ނައިބު ރައީސް ޗެއަރކުރައްވާ، ސޯޝަލް ކައުންސިލުގެ ފުރަތަމަ ބައްދަލުވުން ބާއްވައިފި
އިޖުތިމާއީ ދާއިރާގައި ހިމެނޭ ވައުދުތައް ރައީސުލްޖުމްހޫރިއްޔާގެ އޮފީހާއި އެކި ވުޒާރާތަކަށް ބެހިފައިވާގޮތް ހިއްސާ ކުރައްވާފައިވޭ
ރައީސުލްޖުމްހޫރިއްޔާގެ ނައިބު ޗެއަރކުރައްވާ، ސޯޝަލް ކައުންސިލުގެ ފުރަތަމަ ބައްދަލުވުން
ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސައިން މުޙައްމަދު ލަޠީފު ޗެއަރކުރައްވާ، ސޯޝަލް ކައުންސިލުގެ ފުރަތަމަ ބައްދަލުވުން ބުދަ ދުވަހު ބާއްވަވައިފިއެވެ.
މި ބައްދަލުކުރެއްވުން ބޭއްވީ ބުދަ ދުވަހުގެ ހެނދުނު ރައީސުލްޖުމްހޫރިއްޔާގެ އޮފީހުގައެވެ. މި ބައްދަލުވުމުގައި، 'ހަފްތާ 14'ގައި ހިމެނޭ ވައުދުފުޅުތަކުގެ ތެރެއިން އިޖުތިމާއީ ދާއިރާގައި ހިމެނޭ ވައުދުތައް ރައީސުލްޖުމްހޫރިއްޔާގެ އޮފީހާއި އެކި ވުޒާރާތަކަށް ބެހިފައިވާ ގޮތް ހިއްސާކުރައްވައި، އެކަންކަން ކުރިއަށް ގެންދިއުމަށް ރޭވިފައިވާ ގޮތްތަކާ ގުޅޭގޮތުން ސޯޝަލް ކައުންސިލުގެ މެންބަރުން މަޝްވަރާކުރެއްވިއެވެ.
'ހަފްތާ 14'ގައި ޖުމްލަ 161 ވައުދުފުޅު ހިމެނޭއިރު، އޭގެ ތެރެއިން 61 ވައުދުފުޅަކީ އިޖުތިމާއީ ދާއިރާގެ ތެރޭގައި ހިމެނޭ ވައުދުފުޅުތަކެވެ.
މި ބައްދަލުކުރެއްވުމުގައި ވަޒީރުން ވަނީ، 'ހަފްތާ 14' ތަންފީޒުކުރުމަށް އެ ވުޒާރާތަކުން ކުރަމުންގެންދާ މަސައްކަތްތަކުގެ އެންމެ ފަހުގެ މަޢުލޫމާތުތައް ހިއްސާކުރައްވާފައެވެ.
