނަށް ނުކުމެވަޑައިގަތުމުގެ ކުރިންވެސް ވަރަށް ބަލައިގަންނަ ޝަހްސިއްޔަތެއް ކަމަށެވެ. ރައީސް ޔާމީންގެ ވެރިކަމުގައި އެހެން ޕާޓީއެއްގައި ހުންނަވައިގެން ވެސް އެމަނިކުފާނު ވިދާޅުވި ހުރިހާ މަސައްކަތެއް ކުރައްވާފައިވާނެ ކަމަށާއި އެފަދައިން މަސައްކަތް ކުރެއްވީ ޔާމީނާމެދު ހިތްޕުޅުގައި އޮތް ލޯތްބާއި ގަދަރުގެ ސަބަބުން ކަމަށް ވިދާޅުވިއެވެ. އެންމެ ބޮަޑަށް އެދިވަޑައިގަންނަވަނީ ޔާމީނަށް އިންސާފު ލިބުން ކަމަށާއި އެމަނިކުފާނު މިނިވަންވުމަށް ދުޢާ ކުރައްވާނެ ކަމަށް ވެސް އޭރު ވިދާޅުވިއެވެ. ޕީޕީއެމް/ޕީއެންސީ ބުނަމުންދިޔަ ދިވެހިންގެ ހިތްތަކުގެ ރައީސް، ޔާމީން މިއަދު ނިކަމެތިކޮށްލެއްވީއެވެ. ދެ ޕާޓީ މަގުމަތިވިޔަ ނުދޭން އޭރު ރައީސް ޔާމީން މަސައްކަތްޕުޅު ކުރެއްވުމުން މިއަދު އެމަނިކުފާނަށް ލިބިވަދައިގަތީ ނިކަމެތިކަމެވެ. މީހުން ބުނެ އުޅެއެވެ. އެމީހަކު ކަން ކުރި ގޮތަކާމެދު އެމިހަކާ ދޭތެރޭގައި ކަންތައްތައް ކުރެވޭނެއެވެ. މިއީ ހަމަ ޤައިމުވެސް ރައީސް ޔާމީނަށް ލިބިވަޑައިގަތް އިބުރަތްތެރި ފިލާވަޅަކަށްވާނެއެވެ. ސިޔާސީ މައިދާނުގައި ހަރަކާތްތެރިވާ ބޭފުޅުންގެ އަމަލުތަކަށް އެކަނި ބަލާލުމުން ވެސް އެނގި ހާމަވެގެންދާކަމަކީ ހަމަ ހަޤީޤަތުގައި ވެސް މި ދުނިޔެއަކީ ކެހިވެރިން ގިނަ ތަނެއްކަމެވެ.