ޚަރަދު ކުޑަކޮށްގެން މަސައްކަތް ކުރުމަށް އިދާރާތަކަށް ފިނޭންސް މިނިސްޓަރު އިލްތިމާސްކުރައްވައިފި

ވީއެންމެ ބޮޑަކަށް ޚަރަދު ކުޑަކޮށްގެން މަސައްކަތް ކުރަމުން ދިއުމަށް ދައުލަތުގެ ހުރިހާ މުއައްސަސާތަކަށް ފިނޭންސް މިނިސްޓަރު ޑރ. މުހައްމަދު ޝަފީގް އިލްތިމާސްކުރައްވައިފިއެވެ.

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ބަޖެޓް ބަހުސް ފެށުމުގެ ކުރިން މަޖިލީހުގައި ވާހަކަފުޅުދައްކަވަމުން މިނިސްޓަރު ވިދާޅުވީ ޚަރަދު ކުޑަކުރަން މައިގަނޑު 3 ކަމެއް ބަޖެޓުގައި ހިމަނާފައިވާ ކަމަށެވެ. އެގޮތުން ފިސްކަލް އަދި ދަރަނީގެ ދެމެހެއްޓެނެވިކަން ކަށަވަރުކުރުމަށް ދައުލަތުގެ ޚަރަދާއި ފައިނޭންސް ހޯދަންޖެހޭ މިންވަރު ކުޑަކުރަންޖެހޭ އިރު، ޚަރަދު ކުޑަކުރުމާއި ގުޅޭ ފިޔަވަޅުތައް ތަންފީޒުކުރުމަކީ މުހިންމު ކަމެއް ކަމުގައި މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ބަޖެޓުގައި ޚަރަދުކުޑަކުރުމަށް ހުށަހެޅިފައިވާ ކަންކަމަކީ އިންޑައިރެކްޓް ބައެއް ސަބްސިޑީތައް ސަރުކާރުގެ އެހީތެރިކަމަށް އެންމެ ބޭނުންޖެހިފައިވާ ފަރާތްތަކަށް ޚާއްސަ ކުރެވޭ ގޮތަށް ޑައިރެކްޓް ސަބްސިޑީއަަކަށް ބަދަލުކުރެއްވުން ކަމަށެވެ. މީގެ އިތުރުން އާސަންދައިގެ ނިޒާމް މުރާޖާކޮށް ހަރުދަނާ ކުރުމާއި، ސަރުކާރުގެ ވެލްފެއަރ ނިޒާމް ހަރުދަނާކުރުން ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ސިޔާސަތުތަކަށް ބަދަލު ނުގެނެސް ބަޖެޓްރީ ކޮންޓްރޯލުން އެކަނި އެކަށީގެންވާ މިންވަރަށް ސޭވިންގ ނުގެނެވޭނެކަމަށެވެ.

އަދި ސަރުކާރު ބަދަލުވި މަރުހަލާފައި އެކުލަވާލާފައިވާ ރައީސް ޑރ. މުހައްމަދު މުއިއްޒުގެ ސަރުކާރުގެ އެންމެހާ ވައުދުތަކާއި ސިޔާސަތުތައް ހިމެނިފައި ނުވާ ކަމަށާއި ސަރުކާރުގެ ފުރަތަމަ އަހަރު އެންމެ ބޮޑު އަހައްމިއްޔަތުކަމެއް ދީގެން ކުރިއަށް ގެންދިއުމަށް ރާވާފައިވާ ޖުމްލަ 458 މަޝްރޫއަކަށް 1.5 ބިލިއަން ރުފިޔާ ބަޖެޓުގައި ހިމަނާފައިވާނެ ކަމަށް ވެސް ފިނޭންސް މިނިސްޓަރު ވިދާޅުވިއެވެ.