ޖޭއެސްސީއަށް ވަކީލަކު އައްޔަން ކުރުމަށް ބާއްވާ އިންތިޚާބުގައި ވޯޓުލާން ރަޖިސްޓްރީވުމަށް ހުޅުވާލައިފި
24 ނޮވެމްބަރު 2023 | ހުކުރު 11:08މި އިންތިޚާބުގައި ވޯޓުލެވޭނީ ވޯޓުލުމުގެ ޙައްގު ލިބިފައިވާ ގާނޫނީ ވަކީލުންނަށް
ޖުޑީޝަލް ސަރވިސް ކޮމިޝަން
ޖުޑީޝަލް ސަރވިސް ކޮމިޝަން (ޖޭއެސްސީ) އަށް ގާނޫނީ ވަކީލަކު އައްޔަންކުރުމަށް ބާއްވާ އިންތިޚާބުގައި ވޯޓުލާން ރަޖިސްޓްރީ ކުރުމަށް ހުޅުވާލައިފިއެވެ.
ޖޭއެސްސީއަށް ގާނޫނީ ވަކީލަކު އިންތިޚާބު ކުރުމަށް ބާއްވާ އިންތިޚާބު ތާވަލު ކޮށްފައިވަނީ 7 ޑިސެމްބަރު 2023އަށެވެ. މި އިންތިޚާބުގައި ވޯޓުލާން ބޭނުންވާ ފަރާތްތަކުން ޑިސެމްބަރު މަހުގެ 1 ވާ ހުކުރު ދުވަހުގެރޭ ދަންވަރު 11:59ގެ ކުރިން ގޫގުލް ފޯމް (https://forms.gle/A4iPJW5wNLfwVh4d8) މެދުވެރިކޮށް ހުށަހެޅޭނެއެވެ.
މި އިންތިޚާބުގައި ވޯޓުލެވޭނީ ވޯޓުލުމުގެ ޙައްގު ލިބިފައިވާ ގާނޫނީ ވަކީލުންނަށެވެ.
ޖޭއެސްސީއަށް ގާނޫނީ ވަކީލަކު އައްޔަން ކުރުމަށް އިންތިޚާބު ބާއްވަން ބާ ކައުންސިލުން ނިންމާފައިވަނީ އެ ކޮމިޝަނުގެ ގާނޫނުގެ ދަށުން ގާނޫނީ ވަކީލުންގެ ތެރެއިން ޖޭއެސްސީއަށް އައްޔަންކޮށްފައިވާ މެންބަރުގެ މަގާމު ހުސްވެފައިވާތީއެވެ. މި އިންތިޚާބުގައި ވާދަކުރަން ބޭނުންވާ ވަކީލުންނަށް އެ ފުރުސަތުވެސް ބާ ކައުންސިލުން ވަނީ މި މަހުގެ 28 ވަނަ ދުވަހާ ހަމައަށް ހުޅުވާލައިފައެވެ.
ބާ ކައުންސިލުން ވަނީ މި އިންތިޚާބުގައި ޝަކުވާ ބަލާ ކޮމިޓީއަށް ކުރިމަތިލުމަށް ވެސް ހުޅުވާލައިފައެވެ. މި ކޮމިޓީއަކީ "ޖުޑީޝަލް ސަރވިސް ކޮމިޝަނަށް ޤާނޫނީ ވަކީލަކު ޢައްޔަނުކުރުމަށްޓަކައި ބާއްވާ އިންތިޚާބާބެހޭ އުސޫލު" ގެ ދަށުން އެކުލަވާލަން ޖެހޭ ކޮމިޓީއެކެވެ. މި ކޮމިޓީގައި ތިއްބަވާނީ ތިން މެމްބަރުންނެވެ.
ޝަކުވާ ބަލާ ކޮމިޓީގެ މެމްބަރަކަށް ވުމަށް ބާ ކައުންސިލުން ފުރުސަތު ހުޅުވާލާފައިވަނީ އެ ކައުންސިލުގެ އާއްމު މެމްބަރުންނަށެވެ.
