ސްކޫލްތަކުގެ ލައިބްރަރީގައި ހުންނަ ފޮތްތަކަކީ ދީނާއި ސަގާފަތާއި އާދަކާދައާ ފުށުނާރާ ތަކެތިކަން ކަށަވަރުކުރުމަށް އަންގައިފި
ދީނާއި ސަގާފަތާއި އާދަކާދައާ ފުށުއަރާ މައުލޫމާތު ހުރިނަމަ އެ ފޮތްތައް ނައްތާލުމަށް ވަނީ އަންގާފައި
ސްކޫލް ކުދިންތަކެއް ލައިބްރަރީގައި ފޮތް ކިޔަނީ
ސްކޫލްތަކުގެ ލައިބްރަރީގައި ހުންނަ ފޮތްތަކަކީ ދީނާއި ސަގާފަތާއި އާދަކާދައާ ފުށުނާރާ ތަކެތިކަން ކަށަވަރު ކުރުމަށް އެޑިއުކޭޝަން މިނިސްޓްރީން އަންގައިފިއެވެ.
އެ މިނިސްޓްރީން މިގޮތަށް އަންގާފައިވަނީ އަންގާރަ ދުވަހު ރާއްޖޭގެ ހުރިހާ ސްކޫލަކަށާއި އެޑިއުކޭޝަން މިނިސްޓްރީގެ ޑިވިޝަންތަކާއި ސެކްޝަންތަކާއި ޑިޕާޓްމަންޓުތަކަށް ފޮނުވި ސާކިއުލާއެއްގައެވެ. އެގޮތުން، ރާއްޖޭގެ ސްކޫލްތަކުގެ ލައިބްރަރީތަކުގައި ބޭނުންކުރާ ފޮތާއި އެހެނިހެން ވަސީލަތްތަކުގެ ތެރޭގައި އިސްލާމްދީނާއި، ދިވެހިންގެ ސަގާފަތާއި އާދަކާދަތަކާއި ފުށުއަރާފަދަ ބައެއް ތަކެތި ހުރިކަން ފާހަގަކުރެވިފައިވާ ކަމަށް އެ މިނިސްޓްރީން ވަނީ ބުނެފައެވެ.
މިކަމާ ގުޅިގެން އެޑިއުކޭޝަން މިނިސްޓްރީން ވަނީ ސްކޫލްތަކުގެ ލައިބްރަރީތަކުގައި މިހާރު ބޭނުންކުރަމުން އަންނަ ފޮތް އަދި އެހެނިހެން ވަސީލަތްތަކަކީ އިސްލާމްދީނާއި ދިވެހިންގެ ސަގާފަތާއި އާދަކާދަތަކާ ފުށުނާރާ ތަކެތިކަން ކަށަވަރުކޮށް، އަމިއްލަ ފަރާތްތަކާއި އެހެނިހެން ފަރާތްތަކުން ހަދިޔާ ކުރާ ފޮތްފަދަ ތަކެތިވެސް ލައިބްރަރީތަކުގައި ބޭނުންކުރުމުގެ ކުރިން އެތަކެއްޗަކީ ދަރިވަރުން ބޭނުންކުރުމަށް އެކަށީގެންވާ ތަކެތިކަން ކަށަވަރުކުރުމަށް އަންގާފައެވެ.
މީގެ އިތުރުން ސްކޫލްތަކުގެ ލައިބްރަރީތަކުގައި މިފަދަ ފޮތެއް ނުވަތަ އެއްވެސް އެއްޗެއް ހުރިނަމަ އެ މިނިސްޓްރީއާ ގުޅިގެން އެފަދަ ތަކެތި ނައްތާލުމުގެ އިންތިޒާމް ކުރިއަށް ގެންދިއުމަށް ވެސް އެޑިއުކޭޝަން މިނިސްޓްރީން ވަނީ މި ސާކިއުލާގައި އަންގާފައެވެ.
އެޑިއުކޭޝަން މިނިސްޓްރީން މިގޮތަށް އަންގާފައިވާއިރު ދޭތެރެ ދޭތެރެއިން އިސްލާމް ދީނާ ފުށުއަރާ ކަންކަން ހިމެނޭ ފޮތްތައް ސްކޫލްތަކުން ފެނި އެ ފޮޓޯތައް ސޯޝަލް މީޑިއާގައި ދައުރުކުރެއެވެ. އަންގާރަ ދުވަހު ވެސް އެފަދަ ފޮޓޯއެއް ވަނީ ދައުރުވެފައެވެ.
